🔹စပါးတွင် ကျရောက်တတ်သောရောဂါများထဲမှ မှိုရောဂါတစ်ခုဖြစ်သည့် စပါးဂုတ်ကျိုးရောဂါအကြောင်းကို တောင်သူဦးကြီးများအတွက် မျှဝေပေးလိုပါသည်။ 

🔹စပါးဂုတ်ကျိုးရောဂါသည် မိုးစပါးထက် နွေစပါးတွင် ပိုမိုကျရောက်လေ့ရှိပြီး အစိုစိုက်စပါးထက် အခြောက်စိုက်စပါး စိုက်ခင်းများကို ပိုမိုပျက်စီးစေပါသည်။ 

🔹စပါးဂုတ်ကျိုးရောဂါ လက္ခဏာမှာ စပါးရွက်ပေါ်တွင် လွန်းပုံသဏ္ဌာန်ရှိသော ရောဂါကွက်များတွေ့ရသည်။ ရောဂါကွက်များကြီးခဲ့လျှင် အလယ်တွင် မီးခိုးရောင်အကွက်များဖြစ်ပေါ်တတ်သည်။ ငယ်လျှင် မပေါ်တတ်ပါ။ ခံနိုင်ရည်မရှိသော စပါးမျိုးများတွင် ရောဂါကွက်တစ်ခုနှင့်တစ်ခုဆက်သွားပြီး စပါးရွက်များသေသွားတတ်သည်။  

🔹အနှံနှင့် ပင်စည်အဆစ်များတွင်လည်း ရောဂါကျရောက်တတ်ပြီး အနှံတွင်ရောဂါဝင်ရောက်ပါက ဂုတ်တွင် အညိုရောင်အကွက်များ ဖြစ်ပေါ်ပြီး ကျိုးကျတတ်သဖြင့် ဂုတ်ကျိုးရောဂါဟု ခေါ်ဆိုခြင်း ဖြစ်ပါသည်။ ပင်စည်အဆစ်တွင် ကျရောက်ပါက ကြွက်ဖျက်ဆီးသည့် လက္ခဏာနှင့် မှားယွင်းတတ်ပါသည်။ 

🔹နို့ရည်မတည်ခင် ရောဂါကျရောက်ပါက နို့ရည်ဆက်တည်နိုင်ခြင်းမရှိတော့ပါ။ အဆန်မတည်သော အနှံတို့မှာ စပါးရင့်မှည့်ချိန်မတိုင်မီကပင် ဖြူဖွေးထောင်မတ်လျက် ရှိကြသည်။ ၄င်းလက္ခဏာသည် စပါးဆစ်ပိုး ဖျက်ဆီးသည့်လက္ခဏာ၊ စပါးရွက်ဖုံးခြောက်ရောဂါကြောင့်ဖြစ်သော လက္ခဏာများနှင့် မှားယွင်းတတ်ပါသည်။ 

🔹အထက်ဖေါ်ပြပါအတိုင်း စပါးဂုတ်ကျိုးရောဂါသည် အခြားဆစ်ပိုး၊ ကြွက်နှင့် စပါးရွက်ဖုံးခြောက်ရောဂါ လက္ခဏာများနှင့် မှားယွင်းတတ်သော်လည်း စပါးဂုတ်ကျိုးရောဂါ၏ အထင်ရှားဆုံးလက္ခဏာများဖြစ်သည့် အရွက်တွင် လွန်းပုံသဏ္ဌာန်ရွက်ပြောက်များ ဖြစ်ပေါ်ခြင်းနှင့် အနှံအောက်အဆစ် (စပါးနှံဂုတ်)တွင် အညိုရောင်အကွက်များဖြစ်ပေါ်ပြီး ကျိုးကျသည့်လက္ခဏာများကို ထောက်ရှု၍ တိကျစွာခွဲခြားနိုင်ကြပါသည်။ 

🔹အပူချိန်ပြောင်းလဲမှုနည်းသော အပူပိုင်းဒေသများတွင် လေထု၏စိုထိုင်းမှုနှင့် နှင်းပေါက်ဖြစ်ပေါ်မှုတို့သည် ရောဂါတိုးလာစေသောအဓိက အကြောင်းရင်းများဖြစ်သည်။ 

🔹နိုက်ထရိုဂျင်မြေဩဇာကို တစ်ကြိမ်တည်းများပြားစွာထည့်ပေးခြင်းသည် ရောဂါကိုအားပေးရာရောက်ပြီး အကြိမ်ကြိမ်ခွဲ၍ထည့်ပေးခြင်းဖြင့် ရောဂါကျရောက်မှုကို သက်သာစေနိုင်သည်။ 

🔹မှိုစပိုးများသည် တစ်နေရာမှတစ်နေရာသို့ လေဖြင့်ပျံ့လွင့်၍ ရောဂါကူးစက်ပြန့်ပွားစေသည်။ သွင်းရေထုတ်ရေများမှတစ်ဆင့်လည်းပျံ့နှံ့နိုင်သည်။ မှိုသည် စပါးစေ့၏ သန္ဓေလောင်း၊ အစေ့တွင်းစာ နှင့် စပါးခွံများတွင်လည်း ခိုအောင်းနိုင်သည်။