အမည် - သင်္ဘောသီး(Papaya)

🍀🍀🍀🍀🍀🍀🍀🍀🍀🍀

🍀စိုက်ပျိုးနိုင်သည့်ဒေသများ🍀

သင်္ဘောပင်သည်အပူပိုင်းစာသုံးသီးပင်ဖြစ်၍အပူပိုင်းနှင့်အပူလျော့ပိုင်းဒေသရှိတိုင်းပြည်များတွင်စိုက်ပျိုးကြပါသည်။ မြန်မာနိုင်ငံတွင်လည်းနေရာအနှံ့အပြားတွင်စိုက်ပျိုးကြပါသည်။

🍀စိုက်ပျိုးသည့်မျိုးများ🍀

သင်္ဘောတွင်အဖိုပင်၊အမပင်နှင့်လိင်စုံပင်ဟူ၍ အဓိကသုံးမျိုးရှိပါသည်။ အဖိုပင်မှအသီးသီးသည်ကို တွေ့ရခဲယင်းလှပါသည်။အမနှင့်လိင်စုံပင်များမှသာအသီးသီးလေ့ရှိပါသည်။ အဖိုပင်- အဖိုပင်မှာများသောအားဖြင့်ပန်းပွင့်စောထွက်လေ့ရှိပြီးအခိုင်လိုက်ပွင့်ပါသည်။အဖိုပင်မှပုံမှန်အားဖြင့်အသီးသီးလေ့မရှိသော်လည်းအပင်ကိုထိခိုက်ဒဏ်ရာရခြင်း ထိပ်ပိုင်းဖြတ်ပေးခြင်းဖြင့်အဖိုပွင့်များကြားတွင် အမပွင့်များပြောင်းလာကာအသီးငယ်များသီးလာတတ်သည်။ဤအပင်ကို သင်္ဘောပဒေသာပင် ဟုခေါ်သည်။ အမပင်- အမပင်သည် ပွင့်၍ပွင့်သီးလေ့ရှိသည်။ ထိုကြောင့်မျိုးအောင်ရန်အတွက်အခြားအပင်မှ ဝတ်မှုံကူးပေး ရသည်။ ရာသီဥတုမြေပြောင်းလဲခြင်းကြောင့်အပွင့်သဘာဝပုံသဏ္ဍန်ပြောင်းလဲမှုမရှိပေ။ လိင်စုံပင် - အပွင့်ပွင့်ရာတွင်ပွင်တံတစ်ခုမှအပွင့်နှစ်ပွင့်သုံးပွင့် ပွင့်တတ်သည်။ အပွင့်များတွင်အဖိုပွင့်နှင့် အမပွင့် များရောပါတတ်သည်။

🍀သင်္ဘောပင်ပျိုးထောင်နည်း🍀

သင်္ဘောပင်ပျိုးထောင်ရန်အတွက် ပျိုးဘောင်၊ ပျိုးခင်း၊ ပလတ်စတစ်အိတ် စသည်တို့ကိုအသုံးပြု နိုင်ပါသည်။ ပျိုးထောင်မည့်မြေသည် နွားချေးဆွေး၊ သဲ၊ မြေကြီးတို့ကိုဆတူရောမွှေထားသော မြေမျိုး ဖြစ်ရပါမည်။ သင်္ဘောစေ့ကိုပျိုးထောင်ရာတွင်မြေနက်နက်ဖုံးမိလျှင် အစေ့ပုတ်သွားပြီး အပင်ပေါက် ညံ့ဖျင်းတတ်သည်။ အစေ့ကိုမြေပါးပါးလောက်ပဲဖုံးပါ။ အပေါ်မှကောက်ရိုးပါးပါးဖုံးအုပ်ထားပါ။ ရေလောင်းပေးပါ။ ကောက်ရိုးပါးပါးအုပ်ထားပါမှ ရေလောင်းသည့်အခါအစေ့များပေါ်မလာအောင် ထိန်းပေးရင် အပူဒဏ်လည်းကာကွယ်ပေးနိုင်ပါသည်။ သင်္ဘောပျိုးထောင်သူတချို့ကပျိုးထောင်ရာတွင်သွပ်ပြားကိုအောက်ခံပြီးမှယင်းအပေါ်မြေသား လေးလက်မခန့်အထူထည့်၍ပျိုးထောင်လေ့ရှိသည်။ ထိုအခါ အဖိုသည်အမပင်ထက်ပိုမိုသန်စွမ်း သောကြောင့်အမြစ်သည်အောက်တွင်ခံထားသောသွပ်ပြားနှင့်မြန်မြန်ထိလွယ်ပေရာပြောင်းရွှေ့စိုက်ပျိုး ချိန်တွင်အဖိုပင်များသည်ညှိုးနွမ်းလေ့ရှိသည်။ အဖိုပင်နှင့်အမပင်ခွဲခြားရာတွင်ဤနည်းကိုအများဆုံး အသုံးပြုကြသည်။ ပျိုးသက်တစ်လခွဲမှနှစ်လသားခန့်ရှိလျှင်စိုက်ခင်းသို့ပြောင်းရွေ့စိုက်ပျိုးနိုင်ပါသည်။ ပျိုးအိပ်ဖြင့်လည်းတစ်ပင်ချင်းစီပျိုးနိုင်ပါသည်။

🍀မြေပြုပြင်နည်း🍀

စိုက်ကျင်းတူးမည့်နေရာသည် ရေမဝပ်နိုင်သောနေရာဖြစ်ရမည်။ စိုက်ကျင်းတစ်ကျင်းနှင့်တစ်ကျင်း အကွာအဝေးမှာမျိုးကိုလိုက်၍ (၈-၁၂)ပေအထိထားသင့်သည်။ မိုးများသောဒေသများတွင် တစ်ပေ ပတ်လည် ကျင်းတူးသင့်သည်။ စိုက်ကျင်းတစ်ကျင်းတွင်နွားချေးဆွေး (သို့မဟုတ်) သစ်ရွက်ဆွေး မြေသြဇာ စသည့် သဘာဝမြေသြဇာများကိုခွဲတောင်းတစ်လုံးခန့်ထည့်ပေးသည်။ သင်္ဘောပင်ကို စိုက်ပျိုးရာတွင်လေးကွက်ကျားစနစ်ဖြင့်စိုက်ပါကအပင်အရေအတွက် ၁၅ ရာခိုင်နှုန်းပိုဝင်ဆံ့သည်။ လေးကွက်ကျားစနစ်ဖြင့် ၈ပေ × ၈ပေ အကွာစိုက်ပါကတစ်ဧကတွင်သင်္ဘောပင် (၆၈၀)ခန့်ဝင်၍ ၁၂ပေ × ၁၂ပေ အကွာစိုက်လျှင်တစ်ဧကတွင် (၃၀၁)ပင်ဝင်ဆံ့ပါမည်။

🍀ရွေ့ပြောင်းစိုက်ပျိုးနည်း🍀

အသင့်ပြင်ထားသောစိုက်ကျင်းများ၌ လိင်စုံပင်များကိုတစ်ကျင်းလျှင် တစ်ပင်ကျစိုက်၍ အဖိုအမ မသေချာသည့်ရိုးရိုးပင်ဖြစ်ပါကတစ်ကျင်းလျှင် နှစ်ပင်ကျ စိုက်ရမည်။ စိုက်ပြီးလျှင်ရေကိုဝအောင် လောင်းပေးရသည်။ပျိုးမထောင်ပဲအပင်ကိုတိုက်ရိုက်စိုက်မည်ဆိုလျှငိစိုက်ကျင်းထဲသို့အစေ့များထည့်၍ စိုက်ပျိုးရသည်။ စီးပွားဖြစ်စိုက်ခင်းအနေဖြင့်စိုက်ပါကဝတ်မှုံကူးရန်အတွက် အမပင်(၂၀)ပင် လျှင် အဖို တစ်ပင်နှုန်းထားပေးရသည်။ ရေလုံးဝမဝပ်စေရန်အထူးသတိထားရပါမည်။

🍀မြေသြဇာကျွေးနည်း🍀

ရွှေ့ပြောင်းစိုက်ပြီးအမြစ်စွဲသည့် အချိန်မှစ၍ (၆)လတစ်ကြိမ်ခန့် စိုက်ကျင်းတစ်ကျင်းလျှင် နွားချေးဆွေး တစ်တောင်းခန့် ကျွေးရပါမည်။ နွားချေးဆွေးမြေသြဇာကျွေးချိန်တွင်တစ်ဧကလျှင် ယူရီးယား (၁၂၀) ပေါင် တီစူပါ(၂၄၀)ပေါင်နှင့် ပိုတက်ရှ် (၂၄၀)ပေါင်နှုန်းကျွေးပေးရပါမည်။ ဓာက်မြေသြဇာများကျွေးရာ တွင်အမြစ်များသွားသည့်အကွာအဝေးအထိအနှံ့ ပက်ကြဲ ပေးရသည်။ အမြစ်များသည်အပင်အမြင့်ထက် ပို၍ရှည်အောင်သွားနိုင်ကြသည်။ ဓာက်မြေသြဇာကျွေးပြီးချိန်တွင် ရေဝအောင်‌လောင်းပေးရသည်။ မဂ္ဂနီစီယမ်ချို့တည့်သောမြေများတွင်သင်္ဘောပင်အောက်ရွက်များဝါကျင်ခြင်း၊အသီးတွင်သကြားဓာတ်နည်းသွားခြင်းနှင့်အနံအရသာသိသိသာသာညံ့ဖျင်းသွားခြင်းတို့ဖြစ်တတ်သည်။ ထိုသို့မဂ္ဂနီစီယမ်ဓာတ်ချို့တည့်မှုဖြစ်ပါက မဂ္ဂနီစီယမ်ဆာလဖိတ် (ဓာတ်ဆား)ကို ရေဖျော်၍အရွက်များပေါ်နှံ့အောင် ဖျန်းပေးရပါမည်။

🍀ဆွတ်ခူးခြင်းနှင့်အထွက်🍀

စိုက်ခင်းသို့ပြောင်းရွေ့စိုက်ပျိုးပြီးလေးငါးလကြာလျှင်ပန်းစပွင့်၍ခြောက်လကြာလျှင်အသီးစတင်သီး ပါသည်။ သုံးနှစ်သားအရွယ်ထိအသီးအထွက်ကောင်းသည်။ မျိုးကိုလိုက်၍တစ်ပင်လျှင်အသီး (၅၀) မှ (၁၀၀)အထိ သီးနိုင်သည်။ သင်္ဘောပင်များကိုလေးကွက်ကျားစနစ်ဖြင့်စိုက်ပါကသင်္ဘောတစ်ပင်သည် ပျမ်းမျှ(၇၀)ခန့်သီးလျှင် တစ်ဧကမှ အသီးပေါင်း(၄၇,၆၀၀)ခန့် ရနိုင်ပါသည်။

🍀စစ်မှန် ပြည့်ဝ ဝိစာရ🍀

Sources : သစ်သီးဝလံများစိုက်ပျိုးနည်း