🥜🥜🥜🥜🥜🥜🥜🥜🥜🥜

↗️ ဆောင်းမြေပဲများ စတင်ရိတ်သိမ်းရာ အထွက်နှုန်းကောင်း၊ ဈေးကောင်းရသဖြင့် တောင်သူ များအဆင်ပြေကြောင်း မြေပဲစိုက်တောင်သူများထံက သိရသည်။

↗️ ဧရာဝတီမြစ်အတွင်း မြေနုကျွန်းကျေးရွာများတွင် အဓိကစိုက်ပျိုးသည့် ဆောင်းမြေပဲများကို စက်တင်ဘာလကုန်ပိုင်းက စတင်စိုက်ပျိုးရာ ဇန်နဝါရီလကုန်ပိုင်းတွင်စတင် ရိတ်သိမ်းနေပြီဖြစ် ကြောင်း၊ ယခုနှစ် ဆောင်းစိုက်မြေပဲမှာ တစ်ဧကအထွက်နှုန်း မြေပဲတင်း (၅၅ - ၆၀)တင်း ခန့်ထွက်ရှိကြောင်း၊ လက်ရှိမြေပဲဆံတစ်ပိဿာ ငွေကျပ် ၈,၆၀၀ခန့် ပေါက်ဈေးရှိသောကြောင့် တစ်ဧကငွေ ကျပ် ၁၀သိန်းခန့် အကျိုးအမြတ်ရရှိကြောင်း ပုသိမ်ကြီးမြို့နယ် သံဘိုကျွန်းကျေးရွာမှ မြေပဲစိုက် တောင်သူ ဦးခင်မောင်ရင်က ပြောသည်။

↗️ "ဆောင်းမြေပဲများစတင်ရိတ်သိမ်းနေပါပြီ။ တစ်ဧကမြေပဲ တင်း (၅၅ - ၆၀) လောက်တော့ ထွက်ရှိပါတယ်။ အစေ့အဆံလည်းအောင်ကြပါတယ်။ မကွေးအထွက်တိုးနီမျိုးကို စိုက်ပျိုးပါတယ်။ တစ်ဧကစိုက်ပျိုးစရိတ် ငွေကျပ်လေးသိန်းလောက် ကုန်ပါတယ်။ လက်ရှိပေါက်ဈေးက မြေပဲဆံ တစ်ပိဿာ ငွေကျပ် ၈,၆၀၀ ပေါက်ဈေးနဲ့တွက်ရင် ငွေကျပ် ၁၀ သိန်းလောက်တော့ အမြတ်ကျန်ပါတယ်။ ဒီနှစ်က ကန်စွန်းဥကဈေးအကောင်းဆုံးဖြစ်တော့ တောင်သူတွေ အဆင်ပြေသလို မြေပဲဆံကလည်းအထွက်နှုန်းကောင်းတော့ တောင်သူတွေ အဆင်ပြေပါတယ်" ဟု ၎င်းကပြောသည်။

↗️ ဧရာဝတီမြစ်အတွင်းရှိ မြေနုကျွန်းကျေးရွာများတွင် ယခုနှစ် ကန်စွန်းဥနှင့် ဆောင်းမြေပဲကို အဓိကစိုက်ပျိုးကြပြီး ကန်စွန်းဥမှာ ယခုနှစ်ဈေးကောင်းရရှိကြရာ တစ်ဧက ငွေကျပ် သိန်း(၄၀-၅၀) ခန့် အကျိုးအမြတ်ရရှိသလို ဒုတိယသီးနှံဆောင်းမြေပဲမှာလည်း အထွက်နှုန်းနှင့် ဈေးကောင်းရရှိသောကြောင့် မြေပဲတစ်ဧကလျှင် ငွေကျပ် ၁၀သိန်းခန့် အကျိုးအမြတ်ရရှိကြကြောင်းသိရသည်။

↗️ သီးနှံ၊ ဈေးကွက်သတင်းများကို တောင်သူဦးကြီးများသိရှိနိုင်ပါရန် တင်ပြအပ်ပါသည်။ 

Sources : ရွှေမန်း (မကွေးဂျာနယ်)