menu

ကြက်သွန်ဖြူ စိုက်ပျိုးနည်း


🎋🧄🎋🧄🎋🧄🎋🧄🎋🧄🎋 

မြန်မာအမည် - ကြက်သွန်ဖြူ 

အင်္ဂလိပ်အမည် - Garlic 

ရုက္ခဗေဒအမည် - Allium sativum 

မျိုးရင်းအမည် - AMARYLLIDACEAE 

၁ ။ မူရင်းဒေသ 

ကြက်သွန်ဖြူ၏မွန်ရင်းဒေသမှာ အိန္ဒိယနိုင်ငံအနောက်မြောက်ပိုင်း၊ တရုတ်နိုင်ငံတောင်ပိုင်း၊ အာဖဂန်နစ္စတန်နိုင်ငံတို့ ဖြစ်ပါသည်။ 

၂ ။ ရေမြေနှင့် ရာသီဥတု 

ကြက်သွန်ဖြူသည် ရေအလွန်လိုအပ်သော သီးနှံဖြစ်သည်။ ထို့ကြောင့်အစိုဓာတ်ရှိသော မြေမျိုးဖြစ်ပါက မြေအတော်များများတွင် စိုက်ပျိုးနိုင်ပါသည်။ မြေဩဇာ နှင့် အစိုဓာတ်လုံလောက်စွာပေးရန်လိုအပ်ပါ သည်။ pH (၅.၅ - ၆) ရှိသောမြေမျိုးကိုနှစ်သက်ပါသည်။ မြေအချဉ်အငံဓာတ် မြင့်မားသောမြေမျိုးကို ကြိုက်နှစ်သက်မှု မရှိပါ။ အပူအအေးသင့်တင့်သော ရာသီဥတုမျိုးကို ကြိုက်နှစ်သက်ပါသည်။ သာမန်အားဖြင့် အောက်တိုဘာ၊ နိုဝင်ဘာလလယ်လောက်တွင် စိုက်ပျိုးလေ့ရှိကြပါသည်။ နေ့တာရှည်ခြင်းသည် ဥဖြစ်ပေါ်မှုကို အားပေးသည်။ အပင်ကြီးထွားဖွံ့ဖြိုးမှုအတွက် အသင့်တော်ဆုံးအပူချိန်မှာ(၁၈ - ၂၀) ဒီဂရီစင်တီဂရိတ်တွင် ဖြစ်ထွန်းပြီး ဥမှအညှောက်ပေါက်ရန်အတွက် (၂၂ - ၂၃) ဒီဂရီစင်တီဂရိတ် မြေတွင်းအပူချိန်လိုအပ်ပါသည်။ (၂၇) ဒီဂရီစင်တီဂရိတ်ထက်မြင့်ပါက အပင်ကြီးထွားမှုညံ့စေပါသည်။ 

၃ ။ လက်ရှိစိုက်ပျိုးလျှက်ရှိသောမျိုးများ

(က) ရှမ်းပြည်မြောက်ပိုင်းဒေသများတွင်အများဆုံးစိုက်ပျိုးကြသည့် ဒေသအခေါ် အခွံအနီမျိုးဖြစ်သည်။ ကြက်သွန်ဖြူဥ အရွယ်အစားမှာ အမွှာပိုကြီးပြီး အခွံအနီရောင်မျိုးဖြစ်ပါသည်။ 

(ခ) ရှမ်းပြည်တောင်ပိုင်းဒေသများတွင်အများဆုံးစိုက်ပျိုးကြသည့် ရှမ်းတောင်မျိုး ဖြစ်ပါသည်။ ကြက်သွန်ဖြူဥ အရွယ်အစားမှာ အနည်းငယ်အမွှာသေးပြီး အခွံအဖြူရောင်မျိုးဖြစ်ပါသည်။ 

၄ ။ မျိုးစေ့နှုန်း 

တစ်ဧကလျှင် ကြက်သွန်ဖြူဥ ပိဿာ (၂၅၀ - ၃၀၀) ခန့်လိုအပ်ပါသည်။ 

၅ ။ မြေဩဇာနှုန်းထား 

စိုက်ပျိုးသောမြေအခြေအနေပေါ်မူတည်၍ မြေဩဇာနှုန်းထားကွာခြားပါသည်။ တစ်ဧကအတွက် လိုအပ်သော မြေဩဇာမှာ နွားချေး(၅-၁၀)တန်၊ ယူရီးယား (၂၂၄)ပေါင်၊ တီစူပါ(၂၂၄)ပေါင်၊ ပိုတက်ရှ် (၁၁၂)ပေါင် ဖြစ်ပါသည်။ တီစူပါနှင့် ပိုတက်ရှ်ကို နွားချေးနှင့်အတူ မြေပြင်ချိန်တွင် ထည့်ပေးရပါမည်။ ယူရီးယားကို စိုက်ပြီး(၂)ပတ်သားအရွယ်မှစ၍ အပင်(၂)လသားအရွယ်အထိ (၄)ကြိမ်ခွဲ၍ထည့်ပေးရပါမည်။ 

၆ ။ မြေပြုပြင်ခြင်း 

မြေပြုပြင်ချိန်တွင် ပေါင်းနှိမ်နင်းရန်အတွက် ထယ်တစ်စပ်ထိုးပြီးထွန်ရေးညက်အောင် ကြမ်းတုံးရိုက်၍ ဘောင်ဖေါ်စိုက်ပျိုးလေ့ရှိပါသည်။ 

၇ ။ စိုက်ပျိုးခြင်း 

ဘောင်အမြင့်(၈)လက်မ၊ အကျယ်(၃)ပေခန့်ထားပေး၍ ဘောင်ဖေါ်စိုက်ပျိုးလေ့ရှိသည်။ ဘောင်ပေါ်တွင် တစ်ပင်နှင့်တစ်ပင် (၂)လက်မ၊ တစ်တန်းနှင့်တစ်တန်း(၄)လက်မ ခွာ၍စိုက်ပျိုးရပါသည်။ 

၈ ။ အပင်ပြုစုခြင်း 

ကြက်သွန်ဖြူအောင်မြင်ဖြစ်ထွန်းရန်အတွက် ပေါင်းနှိမ်နင်းခြင်းလုပ်ငန်းသည်အထူးအရေးကြီးပါသည်။ စိုက်ပြီးတစ်ပတ်အကြာမှစတင်၍ တစ်ပတ်တစ်ကြိမ်ပေါင်းနှိမ်နင်းပေးရန်လိုပါသည်။ အပင်(၂)လသား အရွယ်အထိ ပေါင်းနှိမ်နင်းခြင်းကို ဂရုစိုက်၍ပြုလုပ်ပေးရပါမည်။ ပေါင်းလိုက်ပြီးတိုင်းရေသွင်း၍ ပုလဲ ဓာတ်မြေဩဇာကို ထည့်သွင်းပေးရပါမည်။ မြေအလွန်ကြပ်နေပါက နွားချေးမြေဆွေးထပ်မံထည့်ပေးရပါမည်။ 

၉ ။ ရေသွင်းခြင်း 

သာမန်အားဖြင့် တစ်ပတ်လျှင်တစ်ကြိမ်ပေးသွင်းရပါမည်။ ရာသီဥတုပူပြင်းပါက (၄-၅)ရက် တစ်ကြိမ် ရေပေးသွင်းရမည်။ အပင်(၂)လသား အပင်အမြင့်(၁.၅)ပေ ရှိချိန်တွင် ရေသွင်းခြင်းကိုလုံးဝရပ်လိုက်ရပါမည်။ 

၁၀ ။ ပိုးမွှား ရောဂါ ကာကွယ်ခြင်း

ကြက်သွန်ဖြူတွင် လှေးပိုး နှင့် ပျပိုးများကျရောက်တတ်ပြီး အေမီဒါ၊ ကေလာ၊ ပရိုဆင့် ပိုးသတ်ဆေးများ မှတစ်မျိုးမျိုးဖြင့် ကာကွယ်နှိမ်နင်းနိုင်ပါသည်။မှိုရောဂါအနေဖြင့် တောက်တဲ့မြီးရောဂါ အဓိကကျရောက်ပြီး ကာဗာ၊ ဟက်ဇာဂွန် မှိုဆေးတစ်မျိုးမျိုးဖြင့်ကာကွယ်နိုင်ပါသည်။ 

၁၁ ။ နှုတ်သိမ်းခြင်း နှင့် အထွက်

အပင်သက်တမ်း(၁၃၅ - ၁၅၀)ရက်ရှိပါသည်။ ကြက်သွန်ဖြူပင် ပင်စည်နှင့်အရွက် (၁၅-၂၅)ရာခိုင်နှုန်းခန့် ဝါလာလျှင် (သို့မဟုတ်) ခြောက်လာလျှင် အပင်ကိုလက်ဖြင့်ဆွဲနုတ်၍သိမ်းယူနိုင်ပါသည်။ မျိုးအတွက် ထားပါက အပင်လိုက်လက်တစ်ဆုတ်စာခန့် စည်း၍ ဝါးတန်းပေါ်တွင် အခြောက်ခံထားရပါမည်။ နှုတ်ယူပြီးသောအပင်များကို အမြိတ်များဖြတ်တောက်၍ နေနှစ်ရက်ခန့်လှမ်းထားရပါသည်။ တစ်ဧက လျှင် ကြက်သွန်ဖြူပိဿာချိန် (၁,၅၀၀ - ၃,၀၀၀) အထိ ထွက်နိုင်ပါသည်။ 

🍃စစ်မှန် ပြည့်ဝ ဝိစာရ🍃 

Sources : ဟင်းသီးဟင်းရွက်စိုက်ပျိုးနည်း