🔹ပတ်ဝန်းကျင်နှင့်ရာသီဥတုကောင်းမွန်လျှင်သက်ရှိသတ္တဝါနှင့်သီးနှံပင်များသည်ဖြစ်တည်ရှင်သန်ကြီးထွားမှု ဖွံ့ဖြိုးပါသည်။ ယနေ့အချိန်ကာလသည် ကမ္ဘာတစ်ဝန်းပတ်ဝန်းကျင်ညစ်ညမ်းမှု၊ ပတ်ဝန်းကျင်ထိခိုက် ပျက်စီးမှုသည် ဒေသအနှံ့ကြုံတွေ့နေကြရသည်။ သစ်တော၊ သစ်ပင်တောပြုန်းခြင်းကြောင့်ရာသီဥတု ပြောင်းလဲမှုကိုကြုံလာရသည်။ တောပြုန်းသဖြင့်ရာသီဥတုပူပြင်းလာသည်။ တောနေတိရစ္ဆာန်နှင့် ပိုးမွှားများနေစရာမရှိသဖြင့်မြို့ရွာဒေသများသို့ကျူးကျော်ရောက်ရှိလာသည်။

 🔹မိုးရွာသွန်းမှုအနည်းအများရှိခြင်း၊မုန်တိုင်းများကျခြင်း၊ တောမီးလောင်ခြင်း၊ မိုးကြိုးမုန်တိုင်းများကြုံလာ ရပြီး သစ်တောများရှိ သစ်ပင်များတွင်နေထိုင်ကျက်စားကြသောပိုးမွှားများသည်တောပြုန်း၍ လူတို့၏ စိုက်ခင်းသို့ရွှေ့ပြောင်းကျ ရောက်လာကြသည်။ ဤသို့ဖြင့်ယခင်ကမကျရောက်ခဲ့သော နှံကောင်မျိုးစိတ် များသည်သီးနှံစိုက်ခင်း တွင်အများအပြားတွေ့လာကြရသည်။ ပြည်တွင်းမှာမရှိသောငမြှောင်တောင် မျိုးသစ်များ ကျလာသည်။ ခရုမျိုးစုံကလည်းကျရောက်ခဲ့ပြီးလျှင်မျိုးပြုန်းသွားသည်မရှိ၊ ပွားများလာသည်။ မုန်တိုင်းကျပြီးမိုးရွာသောအခါအဆိုပါဖြက်ပိုးများသည်စားစရာနှင့်မျိုးပွားစရာနေရာသစ်ရရှိ လာပြီးတွေ့သမျှစိုက်ခင်းဖျက်စီးတော့သည်။

 🔹ပင်လယ်ကိုကျော်ဖြတ်၊ ကျွန်းဆွယ်ကိုပတ်၍ လေမုန်တိုင်းလေစီးကြောင်းဖြင့်ပါလာသည်။ မြင့်မားသောတောင်တန်းကြီးများကိုကျော်ဖြတ်ရန်ခက်ခဲသော်လည်းမလွယ်ပေါက်များကဝင်ရောက်နိုင် သေးသည်။ ဤနည်းဖြင့်အိမ်နည်းချင်းနိုင်ငံများတွင်ကျရောက်သောဖျက်ပိုးများသည်နိုင်ငံကူးလာကြသည်။ ကန္တာရနှံကောင်၏ပျံ့နှံ့မှုလမ်းကြောင်းကိုကြည့်ပါ။ ပင်လယ်နီဒေသမှအရှေ့အာရှအထိရောက်ရှိလာမှုသည် ရာသီဥတုနှင့်ဆက်စပ်နေသည်။ တောမရှိ၊ အစာမရှိရာမှမုန်တိုင်းလေစီးကြောင်းနှင့် အစာရှိရာဒေသအထိ ရွေ့လာနိုင်ကြသည့်စွမ်းအားရှိသည်။

 🔹ခရုကဲ့သို့ဖျက်ပိုးများသည် ပင်လယ်ကူးသင်္ဘောများတွင် တွယ်ကပ်ပြီးပျံ့နှံ့သည်။ ပေါင်းမြက်မျိုးစိတ်အသစ်များသည်သီးနှံမျိုးများဖြန့်ဖြူးရာမှနိုင်ငံအနှံ့ ပျံ့နှံ့ခဲ့သည်။ တစ်ချိန်ကမြန်မာနိုင်ငံတွင်မက်ဆီပက်ပေါင်းမြက်သည်ဂျုံမျိုးသစ်တင်သွင်းရာမှဂျုံစိုက်ပျိုးသည့် မြို့ရွာများသို့ရောက်ရှိခဲ့သည်။ ရော်ဘာ၊ သီဟိုဠ်သရက်စိုက်ခင်းများတွင် မီးလောင်လွယ်သော ဂျပန်မြက်များသည်လည်းပြည်ပပေါင်းမျိုးဖြစ်သည်။ကျိုင်းကောင်မျိုးသစ်များသည်ကြံစိုက်ခင်းများတွင်လွန်ခဲ့သောတစ်နှစ်ခန့်ကစ၍ဖျက်စီးမှုရှိလာသည်။ ထို့အတူရွက်ဖျားဖြူအပင်ရောဂါများလည်းကြံစိုက်ဒေသများတွင်တွေ့လာရသည်။ ရော်ဘာစိုက်ခင်းများ တွင်အိမ်နီးချင်းနိုင်ငံများ၌ ကျရောက်မှုများလာသောရွက်ကြွေရောဂါ(မှိုရောဂါ)သည်ရော်ဘာပျိုးပင်၊ ပျိုးကိုင်း၊ မျိုးစေ့တို့မှပါရှိလာပြီးပြည်တွင်းရောက်ရှိလာသဖြင့်နိုင်ငံတကာလေဆိပ်နှင့် နယ်စပ်ဝင်ပေါက် များကပိတ်ဆို့နေကြသည်။ အဆိုပါရွက်ကြွေရောဂါသည် မြေပြန့်ထက်ကုန်းမြင့်ဒေသများတွင်ပိုမို တွေ့ရပြီးရော်ဘာအပြင် ဆီအုန်း၊ ကော်ဖီ၊ကိုကိုးပင်များတွင်လည်းကျရောက်နေသည်။

 🔹ဤသို့ဖြင့်နိုင်ငံတွင်းသို့အသစ်ရောက်ရှိလာသောဖျက်ပိုးနှင့်ရောဂါများကိုဥပဒေဖြင့်ကာကွယ်ခြင်း၊ ထိန်းချုပ်ခြင်း၊ နှိမ်နင်းခြင်းတို့ပြုလုပ်နေရပါသည်။ ရောဂါပိုးမွှားမျိုးသစ်တစ်မျိုးကျရောက်လာလျှင် ကာကွယ်နှိမ်နင်းရမှုခက်ခဲပါသည်။ ဤသည်ကို၁၉၇၃ခုနှစ် မြန်မာနိုင်ငံအောက်ပိုင်းကြံစိုက်ဒေသများသို့ ကြံအူနီရောဂါကျရောက်စဉ်ကကြုံတွေ့ခဲ့ဖူးပါသည်။သီးနှံစိုက်ခင်းတွင်ယခင်ကထက် ပိုးသစ်၊ ရောဂါသစ်များကျရောက်မှုရှိလာခြင်းမှာဒေသတစ်ခုနှင့် တစ်ခုကူးသန်းရောင်းဝယ်မှုကလည်းယခင်ကထက်ဖွံ့ဖြိုးလာသည်။ သီးနှံစိုက်ပျိုးထုတ်လုပ်မှုကလည်း တစ်နှစ်ပတ်လုံးရှိလာသည်။ သစ်တောပြုန်းတီးမှုကလည်းဒေသအနှံ့၊နိုင်ငံအနှံ့ရှိနေသည်။ ထို့ကြောင့် ပတ်ဝန်းကျင်ကလည်းထိခိုက်ပျက်စီးနေသည်။ ပတ်ဝန်းကျင်ကိုမပျက်စီးအောင်ထိန်းသိမ်းနိုင်ကြမှသာလျှင် ကမ္ဘာမြေကျန်းမာပါမည်။ ပတ်ဝန်းကျင်ပျက်စီး၍သီးနှံစိုက်ခင်းများအထိပိုးနှင့်ရောဂါကျရောက်မှု များပြားလာသည်ကို သတိပြုကြရပါတော့မည်။  

ကိုရဲ(စိုက်ပျိုးရေး)