🫘🥜🫘🥜🫘🥜🫘🥜🫘🥜🫘

⏩ပို့ကုန်ပဲများဖြစ်သည့် မတ်ပဲ၊ ပဲစင်းငုံပဲများနှင့်အတူ မြေပဲဆံ၊ ကုလားပဲအုပ်စုနှင့် ပဲမာလိုင်းပဲအချို့ ယခုသီတင်းပတ်အတွင်း စျေးမြင့်တက်ကာ အဝယ်သွက်နေကြောင်း ပဲနှမ်းကုန်သည်များထံက သိရသည်။

⏩မန္တလေးပဲနှမ်းစျေးကွက်တွင်သာ ဝယ်ယူနိုင်သည့် မြေပဲဆံစျေးမှာ အသစ်ဝင်ရောက်မှုနည်းလာခြင်း ကြောင့် တစ်ပိဿာ ကျပ် ၄,၀၀၀ ခန့် ယခင်စျေးကို ပြန်လည်ရောက်ရှိလာသည်။ အိန္ဒိယလိုင်းမှ အဝယ်ကောင်းလာသဖြင့် မတ်ပဲနှင့် ပဲစင်းငုံဈေးတို့မှာလည်း မြင့်တက်လာကာ အဝယ်သွက်နေသည်။ တရုတ်လိုင်းတင်ပိုသည့် ပဲတီစိမ်းအတွက်မူ စျေးအနည်းငယ်ကျဆင်းမှုရှိသော်လည်း ပေါက်စျေးအတိုင်း အရောင်းအဝယ်ကောင်းနေသည်။

⏩“မြေပဲဆံမှာ မန္တလေးစျေးကွက်တွင်သာ ဝယ်လို့ရတာမို့ ပြည်တွင်းဆီစက်ပိုင်များ ဝယ်လိုအားကောင်း တော့ တစ်ပိဿာ ကျပ် ၄,၀၀၀ စျေးပြန်ဖြစ်လာပါတယ်။ ပဲတီစိမ်းကတော့ တစ်အိတ် ၁၃၇,၀၀၀ -၁၃၈,၀၀၀ စျေးထိကျဆင်းသွားပါတယ်။ ရန်ကုန်အဝယ်ရှိလာလို့ မတ်ပဲနဲ့ ပဲစင်းငုံက စျေးမှာ အရောင်းအဝယ်သွက်စျေးမြင့်တက်လာပါတယ်။ မတ်ပဲ စျေးက တစ်အိတ် ၁၄၅,၀၀၀ - ၁၄၇,၀၀၀ ပေါက်စျေးရှိပါတယ်။ ပဲစင်းငုံ တစ်အိတ် ၁၃၀,၀၀၀ စျေးထိ မြင့်တက်လာပါတယ်။

⏩"နှမ်းနက်စျေးကတော့ စျေးကျဆင်းနေပါတယ်။ အိန္ဒိယပို့ကုန်ပဲတွေ စျေးငြိမ်အဝယ်သွက်လာပါတယ်။ တရုတ်လိုင်းပဲတွေကတော့ စျေးကျဆင်းမှုရှိနေပေမယ့် အဝယ်တော့သွက်ပါတယ်။ ပဲမာလိုင်းတွေ ကတော့ ကုလားပဲအုပ်စု စျေးတက်လာပါတယ်။ မြေထောက်ပဲ၊ စွန်တာပြာတို့ တစ်အိတ်ကျပ် ၁၀,၀၀၀ ခန့်၊ ကျွန်းစားတော်ပဲ တစ်အိတ်ကျပ် ၂၀,၀၀၀ခန့် တက်လာတာကလွဲရင် အခြားပဲတွေထူခြားမှုမရှိ စျေးဆက်ငြိမ်နေပါတယ်” ဟု မန္တလေးတိုင်းဒေသကြီး ကုန်သည်များနှင့် စက်မှုလက်မှုလုပ်ငန်းရှင်များ အသင်း ဒုတိယဥက္ကဋ္ဌဦးကျော်သွင် (ရွှေစင်သိန်းပွဲရုံ) က ပြောသည်။

🫘ပဲစင်းငုံ၊ မတ်ပဲ၊ ပဲတီစိမ်း🫘

အိန္ဒိယပို့ကုန်မတ်ပဲနှင့် ပဲတီစိမ်းမှာ စျေးငြိမ်ကာ အဝယ်သွက်လာပြီး ယခင်သီတင်းပတ်ထက် စျေးအနည်းငယ်မြင့်တက်လာသော်လည်း ပဲစင်းငုံမှာမူ တစ်အိတ်ကျပ် ၁၃၀,၀၀၀ ခန့်ဖြင့် စျေးတည်ငြိမ်နေသည်။ မတ်ပဲ တစ်အိတ် ကျပ် ၁၄၅,၀၀၀ - ၁၄၇,၀၀၀ ဈေးရှိပြီး ပဲတီစိမ်းရွှေဝါမှာ လက်ရှိပေါက်စျေး ထိပ်စ တစ်အိတ်ကျပ် ၁၃၇,၀၀၀ - ၁၃၈,၀၀၀ ဖြင့် အရောင်းအဝယ်သွက်နေသည်။ ပဲတီစိမ်းခွဲပဲစျေးမှာမူ စျေးကျဆင်းလာနေသည်။

🥜မြေပဲ🥜

မန္တလေးကုန်စည်ဒိုင်သို့ မြေပဲဆံ အသစ်ဝင်ရောက်မှုရပ်သွားပြီးနောက် မြေပဲဆံစျေးမှာ ဆီစက်ပိုင်များ ကုန်ကြမ်းဝယ်ယူမှုများကြောင့် S1 မြေပဲဆံ တစ်ပိဿာ ကျပ် ၄,၀၀၀ - ၄,၁၅၀ ပေါက်ဈေးဖြစ်လာသည်။ ယခင်သီတင်းပတ်က ရက်ပိုင်းခန့် ကျပ် ၄,၀၀၀ အောက်သို့ ရောက်ရှိခဲ့သည်။ အနီလုံးဆံနှင့် အခြားအမျိုးအစားများမှာ တစ်ပိဿာ ကျပ် ၃,၉၀၀နှင့်အောက်တွင် ရှိနေသည်။

⏩ပြည်တွင်းသုံး ပဲမာလိုင်းများမှာ ကုလားပဲဗွီးတူး ကျပ် ၁၄၈,၀၀၀ ဈေးရှိကာ အမျိုးအစားအလိုက် တစ်အိတ် ၅,၀၀၀ကျပ် ဈေးမြင့်တက်လာပြီး၊ ပဲယင်းတစ်အိတ်ကျပ် ၁၄၂,၀၀၀ ၊ ပဲကြီးတစ်အိတ်ကျပ် ၁၉၇,၀၀၀၊ ပဲထောပတ်တစ်အိတ် ကျပ် ၁၄၀,၀၀၀ ၊ စွန်တာပြာတစ်အိတ် ကျပ် ၁၃၂,၀၀၀၊ မြေထောက်ပဲ တစ်အိတ် ကျပ် ၁၇၀,၀၀၀ ၊ ကျွန်းစားတော်ပဲတစ်အိတ် ကျပ် ၂၈၀,၀၀၀ အသီးသီးပေါက်စျေးရှိသည်။

Sources : ရွှေမန်း (The Farmer Media)