🫘🥜🫘🥜🫘🥜🫘🥜🫘🥜🫘

✔️ ဈေးကွက်ကျဆင်းနေသည့် ပို့ကုန်ပဲများနှင့် နှမ်း၊ မြေပဲ ဈေးပြန်မြင့်တက်လာကြောင်း ပဲကုန်သည်များထံကသိရသည်။ ခိုင်မာမှုမရှိသည့် ပို့ကုန် မူဝါဒအပြောင်းအလဲသတင်းများကြောင့် ဈေးကျဆင်းနေသည့် မတ်ပဲ နှင့် ပဲစင်းငုံမှာ ဈေးပြန်မြင့်တက်လာသော်လည်း အသစ်ဝင်ပဲမာလိုင်းများမှာဈေးကျဆင်းနေပြီး နှမ်းမျိုးစုံနှင့် မြေပဲဆံမှာ တရုတ်လိုင်းအဝယ်ကောင်းလာတာကြောင့် ဈေးမြင့်တက်လာသည်။

✔️ ပဲဈေးကွက်အတွင်း အသစ်ဝင်ပဲများစုံလင်စွာ ဝင်ရောက်လာတာကြောင့် ယခင်ပဲမာလိုင်း အဟောင်းဈေးများထက်ဈေးကျဆင်းနေကြောင်း၊ အဝင်များလို့ ဈေးကျဆင်းသော်လည်း ကုလားပဲအုပ်စုအနည်းငယ် ဈေးပြန်တက်လာကြောင်း၊ ခိုင်မာမှုမရှိသည့်သတင်းများကြောင့် ဈေးကျဆင်းသွားသည့်ပို့ကုန်ပဲတွေ ဒီနေ့ကစပြီးဈေးပြန်တက်လာကြောင်း ရွှေစင်သိန်းပွဲရုံပိုင်ရှင် ဦးကျော်သွင်က ပြောသည်။

✔️ "အသစ်ဝင်ပဲတွေ ဈေးကွက်ကိုစုံစုံလင်လင်ဝင်လာပါပြီ။ အသစ်ဝင်ကုလားပဲတွေ ဈေးကျဆင်းနေတာကနေ လှောင်လက်သမားများအဝယ်ရှိလာလို့ ဈေးပြန်မြင့်တက်လာပါတယ်။ ကုလားပဲအုပ်စုတစ်ခုလုံးအကျရပ်ပြီး ဈေးပြန်တက်လာပေမယ့် အရင်အမြင့်ဈေးထိတော့ မရောက်သေးပါဘူး။ ပဲမာလိုင်းတွေကတော့ အဟောင်းဈေးအမြင့်ကနေ အသစ်ဝင်ရောက်လာတော့ ဈေးကျဆင်းသွားပြီး ပေါက်ဈေးအတိုင်းအရောင်းအဝယ်သွက်နေပါတယ်။ လက်ရှိမှာပို့ကုန်မူဝါဒ အပြောင်းအလဲခိုင်မာမှုမရှိတဲ့သတင်းတွေကြောင့်ပဲ ဈေးကွက်အပေါ် ရိုက်ခတ်မှုရှိခဲ့ပေမယ့် လက်ရှိမှာပို့ကုန်ပဲတွေ ဈေးပြန်မြင့်တက်လာပါတယ်" ဟု ၎င်းကပြောသည်။

✔️ မတ်လ(၇)ရက်တွင် ပို့ကုန်ပဲများဈေးပြန်မြင့်တက်လာရာ မတ်ပဲတစ်အိတ်လျှင် ငွေကျပ် ၂၈၅,၀၀၀၊ ပဲစင်းငုံတစ်အိတ်လျှင်ငွေကျပ် ၃၈၀,၀၀၀ ပေါက်ဈေးဖြစ်လာသည်။ ပဲတီစိမ်းအညာ တစ်အိတ်လျှင်ငွေကျပ် ၁၈၅,၀၀၀ ပေါက်ဈေးဖြင့်ဈေးမြင့်တက်လာသည်။ 

✔️ ပြည်တွင်းသုံးကုလားပဲအုပ်စုမှာ အနည်းငယ်ဈေးကျဆင်းနေပြီး မတ်(၇)ရက်တွင် ကုလားပဲV2 တစ်အိတ်လျှင် ငွေကျပ် ၂၅၁,၀၀၀၊ ကုလားပဲ V7တစ်အိတ်လျှင် ငွေကျပ်၂၅၃၀,၀၀၀၊ ထိုင်ဝမ် ကုလားပဲတစ်အိတ်လျှင် ငွေကျပ် ၂၄၀,၀၀၀၊ ၉၂၉ ကုလားပဲတစ်အိတ်လျှင် ငွေကျပ်၂၄၁,၀၀၀ ပေါက်ဈေးဖြစ်လာသည်။

✔️ ပြည်တွင်းသုံးပဲမာလိုင်းများမှာ အသစ်ဝင်ရောက်မှုများလာတာကြောင့်လည်းဈေးကျဆင်းနေရာ ပဲကြီးတစ်အိတ်လျှင် ငွေကျပ် ၃၂၀,၀၀၀၊ ပဲထောပတ်တစ်အိတ်လျှင် ငွေကျပ် ၃၉၅,၀၀၀၊ မြေ ထောက်ပဲတစ်အိတ်လျှင် ငွေကျပ် ၃၅၃,၀၀၀၊ ကျွန်းစားတော်ပဲ တစ်အိတ်လျှင် ငွေကျပ်၂၉၅,၀၀၀၊ ကနေဒါစားတော်ပဲတစ်အိတ်လျှင် ငွေကျပ် ၂၄၂,၀၀၀ ပေါက်ဈေးရှိပြီး တရုတ်လိုင်းအဝယ်ရှိလာတာကြောင့် မြေပဲအနီလုံးဆံ(မြင်းမူ) တစ်ပိဿာလျှင် ငွေကျပ် ၈,၀၀၀ မှ ၈,၄၀၀ အထိဈေးမြင့်တက်လာသည်။

✔️ မတ်လ(၇) ရက်တွင် နှမ်းမျိုးစုံလည်းအနည်းငယ်ဈေးမြင့်တက်လာရာ နှမ်းဖြူ(ဂျပန်) ၄၅ ပိဿာ တစ်အိတ်လျှင် ငွေကျပ် ၄၁၅,၀၀၀၊ နှမ်းညိုတစ်အိတ်လျှင် ငွေကျပ် ၃၁၀,၀၀၀၊ နှမ်းဝါတစ်အိတ်လျှင် ငွေကျပ် ၃၂၅,၀၀၀၊ နှမ်းနက်စမုံတစ်အိတ်လျှင် ငွေကျပ် ၄၂၀,၀၀၀ အသီးသီးပေါက်ဈေးရှိလာကြောင်းသိရသည်။

✔️ သီးနှံ၊ ဈေးကွက်သတင်းများကို တောင်သူဦးကြီးများသိရှိနိုင်ပါရန် တင်ပြအပ်ပါသည်။ 

Sources : ရွှေမန်း (မကွေးဂျာနယ်)