🫘🥜🫘🥜🫘🥜🫘🥜🫘🥜🫘

⏯ဒေါ်လာဈေးအပေါ် အခြေခံလာသည့် ကုန်သွယ်ရေးမူဝါဒအပြောင်းအလဲကြောင့် ပဲမျိုးစုံဈေးကွက်အတွင်း ပဲ၊ နှမ်းအားလုံး ဈေးမြင့်တက်လာသည့်အပြင် လက်ကျန်နည်းလာသည့် ပို့ကုန်ပဲများမှာ ဈေးမြင့်တက်လာလျှက်ရှိကြောင်း ပဲနှမ်းကုန်သည်များထံက သိရသည်။

⏯ဒေါ်လာငွေသတ်မှတ်ချက်အပြင် ငွေပေးချေမှု၊ တင်ပို့မှုဆိုင်ရာ လိုင်စင်တစ်ခေါက်ချင်း လျှောက်ထားရမှုတို့ကြောင့် ပဲ၊နှမ်းဈေးကွက်တွင် နှစ်ရက်ခန့် အရောင်းအဝယ် ရပ်ဆိုင်းလုဖြစ်သွား ပြီးနောက် ပစ္စည်းလက်ဝယ်ရှိသူများက ပြင်ပဒေါ်လာဈေးပေါ်မူတည်ကာ ဈေးချိန်ညှိပြီး ကြိုက်ဈေးရမှသာ ရောင်းချသည့်ပုံစံဖြစ်လာကြောင်း မန္တလေးတိုင်းဒေသကြီး ကုန်သည်များနှင့်စက်မှုလက်မှုအသင်း ဒုတိယဥက္ကဌ ဦးကျော်သွင်( ရွှေစင်သိန်းပွဲရုံ) က ပြောသည်။

⏯“ပဲ၊ နှမ်းဈေးကွက်ကတော့ အကုန်အတက်ဈေးတွေဖြစ်နေပါတယ်။ မြေပဲဆန်ဆိုရင် တစ်ပိဿာ ကျပ် ၅,၀၀၀ ကျော်နေတယ်။ ကုလားပဲဆိုရင်လည်း ထိုင်ဝမ်ပဲက ကျပ် ၁၃၉,၀၀၀ - ၁၄၀,၀၀၀ ၊ ပဲစင်းငုံတစ်အိတ် ကျပ် ၁၄၁,၀၀၀ ပေါက်ဈေးတွေ ဖြစ်လာတယ်။ နှမ်းဖြူတစ်အိတ် ကျပ် ၂၇၀,၀၀၀ ထိ ဈေးကောင်းလာပါတယ်။ ပဲ၊ နှမ်းအမျိုးအစားအလိုက် အကုန်လုံး ပုံမှန်မဟုတ်တဲ့ အတက်ဈေးတွေ ဖြစ်နေပါတယ်။ ပစ္စည်းလက်ဝယ်ရှိသူတွေကတော့ မရောင်းရလေကြိုက်လေပဲ၊ ကြိုက်ဈေးခေါ်ရောင်း နေတဲ့ ဈေးကွက်ဖြစ်နေပါတယ်” ဟု ၎င်းကပြောသည်။

⏯ကုန်သွယ်ရေးမှုဝါဒ အပြောင်းအလဲကြောင့် နယ်စပ်ကုန်သွယ်မှုတွင် ငွေလဲလှယ်နှုန်းကွာခြားချက်များ ကြောင့် ပို့ကုန်သမားများ တင်ပို့မှုရပ်ဆိုင်းနေကြောင်းလည်း သိရပြီး ပြည်တွင်း ဒေါ်လာပေါက်ဈေး မတည်ငြိမ်ခြင်းကြောင့်လည်း ပဲ၊နှမ်းဈေးကွက်မှာ ပုံမှန်မဟုတ်သည့် ဈေးနှုန်းများဖြင့် အရောင်းအဝယ် ဖြစ်နေခြင်းဖြစ်သည်။

မတ်ပဲ၊ ပဲတီစိမ်း ၊ပဲစင်းငုံ 

---------------------

ပို့ကုန်ပဲများအားလုံး သုံးတင်းဝင်တစ်အိတ် ငွေကျပ် ၁၀,၀၀၀ ခန့် ဈေးမြင့်တက်သွားရာ ဇူလိုင်(၂၁) ရက်တွင် မတ်ပဲတစ်အိတ်ကျပ် ၁၅၉,၀၀၀ ၊ ပဲတီစိမ်း တစ်အိတ် ကျပ် ၁၄၁,၀၀၀ ၊ ပဲစင်းငုံတစ်အိတ် ကျပ် ၁၄၀,၀၀၀ အသီးသီး ပေါက်ဈေးဖြစ်လာသော်လည်း အရောင်းအဝယ်မှာမူ ကောင်းမွန်နေပြီး ပြင်ပ ဒေါ်လာဈေး မတည်ငြိမ်မှုနှင့်အတူ ပို့ကုန်ပေါက်ဈေးများလည်း လိုက်ပါဈေးမြင့်တက်နေခြင်းဖြစ်သည်။

မြေပဲ 

----

ပြည်တွင်းဈေးကွက်သို့ စားဆီဝင်ရောက်မှုရှိလာသော်လည်း ပေါက်ဈေးမြင့်မားနေခြင်းကြောင့် မြေပဲဆံဈေးမှာလည်း မြင့်တက်နေသည်။ တရုတ်လိုင်းအဝယ်များသည့် မြေပဲလုံးဆံအနီမှာ တစ်ပိဿာကျပ် ၅,၁၀၀ ထိပေါက်ဈေး ရှိနေသည်။ ဇူလိုင်လ(၂၁) ရက်တွင် S1 လုံးဆံ တစ်ပိဿာ ကျပ် ၅,၀၀၀ ၊ အနီဆီဆံ တစ်ပိဿာ ကျပ် ၄,၈၀၀ ၊ မြေပဲဆီ တစ်ပိဿာကျပ် ၉,၅၀၀၊ နှမ်းဆီ တစ်ပိဿာကျပ် ၈,၀၀၀ နှင့် စားအုန်းဆီ တစ်ပိဿာ ကျပ် ၈,၀၀၀ ပေါက်ဈေးဖြစ်လာသည်။

⏯ထို့အပြင် ပြည်တွင်းသုံး ပဲမာလိုင်းများလည်း ဈေးမြင့်တက်လာရာ ကုလားပဲ V2တစ်အိတ် ၁၅၇,၀၀၀၊ ပဲယင်းတစ်အိတ် ၁၃၅,၀၀၀ ၊ ပဲကြီးတစ်အိတ် ကျပ် ၂၁၀,၀၀၀၊ ပဲထောပတ်တစ်အိတ် ၁၅၀,၀၀၀၊ စွန်တာပြာတစ်အိတ် ၁၃၅,၀၀၀၊ မြေထောက်ပဲတစ်အိတ် ၁၈၅,၀၀၀၊ ကျွန်းစားတော်ပဲတစ်အိတ် ၃၀၀,၀၀၀ အသီးသီးဈေးမြင့်တက်လာကြောင်း သိရသည်။

⏯သီးနှံဈေးကွက်သတင်းများကို တောင်သူဦးကြီးများသိရှိနိုင်ပါရန် တင်ပြအပ်ပါသည်။ 

Sources : ရွှေမန်း