🍃🍃🍏🍌🍈🍃🍃🍏🍌🍈🍃🍃

☑️ မြန်မာရွှေသစ်သီးဝလံကုမ္ပဏီ (Myanmar Golden Produce Co.,Ltd.)က ကိုဗစ်ကာလတွင် ဈေးကွက်မရှိဖြစ်နေသည့် တောင်သူများထံက ကျွဲကောသီး၊ မာလကာသီး၊ နဂါးမောက်သီး၊ ငှက်ပျောသီးတို့ကို ဝယ်ယူပေးမည်ဖြစ်ကြောင်း ကုမ္ပဏီ၏ ဒါရိုက်တာ ဒေါ်လဲ့လဲ့ဦးကပြောသည်။``တောင်သူတွေက သီးနှံထွက်နေတယ်၊ ထွက်ရှိတဲ့သီးနှံတွေ အချို့ဆိုရင် ဈေးကွက်တွေကို ပျောက်သွားတယ်။ အဲ့လိုဖြစ်ရင် ကျွန်မတို့ကို ဆက်သွယ်ပါ။ ဝယ်နိုင်သလောက်ဝယ်ပေးတယ်။ We Love Yangon နဲ့ပေါင်းပြီး လှူပေးတယ်`` ဟု ၎င်းကပြောသည်။

☑️ အဆိုပါသီးနှံလေးမျိုးကို ကုမ္ပဏီအနေဖြင့် ထိုက်သင့်သလောက်ဝယ်ယူပေးမည်ဟုဆိုပြီး ဝယ်ယူနိုင်သည့် ပမာဏအတိအကျကိုမူ မပြောနိုင်သေးကြောင်း ဒေါ်လဲ့လဲ့ဦးကပြောသည်။ရောင်းချမရသည့် သီးနှံများကို တောင်သူများက လှူဒါန်းလိုလျှင်လည်း We Love Yangon နှင့် ပူးပေါင်းကာ လှူဒါန်ပေးသွားမည်ဖြစ်ကြောင်း သိရသည်။

☑️ အဆိုပါကုမ္ပဏီက စင်္ကာပူနိုင်ငံသို့ ရုံးပတီသီး၊ ငရုတ်သီး၊ သခွားသီး၊ ဘိုစားပဲသီးတို့ကို တစ်ပတ်လျှင် တစ်ကြိမ် အထုတ်ရေတစ်ထောင်ပါသော ကွန်တိန်နာတစ်လုံး တင်ပို့နေပြီး နောက်ပိုင်းတွင် ရက်ခြား တင်ပို့နိုင်ရန် စီစဉ်ထားကြောင်း၊ ကုန်စိမ်းတင်ပို့ခြင်းအပြင် အဆင့်မြင့်ထုတ်ကုန်များ ထုတ်လုပ်ပြီး တင်ပို့လျက်ရှိကြောင်းသိရသည်။`` စင်္ကာပူနိုင်ငံကလည်း အဆက်မပြတ်ပို့နိုင်မှ ဖြစ်မှာဆိုတော့ တိုက်ရိုက်ဆွေးနွေးသွားမှာဖြစ်တယ်။ လေးမျိုး ပို့နေတာကို ရက်ခြားလည်း ပို့တာမျိုးဖြစ်သွားနိုင်တယ်။ ပြီးတော့ ဝယ်တာကလည်း ဒီထက်ပိုများလာနိုင်တယ်။

☑️ စိုက်ပျိုးရေးကဏ္ဍအနေနဲ့ ကိုဗစ်ဖြစ်တာလည်း ဖြစ်တာပေါ့။ ကိုယ့်ကိုယ်ကို လုံခြုံအောင်ကာကွယ်ပြီး အလုပ်ကိုဆက်လုပ်မှ ပဲရမယ်။ စိုက်ပျိုးရေးကဏ္ဍကကျ မသွားဖို့လိုတယ်။ စားနပ်ရိက္ခာအတွက်က လိုအပ်နေတာကိုး ``ဟု ၎င်းကဆက်လက်ပြောသည်။ကုမ္ပဏီအနေဖြင့် ကန်ထရိုက်လယ်ယာစနစ်ဖြင့် စိုက်ပျိုးရန် စီစဉ်နေပြီး တောင်သူများနှင့် စိုက်ပျိုးမှု ပုံစံများကို တိုက်ရိုက်ဆွေးနွေးရန်စီစဉ်ထားသော်လည်း လက်ရှိ ကိုဗစ်ကာလဖြစ်သောကြောင့် အဆင်မပြေသေးကြောင်း သိရသည်။

☑️  ``ကိုဗစ်ကာလမှာတော့ ပြည်ပတင်ပို့မှုကလည်း နည်းသွားတယ်။ ပြည်တွင်းဝယ်ယူမှုကလည်း မရှိသလောက်ဖြစ်နေတယ်။ အဲဒီတော့ဈေးကွက်ကို ပျောက်နေတာ။ အဲဒါကြောင့် ငှက်ပျောသီးဆိုရင် ခူးဆွတ်စရိတ်မတတ်နိုင်လို့ အပင်မှာပဲ ပြစ်ထားရတာမျိုးတွေရှိလာတယ်။ အဆင့်မြင့်ထုတ်ကုန် ထုတ်လုပ် ဖို့ကြတော့ ကုန်ကျစရိတ်က မတတ်နိုင်ကြဘူး။ ကုမ္ပဏီအချို့က ဝယ်ယူပေးမယ်ဆိုတဲ့ သတင်းတွေကို သိရပေမယ့် သူတို့က ဘယ်လောက်အတိုင်းအတာအထိ ဝယ်ပေးနိုင်မှာလဲဆိုတာ အတိအကျ မသိရဘူး။ ``ဟု ငှက်ပျော စိုက်တောင်သူ ဦးတင်အောင်ကပြောသည်။

မျိုးသန့်

The Farmer Media