🌿🍃🍀🍃🌿🌿🍃🍀🍃🌿

↗️ကိုဗစ်-၁၉ ရောဂါ တကျော့ပြန်ဖြစ်ပွားမှုများကြောင့် ပြည်တွင်းစားသုံးမှုများသည့် ကုလားပဲများ စျေးကောင်းလာပြီး အိန္ဒိယပို့ကုန်ပဲများမှာမူ စျေးငြိမ်လျက်ရှိကာ တရုတ်ပို့ကုန် ပဲ၊ နှမ်း ၊မြေပဲတို့ ဝယ်လိုအားနည်းကာ စျေးကွက်ကျဆင်းနေကြောင်း မန္တလေးပဲကုန်သည်များထံမှသိရသည်။

↗️ဇူလိုင်စျေးကွက်မှာ အိန္ဒိယပို့ကုန်ပဲများ သင်္ဘောတင်နောက်ဆုံးပတ်ဖြစ်သဖြင့် ယခင်လက စျေးကွက်ဝယ်လိုအာ ကောင်းနေခဲ့ပြီးနောက်ပိုင်းတွင် အဝယ်အေးသွားခြင်းဖြစ်ကြောင်း နှင့် တရုတ်နိုင်ငံပို့ ကုန်ပဲများဖြစ်သည့် ပဲတီစိမ်း ၊မြေပဲ ၊နှမ်း နှင့် အခြားပဲမာလိုင်းများမှာ လမ်းပန်းဆက်သွယ်မှုအခက်အခဲ ၊ နယ်စပ်ဂိတ်များ အဝင်ပိပင်မှုများကြောင့် ဝယ်လိုအားကျဆင်းမှုနှင့် အတူ စျေးကွက်ပါ ကျဆင်းသွားခြင်းဖြစ်ကြောင်း မန္တလေး ကုန်စည်ဒိုင် အတွင်းရေးမှူး ဦးဆက်မောင်ဆွေက ပြောသည်။

↗️“လက်ရှိမှာ နယ်စပ်ဂိတ်တွေ ပိတ်ကုန်တာရယ် ၊ငွေကြေးလည်ပတ်မှု ခက်ခဲတာကြောင့်ပါ။ လာမည့်ဇူလိုင်စျေးကွက်က လမ်းပန်းဆက်သွယ်ရေးလည်းမကောင်းဘူး။ ပြည်တွင်းမှာ ကိုဗစ်-၁၉ ကလည်း ပြန်ဖြစ်လာတော့ အိန္ဒိယ လိုအပ်ချက်ရှိတဲ့ ပဲစင်းငုံ ၊မတ်ပဲ ကတော့ စျေးငြိမ်နေမယ်။ ပြည်တွင်းသုံးကုလားပဲအုပ်စု စျေးကောင်းလာမယ်။ တရုတ်လိုင်းသွားတဲ့ ပဲတီစိမ်း ၊မြေပဲ နှမ်း ၊ပဲမာလိုင်းတွေကတော့ ဝယ်လိုအားမရှိ စျေးကွက်ကျဆင်းနိုင်တယ်” ဟု၄င်းကပြောသည်။

⏩ကုလားပဲ⏪

ဇွန်လကုန်နောက်ဆုံးရက်များက ကုလားပဲ-V2 သုံးတင်းဝင်တစ်အိတ်လျှင် ကျပ် ၉၃,၀၀၀ ပေါက်စျေးရှိရာမှ ဇူလိုင်လ ၅ ရက်နေ့တွင် တစ်အိတ်ကျပ် ၉၇,၀၀၀ စျေးထိ မြင့်တက်လာခဲ့သည်။ အလားတူ ကုလားပဲ V7 ၊ကုလားပဲ (929)၊ကုလားပဲထိုင်ဝမ် စျေးများမှာ တစ်အိတ်ကျပ် ၅,၀၀၀ ဝန်းကျင် အသီးသီးစျေးမြင့်တက်လာကြောင်း သိရသည်။ ဇူလိုင်လ ၅ ရက်နေ့တွင် ကုလားပဲ V2 ၅၇ ပိဿာ တစ်အိတ် ကျပ် ၉၆,၀၀၀-၉၇,၀၀၀ ၊ ကုလားပဲ V7 တစ်အိတ် ၉၅,၀၀၀၊ ကုလားပဲ (ထိုင်ဝမ်) ၈၉,၀၀၀ ၊ ကုလားပဲ (929) ၉၂,၀၀၀ ကျပ် ပေါက်စျေးဖြစ်လာသည်။ “ကုလားပဲအုပ်စုတွေ ကတော့ ပြည်တွင်းသုံးစွဲမှုမြင့်မားလာတော့ သုံးတင်းတစ်အိတ်ကို ကျပ် ၅,၀၀၀ လောက် စျေးတက်တယ်။ စားတော်ပဲ(ကနေဒါ) ပဲက တရုတ်နိုင်ငံကနေ မဝင်သလောက်ဖြစ်သွားတော့ စျေးကွက်မှာ တစ်အိတ်ကျပ် ၁၁၅,၀၀၀-၁၂၀,၀၀၀ စျေးလောက်ထိမြင့်တက်လာတယ်။ စားတော်ပဲ စားသုံးမှုကနေ ပြည်တွင်းကုလားပဲတွေ ပြောင်းလဲစားသုံးရတော့မည့်အခြေအနေဖြစ်လာပါတယ်” ဟု ၎င်းက ပြောသည်။

⏩မတ်ပဲ ၊ ပဲစင်းငုံ⏪

အိန္ဒိယ ပဲစျေးကွက်သို့ ပဲတင်ပို့ရက်နီးကပ်လာတာနှင့်အတူ မတ်ပဲစျေး အနည်းငယ်မြင့်တက်ခဲ့ပြီး ပဲစင်းငုံ (၂၀၂ဝ ပဲအဟောင်း)စျေးလည်း တစ်အိတ်ကျပ် ၃,၀၀၀ ခန့်စျေးတက်လာသော်လည်း ပဲသစ်များ စျေးတည်ငြိမ်သည်။ သင်္ဘောတင်ရက်ပြီးသွားပါက ဇူလိုင်စျေးကွက်အတွက် စျေးကွက်ပြန်အေးသွားနိုင် ကြောင်း ပဲကုန်သည်များက သုံးသပ်ထားသည်။ ဇူလိုင်လ ၅ ရက်နေတွင် မတ်ပဲသုံးတင်း ဝင်တစ်အိတ် လျှင် ကျပ် ၁၀၈,၀၀၀ - ၁၁၀,၀၀၀ စျေးဖြင့် တစ်အိတ်ကျပ် ၃,၀၀၀ ခန့် စျေးတက်သွားသည်။ အလားတူ ပဲစင်းငုံစျေးမှာလည်း ဇူလိုင်လ ၅ နေ့တွင် ပိသာ ၆ဝသုံးတင်းတစ်အိတ်လျှင် ကျပ် ၁၀၃,၀၀၀ - ၁၀၄,၀၀၀ သာ ပေါက်စျေးရှိနေပြီးစျေးကွက်တည်ငြိမ်နေသည်။