🌾🌱🌾🌱🌾🌱🌾🌱🌾🌱🌾

✔️နှစ်နှစ်ဆက်တိုက် နွေစပါး ရေပေးဝေနိုင်ခြင်းမရှိသည့် သဖန်းဆိပ်ဆည်မှ လာမည့် နွေစပါး စိုက်ရာသီတွင် ရေပေးဝေနိုင်မည်ဖြစ်ကြောင်း နိုဝင်ဘာလ (၁၇) ရက်က စစ်ကိုင်းတိုင်းဒေသကြီး စိုက်ပျိုးရေးဦးစီးဌာနမှ ထုတ်ပြန်ထားသည်။

✔️သဖန်းဆိပ်ဆည်ရေမှ ၂၀၂၁-၂၀၂၂ခုနှစ် နွေစပါးနှင့် အခြားသီးနှံများ စိုက်ပျိုးရန်အတွက် ၂၀၂၂ခုနှစ် ဖေဖော်ဝါရီလ (၇) ရက်တွင် စတင်ရေပေးဝေမည်ဖြစ်ကြောင်း၊ လာမည့်စိုက်ပျိုးရာသီတွင် နွေစပါး ၂၇၃,၀၀၀ ဧကနှင့် အခြားသီးနှံ ၇၅,၀၀၀ ဧက စိုက်ပျိုးရန်လျာထားကြောင်း စစ်ကိုင်းတိုင်းဒေသကြီး စိုက်ပျိုးရေးဦးစီးဌာန တိုင်းဦးစီးမှုး ဦးဝင်းလှိုင်ဦးက ပြောကြားသည်။

✔️ထို့ပြင် သီးနှံများအချိန်မှီစိုက်ပျိုးနိုင်ရေး ကွင်းဆင်းညှိနှိုင်းမှုများကိုလည်း ဆောင်ရွက်နေကြောင်းနှင့် နွေစပါးအနေဖြင့် သက်တမ်းနု စပါးမျိုးစိုက်ပျိုးရန် နှင့် စျေးကွက်စျေးကောင်းသည့် ပဲတီစိမ်းနှင့် နှမ်းကိုစိုက်ပျိုးရန် အကြံပြုထားကြောင်း သိရသည်။

✔️“သဖန်းဆိပ်ဆည်တာဝန်ခံအနေနဲ့ နွေစပါးရေပေးဝေနိုင်မှုအခြေနေကို တွက်ချက်တင်ပြလာပါတယ် ။ အခြားသီးနှံတွေအတွက်ပါ ရေလုံလောက်စွာပေးဝေနိုင်လို့ စိုက်ပျိုးရေးညှိနှိုင်းမှုအဖွဲ့တွေနဲ့ လာမယ့် နွေမှာ သီးနှံစိုက်ပျိုးမှုများကိုအချိန်မှီစိုက်ပျိုးနိုင်ရေးဆောင်ရွက်နေပါတယ် ။ နွေစပါးကိုတော့ သက်တမ်းတိုစပါးမျိုး၊ အခြားသီးနှံတွေအနေနဲ့ ပဲတီစိမ်းနှင့်နှမ်းကိုစိုက်ပျိုးပါမယ်။ မနှစ်က အခြားသီးနှံ ဧက၇၀,၀၀၀ ကျော်သာစိုက်ပျိုးနိုင်ခဲ့ပေမယ့် ဒီနှစ် ၇၅,၀၀၀ ကျော်စိုက်နိုင်မှာပါ”ဟု ၎င်းက ပြောသည်။

✔️သဖန်းဆိပ်ဆည်မှ ရေလုံလောက်မှုမရှိခြင်းကြောင့် နွေစပါးမစိုက်ပျိုးနိုင်သည်မှာ နှစ်နှစ်ရှိပြီဖြစ်ပြီး၊ သွင်းအားစုစျေးများမြင့်တက်နေခြင်း နှင့် စပါးစျေးကွက် ကောင်းခြင်း၊မကောင်းခြင်းများကို ထည့်မတွက်နိုင်သေးသော်လည်း နွေစပါးပြန်လည်စိုက်ပျိုးရမည်ကို ဝမ်းသာကြောင်း ကန့်ဘလူမြိုနယ် စိန်နားကျေးရွာမှ တောင်သူ ကိုထွန်းနိုင်ဦးက ပြောသည်။ “ဒီနှစ်နွေစပါးစိုက်ရမှာမို့ တောင်သူတွေ ဝမ်းသာနေကြတယ်။ နွေစပါးကိုမစိုက်ရတာနှစ်နှစ်ရှိပါပြီ။ ဒီနှစ်တော့ သဖန်းဆိပ်ဆည် ရေလုံလောက်လို့ စိုက်ပျိုးရမှာပါ။ နွေစပါးမျိုးသက်နု နှာကောက်စပါးမျိုးကို စိုက်မှာပါ”ဟု၎င်းကပြောသည်။

✔️တောင်သူများအနေဖြင့် မိုးစပါးနှင့် မိုးသီးနှံရိတ်သိမ်းအပြီး နွေစပါးနှင့် အခြားသီးနှံများအချိန်မှီ စိုက်ပျိုးနိုင်ရေးအတွက် စိုက်ပျိုးရေးဦးစီးဌာနမှ ထုတ်ပြန်ထားသော သီးနှံပိုးမွှားရောဂါ ကြိုတင် ကာကွယ်ရေးဆိုင်ရာညွှန်ကြားချက်များ၊ မြေဆီလွှာအဟာရဖြည့်တင်းရေးဆိုင်ရာလုပ်ငန်းများနှင့် မျိုးကောင်းမျိုးသန့်မျိုးစေ့များကြိုတင်စုဆောင်းရေးဆိုင်ရာ လုပ်ငန်းများကို စိုက်ပျိုးရေးဦးစီးဌာနနှင့် ချိတ်ဆက်၍ ပြင်ဆင်ဆောင်ရွက်ထားကြရန်လည်း နှိုးဆော်ထားသည်။

Credit to : ရွှေမန်း(The Farmer Media)