🌿🍂🌿🍂🌿🍂🌿🍂🌿🍂🌿

🔸 မြန်မာလူမျိုးတို့ ဘုရားပန်းတင်သည့်အခါ အောင်သပြေပန်းမှာ မပါမဖြစ်ဖြစ်ပါတယ်။ ယခုဆိုလျှင် ပန်းစျေးကွက်တွင် မြန်မာသပြေ လို့ခေါ်တဲ့ အောင်သပြေညွန့်အပြင်၊ အဲ့ဒီအောင်သပြေကိုမှ ငုတ်လေးတွေ တူးရောင်းတဲ့ သပြေငုတ်၊ အညွှန့်လေးတွေ ရဲရဲတောက်နေအောင်လှတဲ့ အာဆီယံသပြေ စတဲ့ သပြေပန်းမျိုးစုံကလည်း သူ့စျေးကွက်နဲ့သူ နေရာယူလျှက်ရှိပါသည်။

သပြေပင် စိုက်ပျိုးချိန်

-------------------

 သပြေပင်ကို ရာသီမရွေး စိုက်ပျိုးနိုင်ပါတယ်။ ရေကြိုက်သည့် အပင်အမျိုးအစားဖြစ်သည့်အတွက် သပြေပင်စိုက်တော့မယ်ဆိုရင် ရေရရှိတဲ့ အရပ်ဒေသ၊ ရေသွယ်ယူလို့ လွယ်ကူတဲ့ နေရာမျိုးမှာ စိုက်ပျိုးရပါမယ်။ သပြေပင်သည် နှစ်ရှည်ပင်အမျိုးအစား ဖြစ်ပါသည်။

မြေအမျိုး အစား ရွေးချယ်ခြင်

--------------------------

 စိုက်ပျိုးမည့်မြေသည် မြေချဉ်ငံကိန်း (၅.၈ - ၈.၅) အတွင်းရှိပါက သပြေစိုက်ပျိုးရန် အကောင်းဆုံး အနေအထား ဖြစ်ပါသည်။ အာဆီယံသပြေမျိုးကို စီးပွားဖြစ်စိုက်ပျိုးပါက ပင်ရေစိပ်စိပ်နှင့် စိုက်ပျိုးကြပါသည်။ တန်းကြားကို လူ၀င်ထွက်လို့ရအောင်၊ သပြေညွှန့်ခူးလို့လွယ်အောင်(၂.၅ - ၃)ပေခန့် ထားပေးရပါမည်။ ပင်ကြားကိုတော့ (၁၈)လက်မလောက် ထားကြပါသည်။ အာဆီယံသပြေမျိုး သာမက သပြေငုတ်မျိုးကိုလည်း အပင်ရေကို ခပ်စိပ်စိပ်ပဲ ထား၍စိုက်ပျိုးရပါမည်။သပြေပျိုးပင်များကိုတော့အသင့်ပျိုးပြီးပျိုးပင်များ ဝယ်ယူစိုက်ပျိုးနိုင်ပါသည်။ သပြေငုတ်ကို တောင်စောင်းတွေမှာ အစိုက်များပြီး၊ ဓာတ်မြေသြဇာကို တစ်နှစ်မှာ (၂)ကြိမ်နှုန်းနှင့် ယူရီးယား ပုလဲမြေသြဇာ (သို့မဟုတ်) (၁၅)ပတ်လည် မြေသြဇာကို ကျွေးပေးရပါသည်။ သပြေပင်စိုက်ပျိုးရာတွင် အဓိက သတိထားရမည်မှာ မြေအောင်းပိုးဖြစ်ပါ။၎င်းမြေအောင်းပိုးများကိုကာကွယ်နိုင်ရန် “ဒီပါ (သို့) ဖစ်ပရို” မြေအောင်းပိုးသတ်ဆေးခဲ တစ်မျိုးမျိုးကို သပြေပင်များ အပင်ခြေအစိုဓာတ်ရှိနေချိန်တွင် ကြဲပက်ပေးရပါမည်။ 

သပြေပင်များ ရေသွင်းပေးခြင်း

---------------------------

 သပြေပင်ကိုစီးပွားဖြစ် စိုက်ပျိုးပါက မနက် တစ်ရေ၊ ညနေ တစ်ရေ နှုန်းနှင့် တစ်နေ့ကို ရေ(၂)ကြိမ် ပေးသင့်ပါသည်။ သပြေပင်သည် အမြစ်ရှည်သည့်အပင်မျိုးဖြစ်ပြီး ရေကြိုက်သည့်အပင်ဖြစ်ပါသည်။

သပြေပင်များ ငုတ်တူးခြင်း နှင့် ရောင်းချခြင်း

--------------------------------------

 သပြေငုတ်များကို စိုက်ပျိုးပြီး (၃ - ၅)နှစ်အကြာမှာ ငုတ်တူးပြီး စျေးကွက်ပို့နိုင်ပါသည်။ အာဆီယံသပြေကိုတော့ ပြုစုမှုကောင်းရင်ကောင်းသလို (၈)လကနေ တစ်နှစ်ခွဲကာလမှာ စျေးကွက် တင်ပို့နိုင်ပါသည်။ နောက်ပိုင်းမှာတော့ (၁၅)ရက်တစ်ခါ ဖြတ်ရောင်းနိုင်ပါသည်။

သပြေပင် အဓိကစိုက်ပျိုးသောဒေသများ

-----------------------------------

 မြန်မာနိုင်ငံမှာ သပြေပင်စိုက်ပျိုးခြင်းကို ရှမ်းပြည်နယ်တောင်ပိုင်း တောင်ကြီး၊ ရွာငံဒေသတဝိုက်၊ ပဲခူးရိုးမအနီးရှိ ရေနီ၊ ရေတာရှည်၊ တောင်ငူ ဒေသများ မန္တလေးတိုင်းအတွင်း မန္တလေး၊ အမရပူရ၊ ဒဟပ်တော၊ ရေတံခွန်တောင်၊ ရန်ကုန်တိုင်း တိုက်ကြီး၊ မှော်ဘီ၊ ညောင်နှစ်ပင် စသည့်ဒေသများတွင် အများဆုံး စိုက်ပျိုးကြပါသည်။ ပဲခူးနယ်ဘက်မှထွက်သော သပြေများကို နေပြည်တော်စျေးကွက်သို့ တင်ပို့ကြပြီး အာဆီယံသပြေ ကတော့ မြို့ကြိုက်သပြေဖြစ်သည်။ တာရှည်ခံတာကို ကြိုက်နှစ်သက်သူများက သပြေငုတ်ကို အဝယ်များကြပါသည်။ အာဆီယံသပြေမှာ လှပမှုရှိပြီး ရက်ရှည်အထားမခံဘဲ သုံးရက်လောက်ဆို နွမ်းပါသည်။

🔸ထို့ကြောင့် ရာသီမရွေးစိုက်ပျိုးနိုင်ပြီး မြန်မာလူမျိုးတိုင်းလည်းကြိုက်နှစ်သက်ကြသည့် သပြေပင်လေးတွေ စိုက်ပျိုးရင်း စီးပွားဖြစ်ထွန်းနိုင်ကြပါစေ။

ကိုးကား : စီးပွားဖြစ်သပြေပင်စိုက်ပျိုးခြင်း