🥭🥭🥭🥭🥭🥭🥭🥭🥭🥭

✅ ပြည်တွင်းမှထွက်ရှိသော စိန်တလုံးသရက်သီးများမှာ ပေါ်ဦးပေါ်ဖျားဖြစ်သည့်အပြင် အထွက်နှုန်း နည်းခြင်းကြောင့် ယခုနှစ်သရက်ဈေးကွက်တွင် ယမန်နှစ်ထက် ၂ ဆခန့်ဈေးရှိနေပြီး တစ်လုံးလျှင် ငွေကျပ် ၇၀၀ မှ ၁,၅၀၀ ကျော် ပေါက်ဈေးရှိနေသည်။

✅ ယမန်နှစ်က ပေါ်ဦးပေါ်ဖျား၌ စိန်တလုံးသရက်သီးတစ်လုံးလျှင် ငွေကျပ် ၇၀၀ အမြင့်ဆုံးရှိခဲ့သော်လည်း ယခုနှစ်တွင် အရည်အသွေးကောင်း Export အသီးများမှာ ငွေကျပ် ၁,၅၀၀ အထက်ရှိသည်ဟု သရက်ဈေးကွက်နှင့် နည်းပညာအသင်းမှ အတွင်းရေးမှူး ဦးကျော်စိုးနိုင်က ပြောသည်။

✅ “ပြည်တွင်းဈေးကွက်မှာကိုပဲ စိန်တလုံးသရက်သီးက မနှစ်ကထက် ဈေးနှစ်ဆလောက်ဖြစ်နေတယ်။ တရုတ်ကိုပို့နေကြတာကလည်း အစမ်းဈေးကွက်သဘောမျိုးဖြစ်ပြီး ဈေးကောင်းရနေတယ်။ ဒီဈေး ကွက်ကိုထိန်းနိုင်ဖို့ဆိုရင် အရည်အသွေးကောင်းတင်ပို့ကြဖို့လိုပါတယ်” ဟု ၎င်းက ပြောသည်။

✅ သရက်သီးမှာ ပြည်တွင်းစားသုံးမှုနှင့် ပြည်ပဈေးကွက်တွင် ရောင်းအားကောင်းသောသစ်သီးဖြစ်၍ ဈေးကွက်သို့တင်ပို့ရာ၌ အရည်အသွေးကို အဓိကထားရန်လိုကြောင်း၊ အရည်အသွေးမကောင်းပါက ဈေးကွက်တွင် ခေတ္တသာဈေးကောင်းရနိုင်သည်ဟု ဆိုသည်။

✅ “လွန်ခဲ့တဲ့ ဆယ်စုနှစ်ကဆိုရင် သရက်သီးတစ်ခြင်းကို ယွမ်ငွေ (၂၀ -၂၅) လောက်ထိဖြစ်ခဲ့ဖူးတယ်။ အရည်အသွေးမမှီတဲ့ သရက်တွေကိုခူးဆွတ်ပြီး တရုတ်ဈေးကွက်တင်ပို့ရင် နောက်လူတွေလည်း နစ်နာမှာဖြစ်သလို ဈေးကွက်ထိခိုက်မှာပါ။ ခုပေါ်ဦးပေါ်ဖျားမှာ ဝယ်သွားတဲ့ တရုတ်ကုန်သည်တွေ ရှုံးတယ်လို့ ကြားရတယ်” ဟု ၁၀၅ မိုင် ကုန်သွယ်ရေးဇုန်မှပွဲစားတစ်ဦးက ပြောသည်။

✅ ပြည်တွင်းဈေးကွက်၌ စိန်တလုံးသရက်တစ်လုံးလျှင် ငွေကျပ် ၁,၅၀၀ အထက်ရှိပြီး တစ်လုံးလျှင် ငွေကျပ် ၇၀၀ ဝန်းကျင်ဖြင့် ရောင်းချမှုများလည်းရှိရာ အရည်အသွေးနှင့်ထွက်ရှိရာဒေသကွာခြားခြင်းကြောင့် ဖြစ်ကြောင်း၊ ပြည်ပတင်ပို့မှုတွင် အရေအတွက်များစွာကို တစ်ပြိုင်တည်းရောင်းချရသော်လည်း ပြည်တွင်းဈေးကွက်၌ လက်လီရောင်းချရခြင်းကြောင်း သိရသည်။

✅ သီးနှံ၊ ဈေးကွက်သတင်းများကို တောင်သူဦးကြီးများသိရှိနိုင်ပါရန် တင်ပြအပ်ပါသည်။ 

Sources : ရွှေမန်း