🍃🌱🍃🌱🍃🌱🍃🌱🍃🌱🍃

✅ ၂၀၂၂ခုနှစ် ပဲရာသီအတွက် နယ်စုံဒေသမှ အစောဆုံးထွက်ရှိလာသည့် ပေါ်ဦးပေါ်ဖျား ဆောင်းမတ်ပဲများ မန္တလေးဈေးကွက်သို့ စတင်ဝင်ရောက်လာပြီး အဖွင့်ဈေးကောင်းရရှိနေကြောင်း မန္တလေးပဲကုန်သည်များ ထံကသိရသည်။

✅ ဆောင်းမတ်ပဲသီးနှံမှာ ဈေးကွက်အတွင်းသို့ ဒီဇင်ဘာလ ဒုတိယပတ်မှ စတင်ဝင်ရောက်လာပြီး အထွက်နှုန်းနှင့် အရည်အသွေးပိုင်းလည်း ကောင်းမွန်ကြောင်း သိရကာ ပြီးခဲ့သည့်နှစ်ကာလတူရာသီကအဖွင့်ဈေး သုံးတင်းဝင်တစ်အိတ်ကျပ် ၈၅,၀၀၀ နှုန်းထက်သာလွန်စွာ ယခုနှစ်တွင် သုံးတင်းဝင်တစ်အိတ် ကျပ် ၁၃၀,၀၀၀ နှုန်းဖြင့် အဖွင့်ဈေးကောင်းရရှိနေကြောင်း မန္တလေးမြို့မှ ဦးစိုးဝင်းမြင့် (စိုးဝင်းမြင့်ပွဲရုံ)က ပြောသည်။

✅ "ဆောင်းမတ်ပဲတွေက ဒီလဒုတိယပတ်ကစပြီး မန္တလေးဈေးကွက်ကို စတင်ဝင်ရောက်နေတာပါ။ ဒီနှစ်က စတင်ထွက်ရှိကတည်းက အဖွင့်ဈေးကောင်းရရှိကြပါတယ်။ မိုးဦးကစိုက်ခဲ့တဲ့ ရေသွင်းမတ်ပဲတွေက ဈေးကွက်ထဲမှာမရှိသလောက်ဖြစ်သွားပါပြီ။ ဆောင်းမတ်ပဲက ဒီနှစ်မှာ ပိုးမွှားလည်း ဖျက်ဆီးမှုမရှိဘူး၊ ရာသီဥတုကလည်း မျှတတာနဲ့ကြုံတွေ့ရလို့ မတ်ပဲအထွက်ကောင်းတယ်။ မတ်ပဲက အထက်ပိုင်းဒေသတွေမှာ သီးထပ်အနေနဲ့ စိုက်ပျိုးလို့ရတယ်။ အောက်ပိုင်းဒေသတွေမှာတော့ တစ်နှစ်ကို ဆောင်းသီးနှံအနေနဲ့ တစ်ရာသီပဲ စိုက်တယ်။ ဒီနှစ်မတ်ပဲအထွက်ကနှစ်ပတ်လောက်စောတယ်" ဟု ၎င်းက ပြောသည်။

✅ လက်ရှိမန္တလေးပဲဈေးကွက်သို့ ကသာ၊ ထီးချိုင့်၊ မတ္တရာ၊ စဥ့်ကူးနယ်များမှ ဆောင်းမတ်ပဲများ စတင်ဝင်ရောက်လာနေပြီး မုံရွာ၊ ရွှေဘို၊ ပခုက္ကူ၊ မြင်းခြံဒေသများ၌လည်း မကြာခင် အများအပြား ထွက်ရှိလာတော့မည်ဖြစ်သည်။

✅ မတ်ပဲကို မြန်မာနိုင်ငံအလယ်ပိုင်းဒေသများ၌ သြဂုတ်လအတွင်း စတင်စိုက်ပျိုးကာ ဇန်နဝါရီလအတွင်း လှိုင်လှိုင်ပေါ်ထွက်လေ့ရှိပြီး၊ မြန်မာနိုင်ငံအောက်ပိုင်းဒေသများဖြစ်သည့် ဧရာဝတီ၊ ရန်ကုန်နှင့် ပဲခူးတိုင်းဒေသကြီးတို့တွင် ဖေဖော်ဝါရီနှင့် မတ်လအတွင်း၌ လှိုင်လှိုင်ထွက်ပေါ်လေ့ရှိကြောင်းသိရသည်။

✅ သီးနှံဈေးကွက်သတင်းများကို တောင်သူဦးကြီးများသိရှိနိုင်ပါရန် တင်ပြအပ်ပါသည်။ 

Sources : ရွှေမန်း (The Farmer media)