🫘🫘🫘🫘🫘🫘🫘🫘🫘🫘

▶️ယခင်သီတင်းပတ်အတွင်း မတ်ပဲဈေးနှုန်း တစ်တင်းလျှင်ကျပ် ၆၀,၀၀၀ ဝန်းကျင်ဖြင့် ဈေးငြိမ်နေခဲ့ပြီး ယခုသီတင်းပတ်တွင်လည်း ယခင်ဈေးအတိုင်းဆက်လက်တည်ရှိနေခဲ့သည်။

▶️ဧရာဝတီတိုင်းဒေသကြီးအတွင်းဖြစ်ပေါ်ခဲ့သော မတ်ပဲဈေးနှုန်းများမှာ နိုဝင်ဘာလ (၃) ရက်နေ့တွင် တစ်တင်းလျှင် ကျပ် ၅၇,၅၀၀၊ (၄) ရက်နေ့တွင် ကျပ် ၅၈,၀၀၀ ၊ (၈) ရက်နေ့တွင် ကျပ် ၆၀,၀၀၀၊ (၉) ရက်နေ့တွင်ကျပ် ၆၀,၀၀၀၊ (၁၀) ရက်နေ့တွင် ကျပ် ၆၀,၃၀၀၊ (၁၁) ရက်နေ့တွင် ကျပ် ၅၉,၈၀၀၊ (၁၂) ရက်နေ့တွင် ကျပ် ၆၀,၀၀၀၊ (၁၃) ရက်နေ့တွင် ကျပ် ၅၈,၈၀၀ အသီးသီးဖြစ်ခဲ့ပါသည်။

▶️ယခုသီတင်းပတ်ကာလအတွင်း မြန်မာငွေကြေးဈေးနှုန်းအတက်အကျတည်ငြိမ်နေပြီး မတ်ပဲ ဈေးနှုန်းလည်း ကျပ် ၆၀,၀၀၀ ဝန်းကျင်တွင် တည်ငြိမ်နေကြောင်းသိရှိရသည်။ အိန္ဒိယနိုင်ငံသို့ တင်ပို့သည့် မြန်မာမတ်ပဲဈေးနှုန်းများမှာ မတ်ပဲ SQ ၁ တန်လျှင် CNF ဈေးနှုန်း $ 950 နှင့် FAQ ဈေးနှုန်း $ 815 ဖြစ်ပြီး၊ မတ်ပဲ FAQ ၏ FOB ဈေးနှုန်းမှာ ၁ တန်လျှင် $ 770 ဖြစ်ကြောင်းသိရှိရပါသည်။ 

▶️နိုဝင်ဘာလအတွင်း မြန်မာမတ်ပဲ ကွန်တိန်နာ (၂၀-၂၅)စီး ခန့်တင်ပို့ခဲ့ပြီး ပြည်တွင်းကုန်သည်များ၏ ခန့်မှန်းချက်အရ မြန်မာ့မတ်ပဲလက်ကျန် တန်ချိန် ၁၅,၀၀၀ နှင့် ပဲစင်းငုံလက်ကျန် တန်ချိန် ၂၀,၀၀၀ ခန့် ကျန်ရှိနိုင်ကြောင်း သိရှိရသည်။

▶️အိန္ဒိယနိုင်ငံသို့ တင်သွင်းလာသည့် မြန်မာမတ်ပဲများထဲမှ တန်ချိန် ၁၀,၀၀၀ ကို NAFEDက ၁ ကွမ်တယ်လျှင် Rs 7,100 – 7,490 နှုန်းဖြင့် ဝယ်ယူခဲ့ပြီဖြစ်ပြီး ပဲခွဲစက်များမှ အရည်အသွေးကောင်း မတ်ပဲဝယ်လိုအားကြောင့် လာမည့်ဆောင်းရာသီတွင် မတ်ပဲဝယ်လိုအားများမြင့်တက်လာနိုင်ကြောင်း Agri World Mumbai ကထုတ်ပြန်ချက်အရ သိရှိရပါသည်။

▶️တရုတ်-မြန်မာနယ်စပ်ကုန်သွယ်ရေးလမ်းကြောင်းဖြစ်သည့် မူဆယ်(၁၀၅) မိုင် ကုန်သွယ်ရေးစခန်း ပြန်လည်ဖွင့်လှစ်မည့် သတင်းများကြောင့် တရုတ်သို့ တင်ပို့နေသည့် ပဲအမျိုးမျိုးနှင့် ဆီထွက်သီးနှံများ၏ ဈေးနှုန်းများတက်လာနေသော်လည်း မတ်ပဲဈေးနှုန်းမှာ ဈေးငြိမ်နေသည့် အနေအထားတွင်ရှိပြီး မြန်မာမတ်ပဲပြန်လည်စိုက်ပျိုးရာသီချိန်တွင်ဖြစ်ပေါ်နေသည့် လက်ရှိဈေးနှုန်းမှာအမြင့်ဆုံးဖြစ်နိုင် ကြောင်း၊ အိန္ဒိယဘက်မှဝယ်လိုအားကြောင့် ဈေးအနည်းငယ်တက်လာနိုင်သော်လည်း ဈေးအမြင့်တန်းရရှိရန် မျှော်လင့်၍မရနိုင်ကြောင်း သုံးသပ်ရပါသည်။

▶️သီးနှံဈေးကွက်သတင်းများကို တောင်သူဦးကြီးများသိရှိနိုင်ပါရန် တင်ပြအပ်ပါသည်။ 

Sources : ဧရာကုန်သွယ်မှုဗဟိုဌာန

မြန်မာကုန်သွယ်မှုမြှင့်တင်ရေးအဖွဲ့

14-11-2022