🍃🍆🍃🍆🍃🍆🍃🍆🍃🍆🍃

မြန်မာအမည် - ခရမ်း

အင်္ဂလိပ်အမည် - EGG PLANT ; BRINJAL

ရုက္ခဗေဒအမည် - Solanum melongena

မျိုးရင်းအမည် - SOLANACEAE

၁ ။ မူရင်းဒေသ

--------------

 အိန္ဒိယနိုင်ငံဖြစ်သည်။

၂ ။ စိုက်ပျိုးသည့်ဒေသ

--------------------

မြန်မာနိုင်ငံတွင်အလွန်အေးသော တောင်ပေါ်ဒေသမှလွဲ၍ ကျန်ဒေသတွင်စိုက်ပျိုးဖြစ်ထွန်းနိုင်သည်။

၃ ။ အမျိုးအစား

--------------

ပင်ထောင်(Up right) တစ်ဝက်ပြန့်(Semi-Spread) နှင့် ပင်ပြန့်(Spread type) ဟူ၍ အုပ်စုသုံးခုရှိ ပါသည်။ အသက်လျင်သောမျိုးများသည် ပင်ပြန့်မျိုးများဖြစ်၍ သက်ကြီးမျိုးများသည်ပင်ထောင်မျိုးများ ဖြစ်ပါသည်။ ပထမဦးဆုံးပန်းပွင့်သည်အဆစ်နံပါတ်(၆ မှ ၁၄) ဆစ်အတွင်းဖြစ်ပေါ်နိုင်သည်။ မြန်မာနိုင်ငံတွင် ခရမ်းကိုအကြမ်းအားဖြင့် သုံးမျိုးခွဲခြား၍စိုက်ပျိုးလေ့ရှိရာ အရှည်မျိုးကိုဆင်စွယ်ခရမ်း ဟုခေါ်သည်။ ရှည်၍ ခရမ်းရောင်၊ အစိမ်းရောင်ရှိသည်။ အလုံးမျိုးတွင်လုံးဝိုင်းသောသဏ္ဍာန်ရှိ၍ ခရမ်း၊ အစိမ်း၊ အဖြူရောင်ရှိသည်။ လုံးရှည်မျိုးတွင်ထောပတ်ခရမ်းကို စိုက်ပျိုးလေ့ရှိပါသည်။

၄ ။ မြေအမျိုးအစား

-----------------

ရေသွင်း ရေထုတ်လွယ်ကူသည့်မြေဩဇာကောင်းမွန်သော သဲနုန်းမြေကိုနှစ်သက်သည်။ အာဟာရဓာတ် အလွန်စားသုံးသောသီးနှံဖြစ်ခြင်းကြောင့် မြေဆီဩဇာထက်သန်သောမြေကို နှစ်သက်သည်။ pH မှာ (၅.၅ - ၆.၅) အတွင်းပိုမိုဖြစ်ထွန်းနိုင်သည်။

၅ ။ ရာသီဥတု

------------

ပူနွေးသောရာသီဥတုရှည်လိုလားသော အပင်ဖြစ်သည်။ အပူချိန်(၁၃) ဒီဂရီစင်တီဂရိတ်မှ (၂၁) ဒီဂရိစင်တီဂရိတ်တွင်အသင့်တော်ဆုံးဖြစ်သည်။ 

၆ ။ ပျိုးထောင်ခြင်း

----------------

ကောင်းစွာဆွေးမြေ့သောနွားချေး၊ သစ်ရွက်စိမ်းမြေဩဇာများအသုံးပြု၍ (၃)ပေအကျယ် (၃၀)ပေအရှည်ဘောင်များပြုလုပ်ပျိုးထောင်နိုင်ပါသည်။ မျိုးစေ့များကိုတစ်တန်းနှင့်တစ်တန်း (၄)လက်မခန့် ခြား၍ပျိုးရပါမည်။ အပင်များကြပ်မနေစေရန် လိုသောပျိုးပင်များနုတ်ပစ်ရမည်။ တစ်ဧက အတွက်မျိုးစေ့(၃၀၀)ဂရမ်နှုန်းဖြင့်စိုက်ပျိုးနိုင်ပါသည်။

၇ ။ မြေပြုပြင်ခြင်း

----------------

ပျိုးထောင်ချိန်တွင်စိုက်ခင်းကိုမြေပြုပြင်ထားရပါမည်။ ထယ်(၃)စပ်မှ (၄)စပ်ထိုး၍ ထွန်ရေးညက်သည် အထိထွန်ပေးရပါမည်။ မျိုးကိုလိုက်၍ပင်ကြား တန်းကြားအကွာအဝေးကွာခြားတတ်သော်လည်း အများအားဖြင့်တန်းကြား (၃-၄)ပေ၊ ပင်ကြား(၂-၃)ပေ ထား၍ရွှေ့ပြောင်းစိုက်စနစ်ဖြင့် စိုက်ပျိုးနိုင်သည်။

၈ ။ စိုက်ပျိုးခြင်း

-------------

ပျိုးပင်များအရွက်(၅)ရွက်ရရှိလျှင် စိုက်ခင်းသို့ရွှေ့စိုက်နိုင်ပါသည်။ သတ်မှတ်ထားသောတန်းကြား ပင်ကြား ဆုံရာကျင်းနေရာများတွင် ညနေခင်းအချိန် ပျိုးဘောင်မှပျိုးပင်များကိုနုတ်ယူ၍ အမြစ် ဖြောင့်တန်းအောင်ချစိုက်ရပါမည်။ စိုက်ချိန်တွင်အစိုဓာတ်လုံလောက်ရပါမည်။ ခြောက်သွေ့ပူပြင်းသော ရာသီတွင်ဖြစ်၍ အပင်များနေပူဒဏ်မှကာကွယ်နိုင်ရန် သစ်ပင်သစ်ကိုင်းများ စိုက်ပေးရမည်။ ပျိုးပင်များ ကောင်းစွာအမြစ်စွဲလျှင် အရိပ်များဖယ်ပေးနိုင်ပါသည်။

၉ ။ မြေဩဇာနှုန်းထားများ

------------------------

တစ်ဧကအတွက် နွားချေး (၁၀)တန်၊ ယူရီးယား (၅၀)ကီလို ၂အိတ်၊ ပိုတက်ရှ် (၅၀)ကီလို ၂အိတ် နှုန်းကို ထည့်သွင်းပေးရမည်ဖြစ်ပြီး ယူရီးယားကို မြေပြင်စဉ် နှင့် စိုက်ပြီးတစ်လ (သို့) နှစ်လ တို့တွင် တစ်အိတ်စီခွဲထည့်ပေးရပါမည်။

၁၀ ။ အပင်ပြုစုနည်း

------------------

ခရမ်းပင်ကို အချိန်မှန်စွာပေါင်းရှင်းပေးခြင်း၊ မိုးစိုက်ခရမ်းဖြစ်ပါက ရေမဝပ်စေရန်မြေတောင်မြှောက်ပေးခြင်း၊ ဘောင်လုံးခြင်းနှင့် ဆောင်းစိုက်ခင်းတွင် အစိုဓာတ်ထိန်းနိုင်ရန် ကောက်ရိုး မြက်ခြောက်များ အုပ်ပေးခြင်း၊ မြေတောင်မြှောက်ချိန်(တစ်လ (သို့) နှစ်လ)တွင် ယူရီးယားနောက်တစ်ကြိမ်ထည့်သွင်း ပေးခြင်း၊ အသီးအလေးချိန်ကြောင့်အပင်ယိုင်လဲမှုများမဖြစ်စေရန် တိုင်ထောင်ပေးခြင်းများပြုလုပ်ပေး ရပါမည်။ ခရမ်းသီးခူးပြီး အသီးထွက်မှုကျသွားသော်လည်း လမိုင်းထားခြင်းဖြင့် အသီးကိုထပ်မံရယူနိုင်ပါသည်။ ပင်ခြေမှ(၃)ဆစ်ခန့်ချန်၍ (၆-၈)လက္မ အမြင့်ခန့်တွင် ပင်စည်ကိုဖြတ်၍ အစာ၊ရေ ထပ်မံဖြည့်တင်းခြင်း ဖြင့် ဖြတ်ပြီးတစ်လတွင် အသီးကို စတင်ခူးနိုင်ပါသည်။ 

၁၁ ။ ပိုးမွှား နှင့်ရောဂါ

--------------------

ခရမ်းခေါင်ညွန့်ထိုးပိုး၊ သီးလုံးဖောက်ပိုးများကျရောက်ဖျက်ဆီးတတ်ပြီး ကျရောက်မှုနည်းပါက လက်နှင့်ကောက်ယူဖျက်ဆီးခြင်း (သို့မဟုတ်) “နိုက်ဝမ်း ၊ အီမာလန်ဒါ” ဆေးတစ်မျိုးမျိုးဖြင့်ပက်ဖျန်းကာကွယ်ပေးနိုင်ပါသည်။ ရောဂါအနေဖြင့် ဘက်တီးရီးယားပင်ညှိုးရောဂါ ကျရောက်မှုရှိပြီး “ကျူပရိုမက်စ်၊ ကာစင်” ဆေးတစ်မျိုးမျိုး (သို့မဟုတ်) အလှည့်ကျဖြင့် ပက်ဖျန်းပေးရပါမည်။

၁၂ ။ ဆွတ်ခူးခြင်း

----------------

အသီးဆွတ်ခူးရန်အချိန်သည်အသီး၏ပုံသဏ္ဍာန်ပေါ်မူတည်ပါသည်။ လုံးဝိုင်းပုံ နှင့် ဘဲဥပုံအသီးများကို ပန်းပွင့်ပြီး(၂၅ - ၃၀)ရက်ကြာလျှင် ဆွတ်ခူးနိုင်ပါသည်။ လုံးရှည်ပုံအသီးတွင် ပန်းပွင့်ပြီး(၃၀)ရက်ကြာ လျှင်ခူးနိုင်ပြီး အသီးရှည်နှင့် အလွန်ရှည်သောအသီးများတွင် ပန်းပွင့်ပြီး (၃၅ - ၄၀)ရက်ကြာလျှင်ခူးနိုင်ပါ သည်။ အသီးရောင်တောက်နေသောအချိန်သည်စားသုံးရန်အနေတော်ဖြစ်ပြီး အရောင်မှိုင်းသွားပါက အသီးရင့်လွန်းပြီးစားသုံးရန်မကောင်းတော့ပါ။ အသီးများပုံမှန်ခူးပေးခြင်းဖြင့်အသီးထွက်နှုန်းကိုများစေနိုင်ပါသည်။တစ်ဧက အထွက်နှုန်းပိဿာချိန် (၆,၀၀၀ - ၈,၀၀၀) အထိရရှိနိုင်ပါသည်။

Sources : ဟင်းသီးဟင်းရွက်စိုက်ပျိုးနည်း