🌱🌱🌱🌱🌱🌱🌱🌱🌱🌱

🔸အကျိုးပြုအဏုဇီဝဖျော်ရည် (အီးအမ်) ဆိုသည်မှာ မြေဆီလွှာအတွင်းရှိ သီးနှံပင်တို့၏ ကြီးထွားဖွံ့ဖြိုးမှု၊ အထွက်နှုန်း၊ ပိုးမွှားရောဂါဒဏ်ခံနိုင်ရည်ရှိမှုနှင့် သီးနှံအရည်အသွေးကို မြင့်မားစေနိုင်သော အကျိုးပြု အဏုဇီဝမျိုးစိတ်များကို အဆင့်မြင့်နည်းပညာဖြင့် စနစ်တကျ စုပေါင်းမွေးမြူဖျော်စပ်ထားသည့် ဖျော်ရည်တစ်မျိုးဖြစ်ပါသည်။

🔸အီးအမ်တွင် အဓိကပါဝင်သော အဏုဇီဝများမှာ .....

 ▪️ လက်တစ်အက်စစ်ဘက်တီးရီးယား (Lactic acid bacteria)

 ▪️ တဆေးမှိုများ (Yeast)

 ▪️ ဖိုတိုဆင်သက်တစ်ဘက်တီးရီးယား (Photosynthetic bacteria)

 ▪️ အက်တီနိုမိုက်ဆိဘက်တီးရီးယား (Actinomyces bacteria)

 ▪️ အပင်အကြွင်းအကျန်များကို လျင်မြန်စွာဆွေးမြေ့စေသောမှိုများ ဖြစ်ကြပါသည်။

🔸အီးအမ်ထဲတွင် သီးနှံပင်အတွက် လေထဲမှနိုက်ထရိုဂျင်ကို ဖမ်းယူပေးသော အဏုဇီဝများ၊ အစာနှင့် ရေစုပ်ယူမှုကို အားပေးသော အဏုဇီဝများ၊ အပင်အစာချက်မှုကို အားပေးသော အဏုဇီဝများ၊ မြေထဲရှိ ဩဂဲနစ်ပစ္စည်းများ(သီးနှံအကြွင်းအကျန်များ) ကို လျင်မြန်စွာ ချေဖျက်၍ အပင်အတွက် အသုံးဝင်သော အာဟာရဓါတ်များထုတ်ပေးသည့် အဏုဇီဝများ၊‌ မြေထဲရှိရောဂါပိုးများကို ရှင်းလင်းပေးသော အဏုဇီဝများ ပါဝင်ပါသည်။

🔸အီးအမ်ကို မြေထဲသို့ထည့်သွင်းပေး၍ သင့်တော်သော အစိုဓါတ်ရှိအောင် ဆောင်ရွက်ပေးပါက အီးအမ်ထဲရှိ အဏုဇီဝများ မြေထဲတွင် ပွားများလာပြီး အထက်ပါအလုပ်များကို လုပ်ဆောင်ပေးခြင်းဖြင့် သီးနှံအထွက်ကို တိုးစေပါသည်။ အီးအမ်သည် သက်ရှိဖြစ်၍ ပွားများနိုင်ပြီး အနည်းငယ်ထည့်ရုံဖြင့် ရေရှည်အကျိုးကျေးဇူး ရရှိနိုင်ပါသည်။ 

🔸အီးအမ်ကို စိုက်ခင်းမြေသို့ထည့်ပေးခြင်း၊ သီးနှံပင်ပေါ်သို့ တိုက်ရိုက်ဖျန်းပေးခြင်း၊ မြေဆွေးအသုံးပြုရာတွင် ထည့်သွင်းအသုံးပြုခြင်းဖြင့် သီးနှံများ၏အထွက်နှုန်းနှင့် အရည်အသွေးကို တိုးတက်ကောင်းမွန်စေပါသည်။ ရောဂါနှင့် ပိုးမွှားကျရောက်မှုကိုလည်း ကာကွယ်ပေးပါသည်။ အီးအမ်ဖြင့် မြေဩဇာအမျိုးမျိုးအပြင် ပိုးသတ်ဆေး၊ ရောဂါသတ်ဆေးများလည်း ပြုလုပ်နိုင်ပါကြောင်း စိုက်ပျိုးရေးဗဟုသုတအဖြစ်တင်ပြအပ်ပါသည်။

Sources : ဆရာပါမောက္ခဒေါက်တာမြင့်လွင် (သဘာဝမြေဆွေးများပြုလုပ်သုံးစွဲနည်း)