🍃🍉🍃🍉🍃🍉🍃🍉🍃🍉🍃

🔘တရုတ်နိုင်ငံ၏ နယ်စပ်ဂိတ်များကို ပိတ်ထားမှုကြောင့် မိုးဖရဲစိုက်ပျိုးမှုကို ပြည်တွင်းစျေးကွက် အတွက်သာ ရည်ရွယ်စိုက်ပျိုးသင့်ကြောင်း မူဆယ်ပွဲရုံကုန်သည်ကြီးများက အကြံပြုထားပြီး၊ လက်ရှိအချိန်တွင် မူဆယ်ကုန်သွယ်ရေးလမ်းကြောင်းမှာ လုံးဝရပ်ဆိုင်းနေပြီး အနည်းဆုံး ခြောက်လခန့်ကြာမြင့်နိုင်ကြောင်း သိရသည်။

🔘“လက်ရှိ တရုတ်နယ်စပ်အခြေအနေတွေအရ ဘယ်အချိန်ဖွင့်မယ်ဆိုတာ မသိရဘူး။ တရုတ်ဘက်က ပိတ်တာက နှစ်လသုံးလလောက်လည်း ဖြစ်နိုင်သလို နှစ်ချီပြီးလည်း ကြာသွားနိုင်တယ်။အခုချိန်အထိ နယ်စပ်ဂိတ်တွေ ပြန်ဖွင့်နိုင်ဖို့အခြေအနေက ဘာမှသေချာမှုမရှိသလို ကုန်သွယ်ရေးက လုံးဝ ရပ်တန့်သွားပါပြီ။ ဖရဲ၊ သခွားစိုက်တောင်သူတွေအတွက်တော့ ပြည်တွင်းစျေးကွက်ကိုသာ အားထားပြီး ချင့်ချိန်စိုက်ပျိုးပါ။ ကံကောင်းလို့ နယ်စပ်ဂိတ် ပြန်ဖွင့်တာမြန်ရင်တော့ အသီးတွေ ပြန်တင်ပို့နိုင်မှာပါ” ဟု ခွာညိုပွဲရုံပိုင်ရှင် ဦးစိုင်းခင်မောင်ကပြောသည်။ 

🔘တရုတ်နိုင်ငံသို့ မူဆယ်နယ်စပ်မှ အဓိကဝင်ထွက်နေသည့် ကျင်စန်းကျော့ဂိတ်ကို ဇူလိုင်လဆန်းပိုင်းတွင် စတင်ပိတ်လိုက်ပြီး ကုန်သွယ်မှုရပ်တန့်သွားခဲ့ရာ သြဂုတ်လ ၃ ရက်တွင်ရွှေလီမြို့အုပ်ချုပ်ရေးတာဝန်ရှိ သူများကအရေးကြီးဆေးဝါးပစ္စည်းမှလွဲ၍ နယ်စပ်ဂိတ်များကို နှစ်လကြာပိတ်ထားမည် ဖြစ်ကြောင်း တရားဝင်ထုတ်ပြန်ထားသည် ဟုသိရသည်။

🔘ကိုဗစ်-၁၉ ရောဂါ ထိန်းချုပ်မှုအစီအစဉ်အရ တရုတ်နယ်စပ်ဂိတ်များပိတ်ထားသည့်အခြေအနေကြောင့် သြဂုတ်လအတွင်းစတင်သည့် မိုးဖရဲစိုက်ပျိုးမှုမှာ မရှိသလောက်နည်းသွားပြီး အဆိုပါမိုးဖရဲစိုက် ယာမြေများတွင် စျေးကွက်အလားအလာကောင်းမည့် ပဲစင်းငုံကို ပြောင်းလဲစိုက်ပျိုးမှုများ ရှိနေကြောင်း စစ်ကိုင်းဒေသကြီး ဖရဲ၊သခွား ဥက္ကဌ ဦးစိုးလွင် ကပြောသည်။

🔘“နယ်စပ်ဂိတ် ပိတ်ထားမှု အခြေအနေကို စောင့်ကြည့်နေရပါတယ်။ ပုံမှန်အချိန် သြဂုတ်လဆိုရင် မိုးဖရဲ၊သခွား စိုက်ပျိုးချိန်ပါ။ လက်ရှိမှာတော့ နယ်စပ်မတည်ငြိမ်မှုတွေရှိတော့ စိုက်တဲ့သူမရှိသလောက် ပါပဲ။ ပြည်တွင်း စျေးကွက်အတွက်လောက်ပဲ စိုက်ပျိုးနေတာတွေ အနည်းငယ်ရှိပါတယ်။ အချို့ တောင်သူတွေကတော့ အလုပ်သမားထိန်းရင်း အနည်းငယ် စိုက်ပျိုးတာတော့ရှိပါတယ်။ လက်ရှိမှာ မိုးဖရဲစိုက်ယာမြေတွေမှာ ပဲစင်းငုံကို စိုက်ပျိုးထားကြပါတယ်” ဟု ၎င်းက ပြောသည်။ 

🔘ယခင်နှစ်ကတည်းက ကိုဗစ်-၁၉ ရောဂါထိန်းချုပ်မှုများကြောင့် တရုတ်နယ်စပ်ဂိတ်များတွင် အသီးကားများ ကြန့်ကြာမှုရှိခဲ့သဖြင့် ဆုံးရှုံးမှုများစွာဖြစ်ပေါ်ခဲ့ပြီး ယခုနှစ်တွင်လည်း အဓိက စိုက်ပျိုးတင်ပို့သည့် ဆောင်းစိုက်ဖရဲရာသီအတွက် နယ်စပ်အခြေအနေများကို စောင့်ကြည့်ရမည် ဖြစ်ကြောင်း နှင့် စွန့်စားစိုက်ပျိုးရန်မှာလည်း လုပ်အားခ နှင့် သွင်းအားစုဈေးများမြင့်တက်နေကြောင်း ဖရဲစိုက်တောင်သူတစ်ဦးကပြောသည်။

🔘မြန်မာနိုင်ငံတွင် ဖရဲကို နှစ်ကြိမ်စိုက်ပျိုးကာ မိုးဖရဲကို ဇူလိုင်၊သြဂုတ်လအတွင်း စိုက်ပျိုးပြီး စက်တင်ဘာလကုန်ပိုင်းမှစတင်ကာ တရုတ်နိုင်ငံသို့ တင်ပို့ကာ ဆောင်းဖရဲကိုမူ အောက်တိုဘာလ အတွင်း စတင်စိုက်ပျိုးကြပြီး ဒီဇင်ဘာလ မှ ဧပြီလအထိ စိုက်ပျိုးတင်ပို့ကြလေ့ရှိသည်။ 

Sources : ရွှေမန်း(မြန်မာတောင်သူကြီးများဂျာနယ်)