🎋🍂🎋🍂🎋🍂🎋🍂🎋🍂🎋

⏭ပြည်တွင်းမှ အဓိကတင်သွင်းနေသည့် အင်ဒိုနီးရှားနိုင်ငံမှ စားအုန်းဆီတင်သွင်း၍ မရတော့သောကြောင့် စျေးနှုန်းများပြန်လည်မြင့်တက်လာခြင်းဖြစ်ကြောင်း လုပ်ငန်းရှင်းများထံမှသိရသည်။

⏭မြန်မာနိုင်ငံအနေဖြင့် စားအုန်းဆီများအား အင်ဒိုနီးရှားနိုင်ငံမှ အဓိက တင်သွင်းနေခြင်းဖြစ်ပြီး အဆိုပါနိုင်ငံမှ နိုင်ငံအတွင်းဖူလှုံဖို့အတွက် နှင့် စျေးနှုန်းကျဆင်းရန် ပြည်ပနိုင်ငံများထံသို့ စားအုန်းဆီ တင်ပို့မှုကို ဧပြီလ(၂၈)ရက် မှ စတင်ကာရပ်ဆိုင်းတော့မည်ဖြစ်ကြောင်းသိရသည်။ ထို့ကြောင့် ပြည်တွင်း စျေးကွက်သို့သက်ရောက်မှုများရှိကာ စားအုန်းဆီစျေးများ မြင့်တက်လာခဲ့ခြင်းဖြစ်ကြောင်း လုပ်ငန်းရှင်များကဆိုသည်။ 

⏭“တချို့ဆို အရောင်းရပ်ထားကြပါတယ်။ ဘာလို့လဲဆိုတော့ တင်သွင်းတာနည်းလာလို့ ခွဲတမ်းမရဘူး။ လိုသလောက်မရဘူး။ ဒါကလဲ မြန်မာနိုင်ငံတစ်ခုပဲ ဖြစ်နေတာမဟုတ်ဘူး အာဆီယံနိုင်ငံတွေ တော်တော်များများဖြစ်နေကြတာပါ” ဟု ပခုက္ကူပဲခွဲစက်မှ ဦးဝင်းမြင့်ဦး ကပြောသည်။ ယခင်တည်းက Covid-19 ကပ်ရောဂါကြောင့် ဆီအုန်းစိုက်ခင်းများ၌ ပြည်ပလုပ်သားများ မလုံလောက်သည့်ပြဿနာ ဖြစ်၍ စားအုန်းဆီအထွက်နှုန်းများ လျော့ကျလာကာ စျေးကွက်လိုအပ်ချက် များလာပြီး ကမ္ဘာစားအုန်းဆီစျေးနှုန်းများ မြင့်တက်လာခဲ့ခြင်းဖြစ်သည်။

⏭နောက်ဆက်တွဲအနေဖြင့်ပြည်တွင်းမှာပါ လိုက်ပါမြင့်တက်လာကာ စားအုန်းဆီ လက်လီတစ်ပိဿာလျှင် ၇,၀၀၀ နီးပါးအထိ ဆက်တိုက်ဆိုသလို မြင့်တက်လာခဲ့ခြင်းဖြစ်သည်။ “စားအုန်းဆီက တစ်ပိဿာကို ၆,၇၀၀ ကျပ် ရောင်းပါတယ်။ ဒီအပတ်အတွင်း တက်သွားတာပါ။ စျေးတက်တော့ အရောင်းဝယ် အေးတယ်” ဟု သင်္ဃန်းကျွန်းမြို့နယ်ရှိ လေးထောင့်ကန်လမ်းပေါ်ရှိ လက်လီလက်ကားရောင်းချ နေသည့်ဆီဆိုင်မှ တာဝန်ရှိသူတစ်ဦးကပြောသည်။ 

⏭ပြည်တွင်းအပြင် တစ်ပတ်အတွင်းဖြစ်ပေါ်ခဲ့သည့် FOB စျေးနှုန်းများအပေါ် အခြေခံတွက်ချက်မှုအရ ကမ္ဘာ့စားအုန်းဆီထုတ်လုပ်တင်ပို့သည့်နိုင်ငံများမှာ စားအုန်းဆီစျေးနှုန်းမြင့်တက်နေကြောင်း စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ ထံမှလည်းသိရသည်။ လက်ရှိ ရန်ကုန်မြို့တွင် စားသုံးသူပြည်သူများစျေးနှုန်းသက်သာစွာ ဝယ်ယူနိုင်ရေးအတွက် စားသုံးဆီ လက်လီစျေးကားများဖြင့် ဆီတစ်ပိသာလျင် ၅,၆၀၀ကျပ် နှုန်းဖြင့် ရောင်းချပေးနေကြောင်း မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များအသင်းမှ သိရသည်။ 

⏭ဒေါ်လာစျေးအပြင် ပြည်ပနိုင်ငံများမှ အဝယ်စျေးပါမြင့်တက်နေခြင်းဖြစ်၍ ဆီလုပ်ငန်းရှင်များပါ ထိခိုက်မူ များရှိခဲ့ပြီး တချို့သောလုပ်ငန်းရှင်များ လုပ်ငန်းရပ်နားထားရကြောင်း သိရသည်။ “စားအုန်းဆီ စျေးတက်နေလို့ အခုဆိုင်ခဏရပ်ထားရတယ်။ ၇,၆၀၀ နဲ့တော့ ဝယ်ပြီး ကြော်မရောင်းနိုင်ဘူး။ စားအုန်းဆီက ခဏခဏတက်နေတာ အဆင်မပြေဘူး” ဟု အကြော်ရောင်းချသူ ဒေါ်လှမြင့်က ပြောသည်။ 

⏭ပြည်တွင်း၌ စားအုန်းဆီသုံးစွဲမူ တစ်နှစ်လျှင် တန်ချိန်၁၀သိန်းကျော်အထိ ရှိသောကြောင့် နှစ်စဥ်တန်ချိန် ၆သိန်း မှ၇သိန်ကြားအား မလေးရှားနိုင်ငံ နှင့် အင်ဒိုနီးရှားနိုင်ငံများမှ စားအုန်းဆီများကို အဓိကထား၍ တင်သွင်းနေရကြောင်းသိရသည်။ ထိုကဲ့သို့ စျေးနှုန်းများမြင့်တက်နေခြင်းကြောင့် ပြည်ပမှ တင်သွင်း နေရသည့် စားအုန်းဆီများအားစားသုံးမှုအတွက် ပြည်တွင်းထုတ်မြေပဲဆီ နှမ်းဆီများကိုပိုမိုပြောင်းလဲ စားသုံးသင့်ကြောင်းသုံးသပ်ကြသည်။ စားအုန်းဆီမြင့်တက်ခြင်းကြောင့် မြေပဲဆီ၊ နှမ်းဆီဈေးများလည်း တစ်ပိဿာကို ၁,၀၀၀ နီးပါးအထိ မြင့်တက်လာသည်။

⏭သီးနှံဈေးကွက်သတင်းများကို တောင်သူဦးကြီးများသိရှိနိုင်ပါရန် တင်ပြအပ်ပါသည်။ 

Sources : AMIA Market News