🫘🥜🫘🥜🫘🥜🫘🥜🫘🥜🫘

➡️ နိုင်ငံခြားပို့ကုန်ပဲများ ဈေးများမြင့်တက်လာနေသော်လည်း ပြည်တွင်းသုံးကုလားပဲများ အပါအဝင်ပဲအားလုံးဈေးတည်ငြိမ်နေကြောင်း ပဲ၊နှမ်းကုန်သည်များထံက သိရသည်။ ပြည်တွင်း ပဲ၊နှမ်းဈေးကွက်မှာ လက်ကျန်ပဲစောစောကုန်တာကြောင့် အမြင့်ဈေးများဖြစ်နေသော်လည်း လက်ရှိအချိန် မိုးရာသီဖြစ်တာကြောင့် အနည်းငယ်ဈေးမြင့်နေခြင်းသာဖြစ်သော်လည်း အရောင်းအဝယ်ခပ်အေးအေးသာရှိနေသည်။

➡️ နိုင်ငံခြားပို့ကုန်ပဲများ ဈေးများပြန်လည်မြင့်တက်လာသော်လည်း ပြည်တွင်းသုံးကုလားပဲနှင့် နှမ်းမျိုးစုံဈေးကွက်ဆက်လက်ကျဆင်းနေကြောင်း၊ စားအုန်းဆီဈေးကျဆင်းမှုနှင့်အတူ ပြည်တွင်း မြေပဲဆန်ဈေးမှာလည်း လိုက်ပါဈေးကျနေကြောင်း၊ လက်ကျန်နည်းလာသည့် ပြည်တွင်းသုံး ကုလားပဲများမှာ အမြင့်ဈေးဖြင့်ဈေးတည်ငြိမ်နေကြောင်း လက်ရှိအချိန်တွင် နိုင်ငံတော်အဆင့် ကုန်ဈေးနှုန်းကျဆင်းရေးဆောင်ရွက်နေတာကြောင့် လာမည့်သီတင်းပတ်များတွင် ဈေးနှုန်းများမြင့်တက်နိုင်စရာမရှိကြောင်း ရွှေစင်သိန်းပွဲရုံမှ ဦးကျော်သွင်က ပြောသည်။

➡️ " ပို့ကုန်မတ်ပဲနဲ့ပဲစင်းငုံကတော့ ဈေးပြန်မြင့်တက်လာပါတယ်။ ပြည်တွင်းသုံးကုလားပဲ ဈေးတစ်ခုပဲလက်ကျန်အရမ်းနည်းလာတော့ ဈေးမကျတာပါ။ ကျန်တဲ့ပဲတွေကတော့ ဈေးခပ်အေးအေးဖြစ်နေပါတယ်။ ပဲတီစိမ်းလည်းဈေးကျတယ်။ နှမ်းမျိုးစုံကလည်း ဈေးကျတယ်။ မြေပဲဆန်ဈေးကလည်း တရုတ်မသွားနိုင်သေးတာရယ် စားဆီဈေးတွေလည်းကျတော့ သူလည်းဈေးလိုက်ကျနေပါတယ်။ နိုင်ငံတော်ကလည်း ကုန်ဈေးနှုန်းတည်ငြိမ်ရေးဆောင်ရွက်နေတာဖြစ်လို့ နောက်သီတင်းပတ်မှာလည်း ပဲ၊ နှမ်းဈေးကွက်က ဈေးတွေတက်စရာမရှိပါဘူး" ´ဟု ၎င်းကပြောသည်။

➡️ စက်တင်ဘာ(၇)ရက်တွင် သုံးတင်းဝင်မတ်ပဲ ပိဿာ ၆၀ တစ်အိတ်လျှင်ငွေကျပ် ၂၄၅,၀၀၀ ပေါက်ဈေး၊ ပဲစင်းငုံပိဿာ ၆၀ တစ်အိတ်လျှင်ငွေကျပ် ၃၈၅,၀၀၀ ပေါက်ဈေး ဖြစ်လာသည်။ ပဲတီ စိမ်းအညာ ၅၆.၂၅ ပိဿာ တစ်အိတ်လျှင် ငွေကျပ်၁၆၀,၀၀၀ ပေါက်ဈေးဖြစ်လာသည်။

➡️ ပြည်တွင်းသုံး ကုလားပဲအုပ်စုမှာ ဈေးမြင့်တက်နေရာမှ အနည်းငယ်ပြန်လည်ကျဆင်းသွားရာ စက်တင်ဘာ(၇)ရက်တွင် ကုလားပဲ V2တစ်အိတ်လျှင် ငွေကျပ် ၂၇၂,၀၀၀၊ V7 တစ်အိတ်လျှင် ငွေကျပ်၂၈၂,၀၀၀၊ ထိုင်ဝမ်ကုလားပဲတစ်အိတ်လျှင် ငွေကျပ် ၂၆၅,၀၀၀၊ ၉၂၉ကုလားပဲတစ်အိတ်လျှင် ငွေကျပ်၂၇၁,၀၀၀ ပေါက်ဈေးဖြစ်လာသည်။

➡️ ပြည်တွင်းသုံးပဲမာလိုင်းများမှာ ပဲကြီးတစ်အိတ်လျှင် ငွေကျပ် ၃၃၀,၀၀၀၊ (မျိုး)၃၄၀,၀၀၀၊ ပဲ ထောပတ်တစ်အိတ်လျှင် ငွေကျပ် ၃၇၅,၀၀၀၊ မြေထောက်ပဲတစ်အိတ် လျှင် ငွေကျပ်၃၇၀,၀၀၀၊ ကျွန်း စားတော်ပဲ တစ်အိတ်လျှင် ငွေကျပ် ၃၈၀,၀၀၀၊ ကနေဒါစားတော်ပဲ တစ်အိတ် ငွေကျပ် ၂၂၀,၀၀၀၊ မြေပဲအနီလုံး ဆန်(ဝိုင်း)တစ်ပိဿာငွေကျပ် ၉,၁၀၀ ပေါက်ဈေးရှိသည်။

➡️ နှမ်းမျိုးစုံဈေးကွက်မှာ ယခင်သီတင်းပတ်ထက် သိသိသာသာဈေးကျဆင်းသွားရာ နှမ်းဖြူ(ဂျပန်) ၄၅ ပိဿာတစ်အိတ်လျှင် ငွေကျပ်၃၉၀,၀၀၀၊ နှမ်းညိုတစ်အိတ်လျှင် ငွေကျပ် ၃၁၅,၀၀၀၊ နှမ်းနက်စမုံ တစ်အိတ်လျှင် ငွေကျပ် ၃၃၀,၀၀၀ ပေါက်ဈေးရှိကြောင်း သိရသည်။

➡️ သီးနှံ၊ ဈေးကွက်သတင်းများကို တောင်သူဦးကြီးများသိရှိနိုင်ပါရန် တင်ပြအပ်ပါသည်။ 

Sources : ရွှေမန်း(မကွေးဂျာနယ်)