🔸တောင်သူဦးကြီးများနှင့်ဥယျဉ်ခြံစိုက်ပျိုးသူများအတွက်ငှက်ပျောပင်စိုက်ပျိုးလျှင်အောင်မြင်ဖြစ်ထွန်းပြီး အသီးအရည်အသွေးကောင်းအောင် အစာကျွေးပြီးဆောင်ရွက်ရမည့်အချက်များကိုတင်ပြလိုပါသည်။

 🔸ငှက်ပျောပင်များစိုက်ပျိုးပြီးစနစ်တကျအစာမကျွေးနိုင်ပါက ငှက်ပျောပင်များအပင်ကြီးထွားနှုန်းနှေးခြင်း၊ အရွက်ဟောင်းများဝါလိုက်လာတတ်ခြင်း၊ ငှက်ပျောသီးအရည်အသွေးကျခြင်းများဖြစ်လာတတ်ပါသည်။ ထိုကဲ့သို့ဖြစ်လျှင်အစာ စနစ်တကျကျွေး၍ပြုပြင်ထိန်းကျောင်းရပါမည်။ ငှက်ပျောပင်သည် ပိုတက်စီယမ် အလွန်စားသုံးသည့်အပင်အမျိုးအစားဖြစ်ပါသည်။ ငှက်ပျောစိုက်ခင်းတစ်ဟက်တာ (၂.၅ ဧကခန့်)တွင် နိုက်ထရိုဂျင် ၃၈၈ ကီလိုဂရမ်၊ ဖော့စ်ပရပ် ၅၂ ကီလိုဂရမ်၊ ပိုတက်စီယမ် ၁,၄၃၈ ကီလိုဂရမ် စားသုံးသည်ဟု သုတေသနမှတ်တမ်းများအရသိရပါသည်။ (N: P: K) အချိုးအရဆိုလျှင်(၈: ၁: ၂၉) စားသုံးတာကိုတွေ့ရပါသည်။

 🔸ထို့ကြောင့်ငှက်ပျောပင်များ ပိုတက်စီယမ်ဓာတ်ထည့်မကျွေးလို့ပိုတက်စီယမ်ချို့တဲ့ရင်ရောဂါအမျိုးမျိုး ဝင်လာပြီးငှက်ပျောခြံပါပြုတ်သွားနိုင်ပါသည်။ ငှက်ပျောရဲ့နောက်ထူးခြားတဲ့အချက်တစ်ချက်က ဆိုဒီယမ်ဓာတ် နှင့် မဂ္ဂနီစီယမ်ဓာတ်အနည်းငယ်စားသုံးမှုရှိခြင်းဖြစ်ပါသည်။ ဆိုဒီယမ်ဓာတ်အတွက် ငှက်ပျောတစ်ပင်မှာ အိမ်သုံးဆားတစ်ဇွန်းကျွေးပေးရန်လိုအပ်ပါသည်။ မဂ္ဂနီစီယမ်ဓာတ်အတွက် ငှက်ပျောတစ်ပင်လျှင် မဂ္ဂနီစီယမ်ဆာလ်ဖိတ် (ဆားခါး) တစ်ဇွန်းကျွေးပေးရပါမည်။

 🔸ငှက်ပျောပင်ကို တစ်နှစ်လျှင်‌မြေဩဇာနှစ်ကြိမ်ကျွေးသင့်ပါသည်။နိုက်ထရိုဂျင်အတွက်ယူရီးယား ကျွေးမည်ဆိုပါက လေလွင့်ဆုံးရှုံးမှုနည်းပါးအောင် အပင်ခြေကိုကြဲပက်မကျွေးပဲ ငှက်ပျောရုံ ပတ်ပတ်လည် နှင့် ငှက်ပျောရုံအလယ်တွင် ၃ လက်မ x ၆လက်မ x ၆လက်မ အရွယ်ကျင်းများတူးပြီး ကျင်းဖောက်ကျွေးပေးသင့်ပါသည်။ ငှက်ပျောပင်စိုက်ပြီးနှစ်လသားတွင်အစာစကျွေးရန်လိုပါသည်။ အစာကျွေးချိန်နောက်ကျလျှင်ငှက်ပျောပင်ကြီးထွားမှုနှေးကွေးပြီး၊ အထွက်နှုန်းနှင့်အရည်အသွေး ကျဆင်းစေပါမည်။ ထို့ပြင်ငှက်ပျောကို ပိုတက်စီယမ်ဓာတ်အစားများသော အခြားသီးနှံများနှင့်သီးညှပ် မစိုက်သင့်ကြောင်း ဂရုပြုရပါမည်။ 

အောင်ဆန်း (စိုက်ပျိုးရေး)