🫛🫛🫛🫛🫛🫛🫛🫛🫛🫛

✅ ပြည်ပပို့ကုန်ပဲတွေထဲမှာ ပဲတီစိမ်းစျေးကွက်ကတော့ ပြည်ပဝယ်လိုအားကောင်းနေတာကြောင့် ဒေသအလိုက် စျေးတွေတက်လာတယ်လို့သိရပါတယ်။ လက်ရှိမှာ ပဲတီစိမ်းကို တရုတ်ကလည်းဝယ်လိုအားရှိနေသလို အခြားပြည်ပဝယ်လက်တွေကလည်း ဝယ်လိုအားရှိနေတာကြောင့် ပြည်တွင်း ပဲတီစိမ်းစျေးကွက်က မြင့်တက်နေတာဖြစ်တယ်လို့ သိရပါတယ်။ ပဲတီစိမ်းစျေးကွက်မှာ နှစ်စဥ်စျေးတန်း အမြင့်ဆုံးနဲ့ထိပ်ဆုံးကနေရပ်တည်ခဲ့တဲ့ ပဲတီစိမ်းခရမ်းရွှေဝါက လက်ရှိမှာတော့ ဝါးခယ်မ SQ စျေးတန်းအောက်ရောက်ရှိနေတယ်လို့လည်း သိရပါတယ်။

✅ "မတ်ပဲတို့ ပဲစင်းငုံတို့ ဈေးကျနေချိန် ပဲတီစိမ်းက ဆက်တိုက်ကိုဈေးတက်လာပါတယ်။ အရင်နှစ်တွေဆို ပဲတီစိမ်းပေါ်ချိန်သာ စျေးကောင်းရတတ်တယ်။ နောက်ပိုင်းဆိုစျေးတန်းကအေးသွားတတ်တယ်။ ဒီနှစ်ကတော့ မကျဘဲတက်လာတာပေါ့" လို့ ပဲရောင်းဝယ်ရေးလုပ်ကိုင်သူတစ်ဦးကပြောပါတယ်။

✅ ပဲတီစိမ်းက လက်ရှိဘုရင့်နောင်ကုန်စည်ဒိုင်မှာ ပဲတီစိမ်းတစ်ပိဿာကို ခရမ်းရွှေဝါ (ထိပ်စ) က ၅,၅၀၀ ကျပ်၊ ပဲခူးရွှေဝါက ၅,၅၀၀ ကျပ်၊ အညာပဲတီစိမ်းက ၅,၁၆၅ မှ ၅,၁၈၅ ကျပ်၊ ဝါးခယ်မ FAQက ၅,၂၅၀ မှ ၅,၂၇၀ ကျပ်နဲ့ ဝါးခယ်မ SQ ၅,၇၅၀ မှ ၅,၇၇၀ ကျပ် ရှိတယ်လို့ သိရပါတယ်။ ပဲတီစိမ်း ခရမ်းရွှေဝါ အဓိကထွက်တဲ့ ရန်ကုန်တိုင်းက ခရမ်း၊ သုံးခွနဲ့မြို့နယ်အချို့စျေးကွက်မှာ ခရမ်းရွှေဝါ ပိဿာ ၂၀ တစ်တင်းကို ၁၁၇,၅၀၀ ကျပ် စျေးရှိနေတယ်လို့ သိရပါတယ်။ ပဲတီစိမ်း ဝါးခယ်မကတော့ နယ်ဘက်တွေမှာ ပိဿာ ၂၀ တစ်တင်းကို ၁၄၀,၀၀၀ ကျပ် မှ ၁၅၀,၀၀၀ ဝန်းကျင်အထိ စျေးတန်းပေါက်နေတယ်လို့ သိရပါတယ်။

✅ "စျေးကလည်းတက်၊ တောင်သူတွေကလည်းရသမျှရောင်းတာပဲ။ ကျွန်တော်တို့ဆိုလည်း ရသမျှရောင်းနေတာကုန်သလောက်ဖြစ်ပြီ။ နောက်ဆိုတာမသေချာဘူး" လို့ ပဲတီစိမ်းစိုက်တောင်သူက ပြောပါတယ်။ ပဲတီစိမ်းစျေးကွက်က နှစ်စဥ် ပဲတွေစတင်ခူးဆွတ်ချိန်မှာသာ စျေးကောင်းပြီး စျေးတက်လေ့ရှိတာ ကြောင့်တောင်သူအများစုက ခူးဆွတ်ရိတ်သိမ်းပြီးသမျှ ပဲတီစိမ်းအားလုံးနီးပါးကို ချက်ခြင်းရောင်းချနေကြပေမယ့် ပဲတီစိမ်းစျေးမြင့်တက်လာနေဆဲဖြစ်လို့ တောင်သူရောင်းအားကလည်း များနေတယ်လို့သိရပါတယ်။

✅ တောင်သူတွေအနေနဲ့ ရောင်းလိုအားများနေပေမယ့်လည်း ပြည်ပက ပဲလိုအပ်ချက်ရှိပြီး ဝယ်ယူမှု များနေတာကြောင့် ပဲတီစိမ်းစျေးက မကျဆင်းဘဲ စျေးကွက်အတက်ဘက်ပဲရှိနေတာဖြစ်တယ်လို့ သိရပါတယ်။ ပဲတီစိမ်းကို ရန်ကုန်တိုင်း၊ ပဲခူးတိုင်း၊ ဧရာဝတီတိုင်း၊ မန္တလေးတိုင်း တို့မှာ အဓိကအများဆုံးစိုက်ပျိုးကြတာဖြစ်ပါတယ်။

Sources : ချစ်ခွန်းချို(AMIA)