🍃🥭🍃🥭🍃🥭🍃🥭🍃🥭🍃

✅တရုတ်နိုင်ငံသို့ မြန်မာ့သရက်သီးများတင်ပို့ရန် နီးကပ်လာပြီဖြစ်၍ မန္တလေးတိုင်းဒေသကြီးအတွင်းရှိ သရက်ခြံများတွင် သရက်ပွဲစားများက ခြံပြတ်ဈေးဖြင့်ဝယ်ယူနိုင်ရန် ၎င်းတို့၏ ကိုယ်စားလှယ်များ စေလွှတ်၍ ကွင်းဆင်းကြည့် ရှုနေကြပြီဖြစ်ကြောင်း မတ္တရာမြို့နယ်မှ သရက်ခြံပိုင်ရှင် ဦးသန်းလွင်က ပြောသည်။

✅လက်ရှိတွင် မန္တလေးတိုင်းဒေသကြီးအတွင်းမှ သရက်သီးများသည် ကြက်ဥခန့်အရွယ်များနှင့် အိတ်စွပ်ရမည့်အရွယ်သို့ ရောက်ရှိနေပြီဖြစ်၍ ခြံပြတ်ဈေးဖြင့် ဝယ်ယူမည့် သရက်ပွဲစားများအတွက် အသီးရေတွက်ချက်ခန့်မှန်းရန် သေချာသလောက်ရှိသည်ဟု ဆိုသည်။

✅“ပြီးခဲ့တဲ့လက မြန်မာနိုင်ငံဘက် မုန်တိုင်းဝင်ခဲ့ပေမယ့် အထက်ပိုင်းမှာသက်ရောက်မှုနည်းတယ်။ ရွာခဲ့တဲ့ မိုးကလည်း အသီးတွေအတွက် ထိခိုက်တာမရှိတော့ အထွက်နှုန်းမကျနိုင်ဘူး။ တရုတ်လမ်းပိုင်းက သင်္ကြန်ပြီးရင်ဖွင့်မယ်ကြားတော့ ပွဲစားတွေရဲ့ကိုယ်စားလှယ်တွေက သရက်ခြံတွေ လိုက်ကြည့်နေကြပြီ” ဟု ၎င်းကပြောသည်။

✅တရုတ်နိုင်ငံသို့ မြန်မာ့သရက်သီးတင်ပို့မှုသည် ထွက်နှုန်း၏ သုံးပုံနှစ်ပုံခန့်ရှိသောကြောင့် သရက်သီး ဈေးကွက်မှာ တရုတ်နယ်စပ်ကုန်သွယ်ရေးလမ်းကြောင်းပေါ် အဓိကတည်မှီနေပြီး သရက်သီးများ နယ်စပ်လမ်းကြောင်းမှတင်ပို့မှုတွင် လမ်းပိုင်းကြန့်ကြာမှုမရှိမှ အပျက်အစီးနည်းပါးပြီး အရည်အသွေးကောင်း သရက်သီးများတင်ပို့နိုင်ကာ ဈေးကောင်းရရှိမည်ဖြစ်ကြောင်းသိရသည်။

✅“လက်ရှိတော့ တရုတ်နယ်စပ်ကုန်သွယ်ရေးဂိတ်က ပိတ်ထားပေမယ့် သင်္ကြန်ပြီးချိန် ဧပြီ (၂၀) ရက်လောက်မှာ ဖွင့်မယ်ကြားတယ်။ မြန်မာ့သရက်သီးက နယ်စပ်လမ်းပိုင်းကနေ တရုတ်ဈေးကွက် အဓိကဖြစ်တော့ ခရီးကဝေးပြီး ကုန်သွယ်ရေးဂိတ်အခြေအနေ၊ လမ်းပိုင်းအခြေအနေတွေအရ စွန့်စားပြီး သွားကြရမှာပါ” ဟု မြန်မာ့သရက်ဈေးကွက်နှင့် နည်းပညာအဖွဲ့အတွင်းရေးမှူးဦးကျော်စိုးနိုင်က ပြောသည်။

✅မန္တလေးတိုင်းဒေသကြီးအတွင်း သရက်ခြံများသို့ ခြံပြတ်ဝယ်ယူရာ၌ ပွဲစားများအနေဖြင့် သရက်သီး တစ်လုံးလျှင် ပျမ်းမျှ ၁၅၀ ကျပ်ဝန်းကျင်နှုန်းထားဖြင့် ခြံတစ်ခြံမှ ထွက်ရှိမည့် အသီးအရေအတွက်အပေါ် ဈေးဖြတ်ဝယ်ယူကြကြောင်း သိရပြီး ဝယ်ယူသူများမှာလည်း လမ်းပန်းအခြေအနေ၊ နယ်စပ်ဂိတ် အခြေအနေတို့ကို ခန့်မှန်းကာ အရှုံး၊ အမြတ်ရာနှုန်းတွက်ချက်ကာ ဈေးတွက်ချက်ပေးကြောင်း သိရသည်။

✅မြန်မာနိုင်ငံအလယ်ပိုင်းမှ သရက်ခြံအများစုတွင် သရက်သီးများမှာ အိတ်စွပ်သည့် အရွယ်သို့ ရောက်ရှိနေပြီး အိတ်စွပ်ပြီး ရက် (၃၀) နှင့် (၄၅) ရက်တွင် ခူးစွတ်၍ ဈေးကွက်တင်နိုင်တော့မည်ဖြစ်ကာ ယခုနှစ်ဈေးကွက်သည် သင်္ကြန်ပြီးကာလ ဧပြီနောက်ဆုံးပတ်တွင် တရုတ်ဈေးကွက်၏ သရက်သီး အဖွင့်ဈေးကို သိရှိရမည်ဟုဆိုသည်။

Sources : ရွှေမန်း (The Farmer Media)