🥑🥑🥑🥑🥑🥑🥑🥑🥑🥑

⏩မြန်မာ့ထောပတ်သီးများ ပြည်ပဈေးကွက် အလားအလာ ပြန်လည်ကောင်းမွန်လာနေပြီး ပုံမှန် လမ်းကြောင်းဖြင့် ပြန်လည်တင်ပို့နိုင်မည်ဖြစ်ကြောင်း မြန်မာနိုင်ငံထောပတ်သီးစိုက်ပျိုးထုတ်လုပ်တင်ပို့ ရောင်းချသူများအသင်း၊ တာဝန်ရှိသူတစ်ဉီးက ပြောကြားသည်။

⏩လက်ရှိတွင် ပြည်တွင်းဝယ်လိုအားဖြင့်ပင် အရောင်းအဝယ်ကောင်းမွန်နေသည့် အနေအထားဖြစ်နေပြီး ၂၀၂၁ ခုနှစ်တွင် ကပ်ရောဂါအခြေအနေများကြောင့် ပြည်ပသို့ ပုံမှန်လမ်းကြောင်းများဖြင့် တင်ပို့နိုင်ခြင်း မရှိခဲ့ကြောင်း အဆိုပါအသင်းမှ အတွင်းရေးမှူး ဦးကျော်စိုးမင်းက ပြောကြားသည်။ လာမည့် အောက်တိုဘာလနောက်ပိုင်းတွင် မြန်မာ့ထောပတ်သီးများ ဈေးကွက်သို့ ရောက်ရှိတော့မည်ဖြစ်ပြီး ပြီးခဲ့သည့်နှစ်က ခြံအရောက်ဝယ်ဈေး တစ်ကီလို ၄,၀၀၀ ကျပ်နှင့် ပြန်လည်ရောင်းချသူမှ တစ်ကီလို ၆,၀၀၀ ကျပ်ဈေးရှိကြောင်း သိရသည်။

⏩“ပြည်ပနိုင်ငံတွေက ထောပတ်သီးဝယ်ဖို့ ကမ်းလှမ်းမှုတွေ ရှိနေတယ်။ ပြည်တွင်းဝယ်လိုအားကောင်းနေတော့ မနှစ်ကဆိုရင် စင်္ကာပူနဲ့ ဒူဘိုင်းကို မပို့နိုင်ခဲ့ဘူး။ နောက်လာမယ့် သုံးနှစ်လောက်ဆိုရင် ပြည်တွင်း ဈေးကွက်ကနေ ပိုလျှံလာမှာဖြစ်လို့ ပြည်ပဈေးကွက် ပိုမိုရရှိရေးနဲ့ တင်ပို့နိုင်ဖို့ စတင်ပြင်ဆင်နေပါပြီ”ဟု ဦးကျော်စိုးမင်းက ပြောသည်။ မြန်မာနိုင်ငံ ထောပတ်သီးစိုက်ပျိုးထုတ်လုပ်တင်ပို့ရောင်းချသူများအသင်း အနေဖြင့် ထိုင်းနိုင်ငံပြပွဲသို့ သွားရောက်ပြသခဲ့ပြီး ၊ ဂျပန်နိုင်ငံကလည်း လာရောက်ပြသရန်ကမ်းလှမ်းထားကြောင်း ၎င်းကပြောသည်။

⏩“ကမ်းလှမ်းတဲ့အဆင့်ဆိုတာက အရောင်းအဝယ်ဖြစ်တာ မဟုတ်သေးဘူး။ ဂျပန်ကလည်း သူတို့ဆီ လာပြသဖို့ ကမ်းလှမ်းမှုတွေ ရှိတယ်။ သွားပြသင့်မပြသင့် ဆုံးဖြတ်ဖို့ လုပ်နေတယ်။ ခုလာမယ့် ထောပတ်သီးရာသီမှာ ထိုင်းနဲ့ နယ်သာလန်ပို့ဖို့ကို အသင်းက ဆုံးဖြတ်ထားပါတယ်။ ပြည်တွင်းမှာ ဝယ်လိုအားကောင်းတာကြောင့် ပြည်ပကို ကောင်းကောင်းမပို့နိုင်သေးဘူး”ဟု ၎င်းက ပြောသည်။

⏩မြန်မာ့ထောပတ်သီးကို ပြည်ပဈေးကွက်နေရာရရှိရေးအတွက် စိုက်ပျိုးသူများက စနစ်တကျနှင့် အရည်အသွေးပိုင်းထိန်းသိမ်းနိုင်ရန် လိုအပ်ပြီး နှစ်စဉ်ပြည်ပဈေးကွက်သို့ တင်ပို့မှုမှာ ထိုင်းနှင့် တရုတ်နိုင်ငံသို့ အများဆုံးဖြစ်၍ တစ်နှစ်လျင် တန်ချိန် တစ်သောင်းခွဲခန့်ရှိကြောင်းသိရသည်။

⏩သီးနှံဈေးကွက်သတင်းများကို တောင်သူဦးကြီးများသိရှိနိုင်ပါရန် တင်ပြအပ်ပါသည်။ 

Sources : ရွှေမန်း (The Farmer Media)