🍃🍂🍃🍂🍃🍂🍃🍂🍃🍂🍃

✅ဧရာဝတီတိုင်းဒေသကြီးအတွင်း ပီလောပီနံကို ကျုံပျော်၊ ရေကြည်၊ ငါးသိုင်းချောင်း၊ ကျောင်းကုန်းနှင့် သာပေါင်းမြို့နယ်များတွင် အဓိကစိုက်ပျိုးလျှက်ရှိသည်။ တိုင်းဒေသကြီးတစ်ခုလုံးအနေဖြင့် ပီလောပီနံစိုက်ပျိုးဧရိယာ ၃ သောင်းကျော်ရှိပြီး တစ်ဧကလျှင်ပျမ်းပျအထွက်နှုန်း ပိဿာ (၃၅၀၀)ခန့် ထွက်ရှိသည်။

✅၂၀၂၀-၂၀၂၁ ဘဏ္ဍာနှစ်မှစတင်ကာ ပီလောပီနံ စိုက်ပျိုးထုတ်လုပ်မှုတွင် သွင်းအားစုဈေးနှုန်း ကြီးမြင့်ခြင်းနှင့် ကုန်ချောဈေးကျခြင်းတို့ ရင်ဆိုင်နေရသည်။ တစ်အိတ်လျှင် ကျပ် ၂၀,၀၀၀ ဝန်းကျင် တန်ဖိုးရှိသော ယူရီးယားဓာတ်မြေဩဇာသည် တစ်အိတ်လျှင် ကျပ် ၈၀,၀၀၀ ခန့်ထိ ဈေးတက်လာသဖြင့် ပီလောပီနံတောင်သူများ ဓာတ်မြေဩဇာအကြိမ်ရေပြည့်မီအောင် အသုံးမပြုနိုင်ပဲ တစ်ဧကအထွက်နှုန်း လည်း ကျဆင်းလာခဲ့သည်။ တစ်ဧကလျှင် ပျမ်းမျှအထွက်နှုန်း ပိဿာ (၂၀၀၀)ဝန်းကျင်ထိကျဆင်းလာ သည်။

✅ထွက်ရှိလာသောပီလောပီနံများကိုရောင်းချရာတွင်လည်း ပြည်တွင်းဈေးကွက်ရှိ စားသုံးသူများနှင့် တိရိစ္ဆာန်အစာတောင့်ထုတ်လုပ်သည့်စက်ရုံများကို အားထား၍ရောင်းချရသည်။ ယခင်ကာလတူနှစ် အတွင်း ပီလောပီနံအတောင့် တစ်ပိဿာလျှင် ကျပ် (၁၃၀) မှ ကျပ် (၈၀)ခန့်အထိဈေးကျဆင်းသွားပြီး ပီလောပီနံမှုန့်သည်လည်း တစ်ပိဿာလျှင် ကျပ် (၈၅၀)မှ ကျပ် (၅၀၀-၅၅၀)ထိ ဈေးကျသွားသည်။

✅ထို့ကြောင့် ယခုနှစ် ပီလောပီနံစိုက်ပျိုးထုတ်လုပ်သူတောင်သူများအချို့သည် အခြားသီးနှံများပြောင်းလဲ စိုက်ပျိုးကြသဖြင့် ပီလောပီနံစိုက်ဧက (၁)သောင်းခန့်လျော့ကျသွားခဲ့သည်။ လွန်ခဲ့သည့် မတ်လနှင့် ဧပြီလများအတွင်း ပီလောပီနံအမှုန့် တစ်ပိဿာဈေးနှုန်း ကျပ် ၇၀၀ ခန့်ရရှိခဲ့သည်။ ပီလောပီနံအပြား ခြောက်ကို လက်ရှိတွင်ပြည်ပသို့ တင်ပို့ရောင်းချနေသော်လည်း တစ်တန်လျှင် ဒေါ်လာ ၂၀၀-၂၅၀ နှုန်းဖြင့် တစ်လလျှင် တန် ၅၀ ခန့်ပမာဏသာ တင်ပို့ရောင်းချနေရသဖြင့် ပြည်ပဈေးကွက်ရရှိမှု နည်းပါးနေသေးသည်။

✅ဈေးကွက်ပိုမိုရရှိရေးနှင့် တရုတ်နိုင်ငံသို့တင်ပို့ရောင်းချနိုင်ရန် ကြိုးပမ်းလျှက်ရှိသည့်အဆင့်မှာပင် ရှိနေသေးပြီး ပီလောပီနံစျေးကွက်ပိုမိုချဲ့ထွင်လာနိုင်ရေးနှင့် ပီလောပီနံအခြေခံထုတ်လုပ်သည့် Value added ထုတ်ကုန်များပိုမိုထုတ်လုပ်လာနိုင်ရေးအတွက် ပြည်ပရင်းနှီးမြှုပ်နှံမှုများလည်း လိုအပ်လျှက် ရှိသေးကြောင်းသိရှိရပါသည်။

✅သီးနှံဈေးကွက်သတင်းများကို တောင်သူဦးကြီးများသိရှိနိုင်ပါရန် တင်ပြအပ်ပါသည်။ 

Sources : ဧရာကုန်သွယ်မှုဗဟိုဌာန

မြန်မာကုန်သွယ်မှုမြှင့်တင်ရေးအဖွဲ့

18-2-2022