🌿🥜🌿🥜🌿🥜🌿🥜🌿🥜🌿

↗️ဆီထွက်သီးနှံ မြေပဲစိုက်ပျိုးရာတွင် မြေပဲစွယ်ချအားနှင့် အုနှုန်းကောင်းစေရန်အတွက် လိုအပ်သော ကယ်လ်စီယမ်ဓာတ်၊ ဆာလ်ဖာဓာတ် နှင့် ပိုတက်စီယမ်ဓာတ် များအတွက် မော်နီတာဂျစ်ပ်ဆမ် ကျောက်မှုန့် နှင့် ပိုတက်စီယမ်ဓာတ်မြေဩဇာများကိုအသုံးပြုကြရပါသည်။ သို့ပါ၍ မော်နီတာဂျစ်ပ်ဆမ် ကျောက်မှုန့် နှင့် ကုန်ကျစရိတ်လျှော့ချလိုပါကပိုတက်စီယမ်ဓာတ်မြေဩဇာ (သို့မဟုတ်) အစားထိုး စက်ဖွဲပြာ စနစ်တကျသုံးစွဲနိုင်ပါရန်ရေးသားတင်ပြအပ်ပါသည်။ 

↗️မြေပဲပင်တွင်အောက်ခြေအဆစ် ၄-၅ဆစ်မှကိုင်းများ၏အဆစ်များမှပွင့်တံထွက်ပါသည်။ ပွင့်တံထွက်ပြီး ထိပ်မှာပန်းပွင့်ပါသည်။ ပန်းပွင့်သန္ဓေအောင်ပြီးလျှင်စွယ်ဖြစ်သွားသည်။ ၎င်းစွယ်သည်မြေကြီး ထဲသို့ ဝင်သွားပြီးစွယ်ထိပ်မှာမြေပဲတောင့်ဖြစ်ပြီး တဖြည်းဖြည်းကြီးထွားလာခြင်းဖြစ်သည်။ ထိုမြေပဲတောင့် ဖြစ်ရန် ပိုတက်စီယမ်ဓာတ်လိုပါသည်။ မြေကြီးအတွင်းမြေဆီဩဇာကြွယ်ဝ၍ ပိုတက်စီယမ်ဓာတ် အလုံအလောက်ရှိနေပါက မြေပဲပင်အမြစ်တွေကစုပ်ယူပြီးအရွက်မှတစ်ဆင့်စွယ်တွေဆီပို့ပေးပါသည်။ မြေကြီးတွင်းအာဟာရဓာတ်မလုံလောက်ပါက မြေပဲကမအုတော့ဘဲ လုံးပိန်လုံးညှပ်ဖြစ်သွားတတ်သည်။

↗️ထို့ကြောင့် ပိုတက်စီယမ်မြေဩဇာ (သို့) စက်ဖွဲပြာကိုပန်းမပွင့်မီအချိန်မှာမြေပဲစိုက်မြောင်းထဲကိုထည့်ပေး ရပါမည်။ စက်ဖွဲပြာအသုံးပြုပါက တစ်ဧကလျှင် လှည်း(၃-၅)စီးနှုန်းသုံးပေးရပါမည်။ စက်ဖွဲပြာကို မြေပဲ စိုက်မြောင်းအတွင်းဖြူးချပေးပြီး ပေါက်ပြားနှင့်အပင်ခြေထဲရောက်အောင်ပြုပြင်ပေးရပါသည်။ သို့မှသာ မြေပဲပန်းပွင့်ပြီးစွယ်ချချိန်တွင် လိုအပ်သောအာဟာရဓာတ်များရရှိနိုင်ပါမည်။

↗️ထို့ပြင် မြေပဲအုအားကောင်းရန်အတွက်လိုအပ်သော ကယ်လ်စီယမ် နှင့် ဆာလ်ဖာဓာတ်တို့အတွက် တစ်ဧကလျှင် ဂျစ်ပ်ဆမ် ကျောက်မှုန့် ပေါင် (၂၀၀)နှုန်း ခန့်ထည့်သွင်းပေးရပါမည်။ သုံးရမည့်အချိန်မှာ မြေပဲပန်းမပွင့်မီ တစ်ပတ်အလိုတွင် စိုက်မြောင်းအတွင်းဖြူးထည့်ပေးပြီး အပင်ခြေထိရောက်အောင် ပြုလုပ်ပေးရပါမည်။ ဂျစ်ပ်ဆမ် ကျောက်မှုန့် ဖြူးပေးသည့်အချိန်တွင်လေထဲလွင့်ပြီး အလေအလွင့်မဖြစ်စေရန် လက်နှင့်ဖြူးပေးသည့်အခါ အောက်ကိုနှိမ့်ပြီးဖြူးပေးရန်အထူးဂရုပြုရပါမည်။

အောင်ဆန်း (စိုက်ပျိုးရေး)

စိုက်ပျိုးရေးရာအကြံပြုချက်များ