🌾🌱🌾🌱🌾🌱🌾🌱🌾🌱🌾

🔸ပူပြင်းမှုလွန်ကဲသောနွေရာသီကာလကုန်ဆုံးလျှင် မိုးရာသီရောက်တော့မည်။ မိုး၏ရှေ့ပြေးအဖြစ် လေပြင်းတိုက်ခတ်မှု၊ မိုးတိမ်တောင်များကြောင့် လေနှင့်အတူမိုးသီးများကျရောက်မှုများဖြစ်ပေါ်တတ် ပါသည်။ မိုးရာသီဝင်လျှင်မုန်တိုင်းလာနိုင်သည်။ မိုးကြီး၍ရေကြီးရေလျှံမှုများလည်းကြုံရတတ်ပါသည်။ ဤသို့ရာသီဥတုဖောက်ပြန်မှုများသည် သီးနှံစိုက်ပျိုးရေးအတွက် အားတက်နိုင်စရာမရှိနိုင်ပါ။

🔸ရေရှားပါးပြီးနေပူရှိန်ပြင်းထန်လျှင် သီးနှံစိုက်ခင်းများဖြစ်ထွန်းအောင်မြင်မှုနည်းပါးသကဲ့သို့ မိုးများစွာ ရွာပြီးရေကြီးရေလျှံလျှင်လည်း သီးနှံစိုက်ပျိုးမှုကို ဂရုပြုလုပ်ဆောင်ကြရပါမည်။ ပုံမှန်မိုးရွာသွန်း၍ မိုးရေရရှိမှုသည် မြေဆီလွှာစွတ်စိုမှုကိန်းအောင်း၍ဖြစ်စေ၊ မြေ၏ဆွဲအားကြောင့်မြေကြီးအောက်ထဲသို့ ရေဓာတ်စိမ့်ဝင်ကျဆင်း၍ဖြစ်စေ၊ အောက်ခံရေပြင်အဖြစ်နှင့်တည်ရှိနေသဖြင့် သီးနှံပင်မှရေရရှိနိုင်သည်။

🔸သို့သော်ပုံမှန်မဟုတ်သော မိုးရွာမှုမှရရှိသည့်မိုးရေအများစုသည်သီးနှံစိုက်ပျိုးရေးအတွက်ကောင်းကျိုး မပေးသဖြင့်စိုက်ခင်းထဲမှရေထုတ်ပစ်ကြရသည်။ မြေနိမ့်ရာသို့ရေပိုရေလျှံများ စီးဆင်းစေခြင်းဖြင့် ရေကြီး ရေလွှမ်းမဖြစ်ရန်ပြုလုပ်ကြရသည်။ မြေပေါ်မြောင်းများဖြင့်လည်းရေထုတ်ကြရပြီး ရေထုတ်မြောင်း (သို့မဟုတ်) ရေနုတ်မြောင်း ဟုခေါ်ကြသည်။

🔸ဆည်ရေလှောင်တမံ မြစ်ရေတင်စသည့်မြေပေါ်ရေပေးမြောင်းစနစ်များတွင်လည်း ရေပေးမြောင်းနှင့် အတူ ရေနုတ်မြောင်းကိုလည်းထားရှိကြရသည်။ ရေဆိုးမြောင်း၊ ရေပိုရေလျှံမြောင်းများ ဖြစ်ကြသည်။ ဆည်မြောင်းလက်တံများ၏အဖျားပိုင်းအဆုံးနေရာများတွင် ရေပိုရေလျှံများစုစည်းထားသည့် ရေအိုင်၊ ချိုင့်ဝှမ်းများရှိကြသည်။ 

🔸သီးနှံစိုက်ပျိုးရေးအတွက်ဖြစ်စေ၊ ဒေသရေရရှိရေးအတွက်ဖြစ်စေ ရေပေးရန် ရေရရှိရန်ကိုသာ ဦးစားပေး လုပ်ကိုင်ကြလေ့ရှိသည်။ ရေပိုရေလျှံရေထုတ် မြောင်းများ ပြုလုပ်မှုကို အလေးမထား ချန်လှပ်ထားကြသည်က များသည်။ ရာသီဥတုဖောက်ပြန်၍မိုးများလျှင်ရေများသည်။ ရေနုတ်မြောင်းမရှိ၍ရေများစွာမှာ မြို့ရွာများအပေါ်မှဖြစ်စေ၊ ဆက်သွယ်ရေးလမ်းများပေါ်မှဖြစ်စေ၊ သီးနှံစိုက်ခင်းများအတွင်းမှဖြစ်စေ ဖြတ်သန်းစီးဆင်းသွားသဖြင့် ပျက်စီးမှုများကြုံကြရသည်။

🔸ထို့ကြောင့် မိုးသံလေသံမကြားမီကာလမှစ၍ မြင့်ရာမှနိမ့်ရာသို့ ရေစီးဆင်းနိုင်သော ရေနုတ်မြောင်းများ ကြိုတင်ပြုလုပ်ပေးကြရပါမည်။ ဒေသအလိုက်ရေကြီးရေလွှမ်းမှုကြုံတွေ့ဖူးသောနေရာများအလိုက် ရေနုတ်မြောင်းများပြုလုပ်၍ ရေစီးရေလာကောင်းအောင်ဆောင်ရွက်မှသာ ရေကြီးရေလွှမ်းမှုကြောင့် သီးနှံစိုက်ခင်းများပျက်စီးမှုကင်းပါမည်။

🔸စစ်မှန် ပြည့်ဝ ဝိစာရ🔸

Sources : ကိုရဲ (စိုက်ပျိုးရေး)