🌾🌾🌾🌾🌾🌾🌾🌾🌾🌾🌾🌾

🔸 ဆန်စပါးသည်မြန်မာနိုင်ငံ၏အဓိကစားနပ်ရိက္ခာဖြစ်သလိုပြည်ပပို့ကုန်အတွက်လည်း အလွန်အားထား ရသည့် သီးနှံဖြစ်ပါတယ်။ စပါးတစ်ဧကအထွက်နှုန်းတိုးရေးအတွက် တစ်ဧကအပင်အရေအတွက်၊ ပင်ပွားအရေ အတွက်၊ တစ်ဧကရှိအနှံအရေအတွက်၊ တစ်နှံပါအောင်စေ့အရေအတွက်၊ အစေ့တစ်ထောင် အလေးချိန် ဆိုတဲ့အထွက်တိုးမိတ်ဖက်အချက်အလက်တွေကို စွမ်းရည်ပြည့်ဝအောင်ပြုစုထိန်းသိမ်းရတဲ့ နည်းပညာတွေကိုမလွဲမသွေဆောင်ရွက်ကြရမှာပါ။

🔸 ထိုသို့အဓိကအချက်များကို စွမ်းရည်ပြည့်ဝစွာရရှိနိုင်ရန်ရေသွင်းရေထုတ်စနစ်၏ လွှမ်းမိုးနေမှု၊ အရေးပါမှု များကိုတင်ပြချင်ပါတယ်။ “တစ်နှံမှာ အောင်စေ့ ၁၀၀၊ တစ်ဧကမှာအောင်နှံ ၁၀သိန်း၊ တင်း၁၀၀ ထွက် မယ့်ကိန်း”လို့မြင်လွယ်အောင်အထူးပြုဆိုထားကြပါတယ်။ စပါးခင်းဟာ စိုက်ခင်းစနစ်ဆိုရင်စပါးနှံ ၁၀သိန်းကျော်ရှိရမှာဖြစ်ပါတယ်။ အကယ်၍ ကြဲခင်းဖြစ်ပါလျှင် တစ်ဧက အနှံပေါင်း ၁၅သိန်းခန့်ရှိရမှာ ဖြစ်ပြီး တစ်နှံပါအောင်စေ့ ၇၀ခန့် ရှိရမှာဖြစ်ပါတယ်။ သို့မှသာတစ်ဧကတင်းရာကျော်ထွက်နိုင်မှာဖြစ်ပါသည်။

🔸 စပါးပင်သည်အသက်ရက်တစ်လကျော်သည်နှင့်အပင်စပွားပါသည်။ စိုက်ခင်းဖြစ်လျှင်စပါးတစ်ရုံမှ(၆-၈) ပင်ခန့်ပွားပါသည်။ မြေကောင်း၊ရေကောင်းဖြစ်လျှင်(၁၀-၁၅)ပင်အထိပွားနိုင်ပါသည်။ ကြဲခင်းတွင်စပါး တစ်ပင်မှ(၂-၃)ပင်သာပွားနိုင်ပါသည်။ ထို့ကြောင့်ကြဲခင်းတွင်ခေါင်နှံကိုသာအဓိကထားယူကြရသည်။ စပါးခင်းထဲရှိရေ၏အမြင့်သည်စပါးပင်ပွားစီးမှုကိုလွှမ်းမိုးထားပါသည်။ အပင်ပွားတော့မည့်အချိန် စပါးခင်းထဲတွင်ရေများနေမယ်၊(၄-၅)လက်မလောက်ဖြစ်နေမည်ဆိုလျှင် စပါးပင်အောက်ခြေက အပင်ပွားမယ့်အဆစ်တွေဟာ ရေထဲမြုပ်နေသည့်အတွက် ပင်ပွားမထွက်နိုင်တော့ဘဲ မူခြားမြစ်များသာ ထွက်လာမှာဖြစ်ပါသည်။ အကျိုးဆက်အဖြစ်ပင်ပွားနည်းသွားပြီး တစ်ဧကရှိရမည့်အနှံအရေအတွက် လည်းလျော့သွားစေပါမည်။ ထို့ကြောင့်အပင်ပွားချိန်စိုက်ခင်းထဲတွင်ရေတစ်လက်မ၊ တစ်လက်မခွဲခန့် သာအမြဲထိန်းထားပြီး ရေသွင်း ရေထုပ်လုပ်ပေးဖို့လိုအပ်ပါသည်။

🔸 ရေသွင်း ရေထုတ် လွယ်လွယ်ထုတ်နိုင်ဖို့၊ မြန်မြန်ထုတ်နိုင်ဖို့၊ ညီညီညာညာထုတ်နိုင်ဖို့အတွက် လယ်၏ လယ်သားမျက်နှာပြင် နှင့် တမန်းမျက်နှာပြင်ကိုညီအောင်ညှိထားဖို့ လိုအပ်ပါသည်။ အကယ်၍တမန်း မျက်နှာပြင်မညီဘဲ တစ်ဖက်စောင်းထရံထောင်ဖြစ်နေမယ်၊ ဒယ်အိုးပုံအလယ်ခွက်နေမယ်၊ လိပ်ခုံးပုံ အလယ်မောက်နေမယ်ဆိုပါလျှင် နိမ့်သည့်နေရာများကရေများပြီးအပင်မပွားနိုင်၊ မြင့်သည့်နေရာများက ရေပြတ် ပေါင်းထပြီး အပင်မပွားနိုင်၊ ရေလည်းလွယ်လွယ်ကူကူထုတ်လို့မရသည့်အတွက် ပင်ပွားမရရှိနိုင် တော့ဘဲ တစ်ဧကရှိရမည့် အနှံအရေအတွက်ပါလျော့နည်းသွားပြီး အထွက်ကျရန်သေချာနေပြီဖြစ်ပါသည်။

🔸 စပါးမှို့ကပ်ချိန်မှာရေအလိုအပ်ဆုံးအချိန်ဖြစ်ပါသည်။ ထိုအချိန်တွင်တစ်နှံပါအောင်စေ့များစေရန်အကျိုး ပြုမှာဖြစ်ပါသည်။ ထို့ကြောင့်မှို့ကပ်ချိန်တွင်စပါးခင်းထဲကိုရေ(၄-၅)လက်မရှိအောင်ထိန်းထားနိုင်ဖို့လိုပါ သည်။ ကတွတ်ပေါက်လုံအောင်သေချာဖို့ထားရပါမည်။ မှို့ကပ်ချိန်မှာစပါးခင်းရေပြတ်၊ ရေငတ်၊ ပက်ကြား အက်မည်ဆိုလျှင် တစ်နှံပါအစေ့အရေအတွက်ရော အောင်စေ့အရေအတွက်ပါကျဆင်းသွားပြီး အထွက်ကျမှာဖြစ်ပါသည်။

🔸 ထို့ကြောင့်တောင်သူဦးကြီးများမှ မိမိတို့စပါးခင်းများကိုမျက်ခြည်မပြတ် ဂရုစိုက်ကြည့်ရှုပြီး ရေသွင်း ရေထုတ်ကို အလေးအနက်ထားဆောင်ရွက်ကြဖို့နှိုးဆော်ရေးသားအပ်ပါသည်။

Credit : အောင်ဆန်း(စိုက်ပျိုးရေး)

🍃စစ်မှန် ပြည့်ဝ ဝိစာရ 🍃