🔸ပြီးခဲ့သည့် ၂၀၁၉-၂၀၂၀ ဘဏ္ဍာနှစ်တွင် မြန်မာ့ဆန်ကို ပြည်ပနိုင်ငံပေါင်း ၆၆ နိုင်ငံနှင့် ဆန်ကွဲကို နိုင်ငံပေါင်း ၆၀ သို့ တင်ပို့နိုင်ခဲ့ပြီး၊ ယင်းအထဲတွင် နှစ် အနည်းငယ်ကြာ ဝယ်ယူမှု ရပ်နားခဲ့သည့် နိုင်ငံအချို့ ပြန်လည်ဝယ် ယူလာခြင်းဖြစ်ကြောင်း သိရသည်။

🔸ယင်းသို့ ပြန်လည်ဝယ်ယူလာခြင်းမှာ မြန်မာ့ဆန် အရည်အသွေး ကောင်းလာခြင်း၊ ဈေးနှုန်းသင့်တင့် ခြင်းအပြင် ဘဏ်လုပ်ငန်းဆိုင်ရာ ကိစ္စများ အဆင်ပြေလာခြင်းတို့ကြောင်လည်း ပါဝင်ကြောင်း မြန်မာနိုင်ငံ ဆန်စပါးအသင်း ချုပ် ဥက္ကဋ္ဌ ဦးရဲမင်းအောင်က ပြောသည်။  

🔸၎င်းက “ မြန်မာ့ဆန်က အရည်အသွေး ကောင်းလာတယ်။ ဈေးနှုန်းအားဖြင့်လည်း သင့်တင်တယ်။ ပြီးတော့ ဆန် ဝယ်ယူတဲ့အခါ ဘဏ်နဲ့ ချိတ်ဆက်လုပ်ရတဲ့ လုပ်ငန်းတွေ အဆင်ပြေလာတဲ့ အတွက်ကြောင့်ပါ။ ဒါကြောင့် ပြီးခဲ့တဲ့ ၂၀၁၉-၂၀၂၀ ဘဏ္ဍာနှစ်မှာဆိုရင် ကိုဗစ်ရောဂါ ကာလတွေ ပါဝင်နေတာတောင် နိုင်ငံပေါင်း ၆၆ နိုင်ငံ လောက် ဆန် တင်ပို့နိုင်တယ်။ အဲဒီထဲမှာ ဆန်ဆိုရင် မလေးရှားတို့၊ ဆန်ကွဲဆိုရင် အင်ဒိုနီးရှားတို့လို နှစ်အ နည်းငယ်ကြာ ဝယ်ယူမရှိတဲ့ နိုင်ငံတွေက များများပြန်ဝယ်လာကြတယ်” ဟု ဆိုသည်။

🔸၂၀၁၉-၂၀၂၀ ဘဏ္ဍာနှစ်တွင် ဆန်တင်ပို့မှု အများဆုံး ၁၀ နိုင်ငံတွင် တရုတ်၊ ဖိလစ်ပိုင်၊ မလေးရှား၊ ပိုလန်၊ ကင် ညာ၊ တိုဂို စသည့်နိုင်ငံများ ပါဝင်ခဲ့ကြောင်း မြန်မာနိုင်ငံ ဆန်စပါး အသင်းချုပ်၏ထုတ်ပြန်ထားချက် အရ သိရသည်။  

🔸၂၀၁၈-၂၀၁၉ ဘဏ္ဍာနှစ်တွင် ပြည်ပသို့ ဆန် တန်ချိန် ၁ဒသမ၈ သန်းကျော်နှင့် ဆန်ကွဲတန်ချိန် ဝဒသမ၅ သန်း ကျော် စုစုပေါင်းတန်ချိန် ၂ဒသမ၃ သန်းကျော် တင်ပို့ခဲ့ပြီး၊ ဝင်ငွေ ကန်ဒေါ်လာ ၇၀၉ဒသမ၆၉၃ သန်း ရရှိခဲ့ရာမှ ၂၀၁၉-၂၀၂၀ ဘဏ္ဍာနှစ်တွင် ပြည်ပသို့ ဆန်တန်ချိန် ၁ဒသမ၆ သန်းကျော်နှင့် ဆန်ကွဲတန်ချိန် ဝဒသမ၉ သန်း ကျော်၊ စုစုပေါင်းတန်ချိန် ၂ဒသမ၅ သန်းကျော် တင်ပို့ခဲ့ပြီး ဝင်ငွေ ကန်ဒေါ်လာ ၇၉၄ဒသမ၃၈၈ သန်း ရရှိခဲ့ သဖြင့် ၂၀၁၉-၂၀၂၀ ဘဏ္ဍာနှစ်တွင် ဝင်ငွေ ကန်ဒေါ်လာ သန်း ၈၀ ကျော် ပိုမိုရရှိခဲ့ကြောင်း သိရသည်။  

🔸လက်ရှိ ၂၀၂၀-၂၀၂၁ ဘဏ္ဍာနှစ်မှာလည်း အစပိုင်းသာ ရှိသေးသဖြင့် ဆန်တင်ပို့မှု အခြေအနေကို ခန့်မှန်းရန် ခက်ခဲနေပြီး၊ နိုဝင်ဘာလနှင့် ဒီဇင်ဘာလများ၏ တင်ပို့နိုင်မှု အခြေအနေကို စောင့်ကြည့် ရဦးမည်ဖြစ်ကြောင်း ဦး ရဲမင်းအောင်က မှတ်ချက်ပြုသည်။

🔸လက်ရှိတွင် မြန်မာနိုင်ငံမှ နှစ်စဉ် ဆန်ချိန် ၁၃ သန်းခန့် ထုတ်လုပ်ပေးနေပြီး၊ ပြည်တွင်းစားသုံးမှု တန်ချိန် ၁၀ သန်းခန့် ရှိသည့်အတွက် ပိုလျှံသည့် ဆန်များအား ပြည်ပသို့ တင်ပို့နေခြင်းဖြစ်သည်။  

Sources : ကျော်ကျော်(AMIA)  

ရန်ကုန်၊ နိုဝင်ဘာ ၁၂ ရက်။