🌿🥜🌿🥜🌿🥜🌿🥜🌿🥜🌿

🔼၂၀၂၂ ခုနှစ် ပဲမျိုးစုံဈေးကွက်တွင် မြေပဲဆံမှာ စံချိန်တင်စျေးကောင်းရရှိခဲ့သည့်အပြင် လာမည့် ရာသီအတွက်လည်း စျေးကွက်အလားအလာကောင်းများရှိနေသဖြင့် တိုးချဲ့စိုက်ပျိုးမှုများရှိလာကြောင်း တောင်သူများထံက သိရသည်။

🔼ယခင်က ဧရာဝတီမြစ်တစ်လျှောက်ရှိ ကျွန်းစိုက်ခင်းများတွင် ဆောင်းရာသီစိုက်သာ များပြားခဲ့သော် လည်း ယခုအခါ ယာသီးနှံစိုက်ခင်းများတွင်ပါ တိုးချဲ့စိုက်ပျိုးလာခြင်းဖြစ်သည်။ ၂၀၂၁ ခုနှစ် နှစ်ကုန်ပိုင်းမှ စတင်ကာ စားအုန်းဆီဈေးများ တင်သွင်းမှုလျှော့ချခဲ့သဖြင့် ယခင်တစ်ပိဿာကျပ် ၃,၀၀၀ ကျော် သာရှိခဲ့သည့် ပြည်တွင်းမြေပဲဆံဈေးမှာ တဖြေးဖြေးမြင့်တက်ခဲ့ပြီး တစ်ပိဿာကျပ် ၇,၀၀၀ ကျော် အထိ စံချိန်တင်မြင့်တက်ခဲ့သည်။

🔼လက်ရှိအချိန်တွင် မိုးမြေပဲများ လှိုင်လှိုင်ဝင်ရောက်လာမှုနှင့်အတူ ပြည်တွင်းစားဆီဈေးများ ဈေးနှုန်းကျဆင်းလာမှုကြောင့် မြေပဲဆံဈေးများကျဆင်းလာသော်လည်း တစ်ပိဿာလျှင် ကျပ် ၅,၀၀၀ကျော် ပေါက်ဈေးရှိနေသေးသဖြင့် တောင်သူများတွက်ခြေကိုက်သည့် အနေအထားဖြစ်သည်။

🔼“မနှစ်ကတစ်နှစ်လုံး မြေပဲဆံဈေးကောင်းရကြတော့ ဒီနှစ်ဆောင်းစိုက်ကို ပိုစိုက်လာကြတာပါ။ ကျွန်းစိုက်ခင်းတွေဆိုရင် အခြားသီးနှံတောင်မစိုက်ကြတော့ဘူး။ ဒီနှစ်စိုက်ပျိုးစရိတ်ကလည်း ကြီးလာတော့ ဈေးကွက်ကောင်းနေတဲ့ မြေပဲကိုပိုစိုက်လာတာပါ။ အရင်က ဆောင်းစိုက်မြေပဲ လုံးဆန်ထိပ်စမှ အလွန်ဆုံးတစ်ပိဿာကျပ် ၂,၅၀၀ လောက်ပဲဈေးရတာကနေ တစ်ပိဿာ ကျပ် ၇,၀၀၀ ကျော်လောက်ဆိုတော့ တောင်သူတွေ အဆင်ပြေခဲ့ပါတယ်” ဟု မတ္တရာမြို့နယ်မှ တောင်သူ ဦးမြင့်ဦးက ပြောသည်။

🔼အောက်တိုဘာလဆန်းပိုင်းတွင် ပြည်တွင်းမြေပဲဆံဈေး အနည်းငယ်ကျဆင်းမှုရှိသော်လည်း အနီးလုံးဆံ တစ်ပိဿာကျပ် ၅,၄၀၀ ခန့် ပေါက်ဈေးရှိနေကြောင်း မန္တလေးကုန်စည်ဒိုင် ပဲကုန်သည်များထံက သိရသည်။ ယခုဘဏ္ဍာနှစ်တွင် မန္တလေးတိုင်းဒေသကြီးအတွင်းရှိ ခရိုင် ၉ ခရိုင်၌ ဆောင်းဆီထွက်သီးနှံ ဖြစ်သော ဆောင်းမြေပဲလျာထားဧက ၁၂၀,၀၀၀ ကျော်ကို စိုက်ပျိုးသွားမည်ဖြစ်ကြောင်းလည်း မန္တလေးတိုင်းဒေသကြီး စိုက်ပျိုးရေးဦးစီးဌာနမှ ဦးစီးအရာရှိ ဒေါ်တိုးတိုးဝင်းက ပြောကြားသည်။

🔼"တိုင်းဒေသကြီးအတွင်းမှာ စိုက်ပျိုးရေးဦးစီးဌာနကနေပြီးတော့ ဆီထွက်သီးနှံတွေကို ပြည်တွင်း စားသုံးမှု ဖူလုံစေရေးအတွက် ဘဏ္ဍာနှစ်အလိုက် ပိုမိုတိုးချဲ့စိုက်ပျိုးဆောင်ရွက်နေပါတယ်။ ဆီထွက်သီးနှံ စိုက်ပျိုးတာက ဒေသတွင်းမှာ ဆီဖူလုံမှုအတွက်ကို အဓိကရည်မှန်းချက်ထားပြီး စိုက်ပျိုးနေတာပါ" ဟု ၎င်းကပြောသည်။

Sources : ရွှေမန်း