🍃🍂🍃🍂🍃🍂🍃🍂🍃🍂🍃

Rust (Uromyces appendiculatus)

ရောဂါကျရောက်မှု လက္ခဏာ

--------------------------

သံချေးရောဂါ၏ယေဘူယျလက္ခဏာမှာ အရွက်နှင့်အသီးတောင့်များပေါ်တွင် နီညိုရောင် အဝိုင်းပုံ အဖုငယ်များဖြစ်ပေါ်ခြင်းဖြစ်သည်။ ၎င်းအဖုငယ်များသည်ပင်အပ်ခေါင်းအရွယ် (သို့) အနည်းငယ်ပို၍ကြီး နိုင်သည်။ ရောဂါဝင်ရောက်ပြီး (၅-၆)ရက်အကြာတွင် တွေ့ရသောကနဦးလက္ခဏာမှာ အနည်းငယ် မို့မောက်သော အဖြူရောင်အဖုငယ်များဖြစ်သည်။ (၇-၉)ရက်ခန့်အကြာတွင်မူ ၎င်းအဖုငယ်များ ပေါက်ထွက်လာပြီး နီညိုရောင် ယူရီဒီယိုစပိုးများ စတင်ထုတ်သည်။ ရက်သတ္တပတ်အနည်းငယ် အကြာတွင် ယူရီဒီယိုစပိုး ထုတ်လုပ်မှုရပ်သွားပြီး အနက်ရောင်တီလီယိုစပိုးများထွက်သည်။ ရောဂါပြင်းထန်လွန်းပါက ရောဂါရအရွက်တစ်သျှူးများသေကုန်ပြီး စိမ်းဝါဖျော့ရောင်မှ အဝါရောင်သို့ပြောင်းကာ တစ်ရွက်လုံးခြောက်သေသွားသည်။

ရောဂါသံသရာ

------------

ပဲမျိုးစုံသံချေးရောဂါဖြစ်စေသောမှိုမျိုးကွဲပေါင်းမှာ (၂၅၀)ခန့်ရှိသည်။ ၎င်းသည်မျိုးစေ့ဆောင်ရောဂါ မဟုတ်ပါ။ မှို၏စပိုးများသည်လယ်ယာသုံးကရိယာများ၊ အင်းဆက်နှင့်တိရိစ္ဆာန်များတွင် တွယ်ကပ် ပါသွားခြင်းဖြင့်တစ်ခင်းမှတစ်ခင်းသို့ကူးစက်နိုင်သည်။ အရပ်ဒေသတစ်ခုမှ အခြားအရပ်ဒေသတစ်ခုသို့ လေမှတစ်ဆင့်ကူးစက်သည်။ ရောဂါတိုးတက်မှုသည်ပတ်ဝန်းကျင်အပူချိန်နှင့် အပင်၏မျက်နှာပြင် အစိုဓာတ်တို့ပေါ်တွင်မူတည်သည်။ အပူချိန်(၂၈)ဒီဂရီစင်တီဂရိတ်ထက်မြင့်ပါက စပိုးမျိုးညှောင့် မပေါက်နိုင်ပါ။ အပူချိန်(၃၂)ဒီဂရီစင်တီဂရိတ် အထက်တွင်ကြာရှည်စွာတည်ရှိနေပါက ရောဂါဖြစ်စေမှိုကိုသေစေနိုင်သည်။

ကာကွယ်နှိမ်နင်းနည်းများ

-----------------------

▪️ ဒေသအလိုက်ခံနိုင်ရည်ရှိသောမျိုးများကိုစိုက်ပျိုးပါ။

▪️ ရောဂါလက္ခဏာစတွေ့သည်နှင့် “ဟက်ဇာဂွန်၊ ဆာဗိတ်၊ ဇိုလာ” မှိုသတ်ဆေးတစ်မျိုးမျိုးဖြင့် (၇-၁၀)ရက်ခြားတစ်ကြိမ်ပက်ဖျန်းပေးပါ။

▪️ ပဲမျိုးရင်းဝင်မဟုတ်သောသီးနှံများနှင့် အလှည့်ကျစိုက်ပျိုးပါ။

▪️ ရောဂါရပင်ကြွင်းပင်ကျန်များကို စုပုံမီးရှို့ပါ။

▪️ ရောဂါဖြစ်စေမှိုကြီးထွားတိုးတက်မှုကို ဖြစ်စေသောပတ်ဝန်းကျင်အခြေအနေ (အထူးသဖြင့် အပူချိန် နှင့် အစိုဓာတ်ရရှိသည့်ကာလ)ကိုရှောင်ကြဉ်နိုင်ရန် မိမိတို့ဒေသအလိုက်စိုက်ချိန်ကို ချိန်ဆစိုက်ပျိုးပါ။

Sources : သီးနှံကာကွယ်‌ရေးဌာနခွဲ