🔸လယ်ယာမြေသည်မြေချဉ်နေပါက သီးနှံပင်အာဟာရဓာတ်များ မျှတစွာမစားသုံးနိုင်သည့်အတွက် အပင်ကြီးထွားဖွံ့ဖြိုးမှုယုတ်လျော့စေပါသည်။ မြေချဉ်နေသည့်အတွက်အချို့ဓာတ်များကလည်းသီးနှံပင်ကို အဆိပ်သင့်စေပါသည်။ အလျူမီနီယမ် အဆိပ်သင့်ခြင်း၊ မဂ္ဂနီးစ်အဆိပ်သင့်ခြင်း ၊ကယ်လ်ဆီယမ်ချို့တဲ့ခြင်း၊ မဂ္ဂနီဆီယမ်ချို့တဲ့ခြင်း ၊ မော်လစ်ဒီနမ်ချို့တဲ့ခြင်းများဖြစ်ပေါ်စေပါသည်။  

🔸မြေချဉ်နေခြင်းကိုပြုပြင်ရန် ထုံးကိုအသုံးပြုခြင်းသည်အလွယ်ကူ အရိုးရှင်းဆုံးနည်းလမ်းဖြစ်ပါသည်။အသုံးပြုနိုင်သည့်ထုံးအမျိုးမျိုးမှာ ထုံးကျောက်၊ မဖောက်ထုံး၊ ဖောက်ထုံး၊ ဒိုလိုမိုက် တို့ဖြစ်သည်။ ထုံးကိုအသုံးပြုရာတွင် တစ်ဧက အတွက်ထုံးပိဿာ ၆၃၀ ကိုသုံးနှစ်ဆက်တိုက် တစ်နှစ်တစ်ကြိမ်ထည့်ပေးရန် ဖြစ်သည်။ ထုံးထည့်ရာတွင်သီးနှံကို မထိခိုက်စေရန် သီးနှံမစိုက်မီ (၁-၆)လ ကြိုတင်ထည့်ပေးထားလျှင် စိတ်အချရဆုံးဖြစ်သည်။  

🔸မြေချဉ်နေသည့်မြေကို မြေဆီလွှာအတွင်းထုံးထည့်ပေးပါက မြေတွင်းရှိအာဟာရဓာတ်များကို အပင်မှစားသုံးနိုင်သည့်အနေအထားရောက်အောင်ဖန်တီးပေးပါသည်။ ထုံးသည်မြေဆီလွှာအတွင်း ထိန်းချုပ်ခံ နေရသည့် ဖော့စ်ဖိတ်ဓာတ်ကို အပင်မှစားသုံးနိုင်သည့်အခြေအနေဖြစ်အောင်ဆွဲထုတ်ပေးပါသည်။ ထုံးထည့်ပေး ခြင်းဖြင့် မြေဆီလွှာအတွက်မရှိမဖြစ်လိုအပ်သည့်ထုံးဓာတ်ကိုထောက်ပံ့ပေးသည်။ မြေဆီလွှာအတွင်းရှိ ထုံးဓာတ်သည် အပင်များက ပိုတက်စီယမ်ဓာတ်ကိုကောင်းစွာစုပ်ယူနိုင်အောင် ကူညီ ပေးပါသည်။

🔸ထုံးဓာတ်မှာမြေဆီလွှာအတွင်းရှိအော်ဂဲနစ်ပစ္စည်းများကို လျှင်မြန်စွာဆွေးမြေ့စေပြီး အပင်များက မြန်မြန်စားသုံးနိုင်ပါသည်။ ဒိုလိုမိုက်ကဲ့သို့ထုံးကိုအသုံးပြူပါက အပင်များလိုအပ်သည့်မဂ္ဂနီဆီယမ်ကိုပါ ဖြည့်ဆည်းပေးပါသည်။  

🔸ထုံးထည့်ပေးခြင်းဖြင့်မြေဆီလွှာအတွင်းရှိ အကျိုးပြုဘက်တီးရီးယားများ နိုးကြားလာပြီး မြေဆီလွှာကို မြေရှင်ဖြစ်အောင်ဆောင်ရွက်ပေးပါသည်။ မြေဆီလွှာအတွင်းထုံးဓာတ်ရှိနေပါက မြေဆီလွှာအတွင်းရှိ အလျူမီနီယမ်၊ မဂ္ဂနီဆီယမ်အိုင်းယွန်းများ သည်ရေတွင်မပျော်ဝင်နိုင်သဖြင့် အဆိပ်သင့်မှု မဖြစ်စေနိုင်ပါ။ ထုံးထည့်ခြင်းဖြင့်မြေဆီလွှာရုပ်ဂုဏ်သတ္တိကိုတိုးတက်စေပါသည်။ ဓာတ်သတ္တုအဆိပ်သင့်မှုများကို လျော့နည်း စေပါသည်။နိုက်ထရိုဂျင်ဓာတ်ဆုံးပါးမှုကိုလည်းလျော့နည်းစေနိုင်ပါကြောင်း ရေးသားတင်ပြအပ်ပါသည်။  

Source- စိုက်ပျိုးရေးရာ အကြံပြုချက်များ။

မြန်မာတောင်သူကြီးများဂျာနယ်။