➡ ယခုပြည်တွင်းသကြားစျေးနှုန်းမှာ တစ်ပိဿာကျပ် ၁,၅၀၀ ကျော်လာပြီး သကြားရောင်းဝယ်မှု သမိုင်းတစ်လျှောက်စံချိန်တင်မြင့်တက်လာမှုကြောင့် လာမည့်ကြံရာသီတွင် ကြံတစ်တန်ဝယ်ယူစျေး မှာလည်း ကျပ် ၅၀,၀၀၀ ကျော်ထိဖြစ်လာနိုင်ကြောင်း ကြံ၊သကြားလုပ်ငန်းရှင်တစ်ဦးကပြောသည်။

➡ ပြည်တွင်းသကြား လက်ကျန်နည်းပါးလာခြင်း ၊ နိုင်ငံခြားငွေဒေါ်လာစျေးမြင့်တက်လာခြင်း၊ နိုင်ငံကာသကြားပေါက်စျေးမှာလည်းမြင့်တက်လာခြင်းတို့ကြောင့် ပြည်တွင်းသကြားဈေးမှာ ကြံရာသီ ကုန်ဆုံးချိန် ဧပြီလအတွင်းက တစ်ပိဿာ ကျပ် ၁,၂၀၀ မှ ကျပ် ၁,၃၀၀ စျေးရှိရာမှ သြဂုတ်လဆန်းပိုင်းမှ စတင်ကာ တဖြေးဖြေးမြင့်တက်လာကြောင်း သကြားလုပ်ငန်းရှင် ဦးဝင်းဌေးက ပြောသည်။

➡ “ဒီနှစ်သကြားအထွက်နှုန်းက မြန်မာတစ်နိုင်ငံလုံးမှာ တန်ချိန်တစ်သိန်းကျော် လျော့နည်းထားတာရယ်၊ လက်ရှိ နိုင်ငံတကာသကြားစျေးနဲ့ ဒေါ်လာစျေးမြင့်တက်လာတာကြောင့် ပြည်တွင်းသကြားစျေး စံချိန်တင်စျေးတက်လာတာပါ။ ပြည်တွင်းသုံးစွဲမှုကမြင့်မားမှုမရှိသေးပါဘူး။ ဒါပေမယ့် ပြည်တွင်း လက်ကျန်သကြားကနည်းလာပါပြီ။ ဒီလိုသကြားစျေးမြင့်မားလာတာက လာမည့်နှစ် ကြံရာသီမှာ တောင်သူတွေ ကြံတစ်တန် ကျပ် ၅၀,၀၀၀ ကျော်စျေးထိရလာနိုင်ပါတယ်။ မနှစ်ကရှမ်းမြောက် တောင်သူတွေ ကြံတစ်တန် ကျပ် ၄၆,၀၀၀ စျေးထိရရှိထားပါတယ်” ဟု ၄င်းကပြောသည်။

➡ ယနေ့ မန္တလေးသကြားဒိုင်ပေါက်စျေးမှာ တစ်ပိဿာ ၁,၄၅၀ မှ ၁,၅၅၀ ဝန်းကျင်အထိ ရှိနေပြီး မန္တလေးမြို့တွင် Stay at Home ကာလကို သြဂုတ်လကုန်ပိုင်းထိ တိုးမြှင့်ထားပြီး သကြားဂိုဒေါင်များလည်း ပိတ်ထားတာကြောင့်လည်း သကြားစျေးမှာ သီးတင်းနှစ်ပတ်အတွင်း စံချိန်တင်မြင့်တက်လာခြင်းဖြစ်ကြောင်း ၊ ပြည်တွင်းသုံးစွဲမှုနည်းပါးချိန်ဖြစ်သော်လည်း ပြည်တွင်း လက်ကျန်သကြားနည်းပါးလာတာခြင်း၊ ငွေကြေးလည်ပတ်မှု ငွေပေးချေရာတွင် အခက်အခဲ ဖြစ်လာတာကြောင့် သကြားစျေးများ ဆက်လက်မြင့်တက်လာနိုင်ချေရှိကြောင်း ကျွမ်းကျင်သူများက သုံးသပ်ထားသည်။

Sources : ရွှေမန်း (မြန်မာတောင်သူကြီးများဂျာနယ်)