🌾🌾🌾🌾🌾🌾🌾🌾🌾🌾

🔹မိုးစပါးစိုက်ပျိုးထုတ်လုပ်မည့် တောင်သူဦးကြီးများအတွက် မိမိတို့စိုက်ပျိုးထားသောစပါးခင်းများတွင် သီးနှံပင်အတွက် အဓိကလိုအပ်သော N : P : K ဓာတ်များနှင့် အခြားအနည်းလိုအာဟာရဓာတ်များ ချို့တဲ့မှုကြောင့်ဖြစ်ပေါ်တတ်သော ပင်ပြလက္ခဏာများကို အလွယ်တကူမြင်တွေ့ပြီး ကာကွယ်ကုသ နိုင်မည့် နည်းလမ်းများကို သိရှိနိုင်ပါရန်ရေးသားတင်ပြအပ်ပါသည်။ 

၁။ နိုက်ထရိုဂျင်(N) ချို့တဲ့မှုလက္ခဏာ စပါးအရွက်များ ဝါပြီးခြောက်လာကာ တစ်ခင်းလုံး လိမ္မော်ရောင်ဖြစ်သည်အထိ ဖြစ်နိုင်သည်။ ဆာလ်ဖာချို့တဲ့မှုနှင့် လက္ခဏာချင်းဆင်သော်လည်း ကွဲပြားသည့်အချက်မှာ ဆာလ်ဖာချို့တဲ့ခြင်းကို အရွက်နုများ၌ စတင်တွေ့ရှိရခြင်းဖြစ်သည်။

နိုက်ထရိုဂျင်ချို့တဲ့မှုဖြစ်စေသော အခြေအနေ

စပါးသီးနှံတွင် အများဆုံးတွေ့ရလေ့ရှိသော အာဟာရဓါတ်ချို့တဲ့မှုဖြစ်သည်။ မြေဆွေးပါဝင်မှုနည်းပြီး သဲဆန်သော မြေချဉ်များတွင် အများဆုံးတွေ့ရသည်။ ဆား/ဆပ်ပြာပေါက်မြေနှင့် ရေဝပ်သော မြေများတွင်လည်းတွေ့နိုင်သည်။ ထိခိုက်မှုအနေဖြင့် အပင်ပု၍ ပင်ပွားနည်းကာ အစာချက်လုပ်နိုင်မှု လျော့ကျစေသောကြောင့် စပါးအထွက်နှုန်း လျော့နည်းစေပါသည်။

ကာကွယ် ကုသနည်း

ပုလဲမြေဩဇာကို အကြိမ်ကြိမ်ခွဲကျွေးပါ။ နွားချေး၊ မြေဆွေးများထည့်ပေးပါ။ မြေဆီလွှာပေါ်မူတည်၍ ပုလဲကို တစ်ဧကလျှင် တစ်အိတ်ခွဲမှ နှစ်အိတ်ထိ ထည့်ပေးပါ။

၂။ ဖော့စဖရပ်စ် (P) ချို့တဲ့မှုလက္ခဏာ

အပင်ပု၍ ထောင်မတ်နေသော အစိမ်းပုပ်ရောင် အရွက်ရင့်များကိုတွေ့ရမည်။ ပင်စည်သေး၍ ပင်ပွားနည်းကာ ကြီးထွားမှုကို ဟန့်တာစေသည်။ ဖော့စဖရပ်စ် ချို့တဲ့ပါက စိမ်းဝါရောင် အရွက်ရင့်များ တွေ့ရမည်။

ဖော့စဖရပ်စ် ချို့တဲ့မှုဖြစ်စေသော အခြေအနေ

ဖော့စဖရပ်စ် ချို့တဲ့မှုကို ချဉ်လွန်း၊ ငန်လွန်းသော မြေမျိုးတွင် တွေ့ရလေ့ရှိသည်။ ခဲကြပ်မြေများ တွင်လည်း ချို့တဲ့မှုကို တွေ့ရသည်။ ထိခိုက်နိုင်မှုမှာအရွက်၊ အနှံနှင့် တစ်နှံပါအောင်စေ့အရေအတွက်များ လျော့နည်းစေသည်။

ကာကွယ် ကုသနည်း

တီစူပါ မြေဩဇာကို မြေပြင်စဉ်တွင် ထည့်ပေးပါသည်။ တီစူပါကို နိုက်ထရိုဂျင်ကဲ့သို့ ချို့တဲ့လက္ခဏာပြမှ ကုစားခြင်းထက် မြေဆီလွှာတွင် ကြိုတင်ထည့်ပေးပါ။ (P) သည် မြေဆီလွှာအတွင်း နှစ်ပေါင်းများစွာ ရှိနေပြီး သီးနှံများကို အာဟာရဖြည့်ပေးသည်။ ချို့တဲ့သည့်လက္ခဏာပြမှ (P) ထည့်လျှင် လက်ရှိသီးနှံ အတွက်အချိန်မမီနိုင်ပါ။

၃။ ပိုတက်ဆီယမ် (K) ချို့တဲ့မှုလက္ခဏာ

အရွက်ရင့်များ၏ အရွက်ထိပ်နှင့်အနားများတွင် အညိုရောင်အစင်းများ စတွေ့ရပြီး နောက်ပိုင်းတွင် အရွက်ပေါ်၌ အမဲစက်များဖြစ်လာကာ တစ်ပင်လုံးဝါသွားသည်။ K ဓာတ်ချို့တဲ့မှုလက္ခဏာကို ပန်းပွင့်ပြီး နောက်ပိုင်းမှသာ တွေ့ရလေ့ရှိသည်။

ပိုတက်ဆီယမ် ချို့တဲ့မှုဖြစ်စေသော အခြေအနေ

နိုက်ထရိုဂျင်တစ်မျိုးတည်းကိုသာ သုံးစွဲသည့်မြေတွင် (K) ချို့တဲ့မှုတွေ့ရလေ့ရှိသည်။ ကြဲခင်းများတွင် လည်း စိုက်ခင်းထက် (K) ချို့တဲ့သည်ကို တွေ့ရသည်။ သဲဆန်သောမြေတွင် ပိုမိုချို့တဲ့နိုင်သည်။ ထိခိုက်မှုအနေဖြင့် အပင်ပု၍ အမြစ်များသန်မာမှုမရှိသောကြောင့် အာဟာရစုပ်ယူမှုကို ဟန့်တားသည်။ အပင်ယိုင်လဲမှုနှင့် ပိုးမွှားရောဂါဒါဏ်ကို ပိုခံရသည်။ ဝတ်မှုန်ရှင်သန်နိုင်မှုကို ထိခိုက်စေပြီး စပါးအဖျင်း များစေသည်။

ကာကွယ် ကုသနည်း

ဓါတ်ဆား (ပိုတက်ရှ်) မြေဩဇာ ကျွေးပါ။ ကောက်ရိုးပြန်ထည့်ပါ။ စပ်မျိုးစပါးစိုက်လျှင် (K) ပိုထည့်ပါ။

၄။ ဆာလ်ဖာ (S) ချို့တဲ့မှုလက္ခဏာ

(N)ချို့တဲ့မှုလက္ခဏာနှင့် ဆင်တူသော်လည်း ချို့တဲ့မှုကိုအရွက်နုများတွင် စတွေ့ရသည်။ အရွက်ဝါပုံမှာ (N) ချို့တဲ့မှုထက်ပိုဖျော့သည်။

ဆာလ်ဖာ ချို့တဲ့မှုဖြစ်စေသော အခြေအနေ

မြန်မာနိုင်ငံလယ်မြေများတွင် တွေ့ရလေ့ရှိသည့် ချို့တဲ့မှုဖြစ်သည်။ သဲဆန်၍ မြေဆွေးပါဝင်မှုနည်းသော မြေမျိုးတွင်ပိုမိုတွေ့ရှိနိုင်သည်။ ထိခိုက်နိုင်မှုမှာစပါးပင်ကြီးထွားဆဲအစောပိုင်းတွင်ချို့တဲ့ပါကအထွက်နှုန်း ကိုများစွာ ထိခိုက်နိုင်ပါသည်။ ချို့တဲ့မှုပြင်းထန်ပါက ပင်ပွားနည်းပြီး နှံစတိုကာ အောင်စေ့ရာခိုင်နှုန်း လျော့နည်းစေ၍ ရင့်မှည့်ချိန်နောက်ကျနိုင်သည်။

ကာကွယ် ကုသနည်း

အမိုနီယမ်ဆာလ်ဖိတ်နှင့် စူပါဖော့စဖိတ်ဓါတ်မြေဩဇာကို ပျိုးဘောင်တွင်ကျွေးပါ။ ကောက်ရိုးပြန်ထည့် ပါ။ ကောက်ရိုးမီးရှို့လျှင်ပါဝင်သော (S) အားလုံးဆုံးရှုံးသွားသည်။ နွေထယ်ရေးခံပါ။ ကျောက်မှုန့် (Gypsum) ထည့်ပေးပါ။

၅။ သွပ် (Zn) ချို့တဲ့မှုလက္ခဏာ

စပါးရွေ့စိုက်ပြီး ၂-၄ ပတ်အတွင်း အရွက်နုများ၏ မျက်နှာပြင်တွင် အညိုရောင် အစက်များတွေ့ရသည်။ စပါးရွက်များသေး၍ ချွန်နေပြီး ကြီးထွားမှုရပ်တန့်သွားသည်။ ချို့တဲ့မှုမပြင်းထန်လျှင် ၄-၆ ပတ်အတွင်း အလိုလိုပြန်ကောင်းနိုင်သည်။