🌱🌱🌱🌱🌱🌱🌱🌱🌱🌱

✔️ “စားအုန်းဆီက တစ်ပိဿာကို ၈,၀၀၀အထိ ဖြစ်သွားသေးတယ် ၊ ဇူလိုင်(၉)ရက်နေ့က ၆,၀၀၀ ကျော် ထိ ကျသွားပြီး ဇူလိုင်(၁၀)ရက် မနက်မှာကျ ၇,၃၀၀ အထိ တက်သွားတယ်။ ညနေကျတော့ ၇,၅၀၀၊ ၇,၈၀၀ တွေ ဖြစ်ပြီးအရောင်အဝယ်တွေ လုပ်နေကြတယ်” ဟု ရန်ကုန်မြို့ရှိ ဆီလက်လီ လက်ကားရောင်းချနေသူ ကိုဝင်းသူက ပြောသည်။ 

✔️ ပြည်တွင်းစျေးကွက်တွင် စားအုန်းဆီတစ်ပိဿာလျှင် ယခင်ရက်က ၆,၇၀၀ ကျပ်ဖြင့် အရောင်းအဝယ် ပြုလုပ်နေကြရာမှ လက်ရှိ တစ်ပိဿာလျှင် ၇,၅၀၀ မှ ၇,၈၀၀အထိ အရောင်းအဝယ်ပြုလုပ်နေ ကြကြောင်း သိရသည်။ စားသုံးဆီ တင်သွင်းသိုလှောင် ဖြန့်ဖြူးခြင်းလုပ်ငန်း ကြီးကြပ်ရေးကော်မတီမှ သတ်မှတ်ထားသည့် အခြေခံရည်ညွန်းစျေးထက် ပြည်ပစားအုန်းဆီစျေးမှာ ထက်ဝက်နီးပါး မြင့်တက် နေကြောင်း စျေးကွက်မှသိရသည်။

✔️ လက်ရှိကော်မတီမှ ရန်ကုန်အထိုင်ဈေး အခြေခံလက်ကားရည်ညွှန်းဈေးကို ၂၀၂၃ ခုနှစ်၊ ဇူလိုင်လ(၁၀) ရက်နေ့မှ ဇူလိုင်လ(၁၆)ရက်နေ့အထိ တစ်ပိဿာလျှင် ၄,၁၄၀ ကျပ်သာ သတ်မှတ်ထားသော်လည်း ပြင်ပ ပေါက်စျေးမှာ တစ်ပိဿာလျှင် ၇,၃၀၀ ကျပ်နှင့်အထက်တွင် အရောင်းအဝယ်ရှိနေခြင်းဖြစ်ကြောင်း သိရသည်။ ယင်းအပြင် စျေးကွက်တွင် ပဲဆီရှယ် တစ်ပိဿာလျှင် ၁၅,၀၀၀ ကျပ် ရှိပြီး ရိုးရိုး တစ်ပိဿာလျှင်၈,၀၀၀ကျပ်ဖြင့် ပေါက်စျေးရှိကြောင်းသိရသည်။ 

✔️ ယခုအပတ်တွင် ကမ္ဘာစားအုန်ဆီစျေး အမြင့်စျေးတွင်ရှိနေပြီး စားအုန်းဆီ အဓိကတင်သွင်းနေသည့် မလေးရှားနိုင်ငံ နှင့် အင်ဒိုနီးရှားနိုင်ငံတို့မှ ပြည်ပတင်ပို့မှု ခွင့်ပြုသည့်ပမာဏကိုလျော့ချထားခြင်းကြောင့် တင်သွင်းသူများမှ ပြည်တွင်းလက်လီလက်ကားအရောင်းဆိုင်များသို့ ဆီအကန့်အသတ်ဖြင့်သာ ဖြန့်ဖြူး နေရခြင်းကြောင့် ပြင်ပဆီစျေးမှာအမြင့်စျေးတွင်ရှိနေခြင်းဖြစ်ကြောင်း ဆီလုပ်ငန်းရှင်တစ်ချို့ထံမှ သိရသည်။ 

✔️ “ကုန်သည်တွေလက်ထဲ ဆီလက်ကျန်နည်းနေလို့ ဈေးတက်နေတာ။ ဆီတင်သွင်းသူတွေက လက်လီလက်ကားရောင်းတဲ့ဆိုင်တွေကို ဆီအလုံအလောက် ပြန်ရောင်းချမပေးနိုင်ဘူး၊ ဝယ်ထားတာတွေကိုထုတ်ပေးတာနည်းတော့ ဆိုင်တွေမှာ လက်ကျန်ရောင်းစရာသိပ်မကျန်ကြဘူး ဖြစ်နေတယ်” ဟု မန္တလေးတိုင်းဒေသကြီးမှ ဆီလုပ်ငန်းရှင်တစ်ဦးကပြောထားသည်။

✔️ ကော်မတီအနေဖြင့် စားအုန်းဆီအဓိကထုတ်လုပ်တင်ပို့သည့် မလေးရှားနိုင်ငံနှင့်အင်ဒိုနီးရှားနိုင်ငံတို့တွင် ဖြစ်ပေါ်နေသည့် FOB ဈေးနှုန်းများကို နေ့စဉ်စောင့်ကြည့်ကာ သယ်ယူပို့ဆောင်ခကုန်ကျစရိတ်များ၊ ဘဏ်စရိတ်များ၊ အခွန်အခများထည့်သွင်းတွက်ချက်ကာ ပြည်တွင်းဈေးကွက်၌ ရောင်းဝယ်ဖောက်ကား ရမည့် အခြေခံလက်ကားရည်ညွှန်းဈေးနှုန်းများအား အပတ်စဉ်ထုတ်ပြန်လျှက်ရှိပြီး ပြည်တွင်းဈေးကွက် အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန်ရည်ရွယ်ချက်ဖြင့်သိုလှောင်ခြင်းနှင့် မသမာသည့် လုပ်ဆောင်မှုများပြုလုပ်ပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွား မည်ဖြစ်ကြောင်း အသိပေးထုတ်ပြန်ထားခြင်းလည်းရှိသည်။ 

✔️ “ဝယ်ရောင်းတွေ လိုသလောက်ပဲဝယ်ရောင်းသင့်တယ်။ ဝယ်သူမရှိရင် ဈေးကကျမှာပဲ။ ချင့်ချိန် စဉ်းစားသင့်တယ်။ ဈေးမြင့်တာကို ဝယ်ရောင်းသရွေ့ကတော့ ရှုံးမှာပါ ။ ဒါကြောင့် နယ်သမားတွေ အရောင်းရပ်တာအကောင်းဆုံးပါ” ဟု ဆီဝယ်ရောင်းတစ်ဦးကပြောသည်။ ပြည်တွင်း၌ စားအုန်းဆီ သုံးစွဲမှုမှာ တစ်နှစ်လျှင် တန်ချိန်(၁၀)သိန်းကျော်အထိရှိသောကြောင့် နှစ်စဥ်တန်ချိန် ၆သိန်း မှ ၇သိန်း ကြားအား မလေးရှားနိုင်ငံ နှင့် အင်ဒိုနီးရှားနိုင်ငံများမှ စားအုန်းဆီများကို အဓိကထား၍ တင်သွင်း နေရကြောင်းသိရသည်။ 

✔️ သီးနှံ၊ ဈေးကွက်သတင်းများကို တောင်သူဦးကြီးများသိရှိနိုင်ပါရန် တင်ပြအပ်ပါသည်။

Sources : ဖိုးချဲ (AMIA)