🌿🍂🌿🍂🌿🍂🌿🍂🌿🍂🌿

🔸ယခုကာလတွင် မိုးနှမ်းများရိတ်သိမ်းနေပြီဖြစ်၍ နှမ်းထောင်၊ နှမ်းခါအပြီး ရရှိသောကျန်ရစ်သည့် နှမ်းရိုးများကို အကျိုးရှိရှိအသုံးပြုကြရန်လိုအပ်ပါသည်။ နှမ်းစိုက်ခင်းတစ်ဧကမှ နှမ်းထောင်၊ နှမ်းခါပြီး နောက်တွင် နှမ်းရိုးတစ်တန်မှတစ်တန်ခွဲရနိုင်ပါသည်။ ရရှိသောနှမ်းရိုးများသည်မြေဩဇာအဖြစ် သုံးလျှင် စပါးတစ်ဧကစိုက်ခင်း၌ထည့်ပေးနိုင်သည်။

🔸ရေရှိသောစပါးပင်စိုက်တန်းကြားတွင် နှမ်းရိုးများကိုလက်တစ်ဆုပ်စီ စည်းနှောင်ပြီးခြေဖြင့်နင်း၍ မြှုပ်ထားပါ။ ရေပေါ်မပေါ်ဘဲ ရေထဲ၌မြုပ်နေသောနှမ်းရိုးတွင်ရှိသည့် ပိုတက်စီယမ်ဓာတ်သည် စပါးခင်းထဲသို့ရောက်ရှိသွားမည်။ နှမ်းရိုးတွင်ပိုတက်စီယမ်ဓာတ်များစွာပါရှိသည်။ နှမ်းရိုးမဆွေးခင် မြေထဲမြှုပ်နှံထည့်ထားသော်လည်းရေမြုပ်နေပါက သုံးရက်ကြာလျှင် နှမ်းရိုးမှပိုတက်စီယမ်ဓာတ် ထုတ်ပေးသဖြင့် စပါးပင်မှရနိုင်ပါသည်။ 

🔸ပိုတက်စီယမ်သာမက နိုက်ထရိုဂျင်၊ ဖော့စ်ဖိတ်ဓာတ်များလည်းရရှိပြီး သစ်ဆွေးဓာတ်ဖြစ်လာကာ မြေဆီဩဇာကောင်းစေပါသည်။ ဆွေးမြေ့လျှင် နှမ်းရိုးတစ်တန်မှ ယူရီးယားဓာတ်မြေဩဇာ ၂၅ပေါင်၊ တီစူပါဓာတ်မြေဩဇာ ၅ပေါင်၊ ပိုတက်စီယမ်ဓာတ်မြေဩဇာ ၃၅ပေါင်နှင့် ညီမျှသောအပင်အာဟာရ ရရှိနိုင်သည်ဟု စိုက်ပျိုးရေးသုတေသနတွေ့ရှိချက်မှ ဖော်ပြထားပါသည်။ နှမ်းရိုးတွင် နိုက်ထရိုဂျင် ၁.၅ ရာခိုင်နှုန်း၊ ဖော့စ်ဖိတ် ၀.၂၄ ရာခိုင်နှုန်း၊ ပိုတက်ရှ် ၂.၄၀ ရာခိုင်နှုန်း၊ သစ်ဆွေးဓာတ် ၉၆ ရာခိုင်နှုန်းနှင့် ကာဗွန် နိုက်ထရိုဂျင်အချိုး (၃၇ : ၁) ရှိသည်ဟုညွှန်ပြထားသည်။ 

🔸တောင်သူလယ်သမားများစပါးပြီးစပါးနှစ်စဉ်ဆက်တိုက်စိုက်ပျိုးလျှင် စိမ့်ကိုင်သောမြေ၊ နွားများကျွံကျ သည့် ဒုံပေါက်သောမြေများအဖြစ်တချို့ဒေသများတွင်ကြုံတွေ့ကြရသည်။ ဤသို့ဖြစ်သောလယ်မြေများ တွင် သီးနှံတစ်ရာသီလှပ်ထားပြီး နှမ်းရိုးများကိုစိုက်ခင်းထဲသို့ ညီညီညာညာဖြန့်ချပြီး သဘာဝမြေဩဇာ ကျွေးမှု ကို သီးနှံစိုက်ချိန်နှစ်နှစ်ခန့်ဆက်တိုက်သုံးလိုက်သည်နှင့် ပြန်လည်စိုက်ပျိုးနိုင်သောမြေဖြစ်လာနိုင်သည်။ 

🔸ဤသို့သဘာဝမြေဩဇာအဖြစ် မြေကြီးကိုကောင်းလာအောင်ပြုပြင်ပေးနိုင်သောနှမ်းရိုးများကို စုပုံ၍ ပစ်မထားပါနှင့် လယ်ယာကွက်ထဲတွင်နှမ်းရိုးများမီးမရှို့ပါနှင့်။ လူတို့စွန့်ပစ်နေကြသော နှမ်းရိုးသည် အပင်စားသုံးမည့် တန်ဖိုးရှိသောအာဟာရဓာတ်များပါရှိနေသဖြင့် သဘာဝမြေဩဇာပြုလုပ်အသုံးပြုကြသင့်ပါသည်။