🌾🌾🌾🌾🌾🌾🌾🌾🌾🌾

↗️ ပြည်တွင်း၌ စပါးသိုလှောင်သည့်ရာသီချိန်ဖြစ်ပြီး စပါးအထွက်နှုန်းကျဆင်းနိုင်သည်ဟု ခန့်မှန်းကာ လှောင်လက်များ၊ ဆန်စက်များကအပြိုင်ဝယ်ယူကြခြင်းကြောင့် နိုဝင်ဘာပထမပတ်တွင် စပါးဈေးမှာ ယခင်လထက် ဈေးမြင့်တက်လာကြောင်း စပါးဈေးကွက်မှသိရသည်။

↗️ ပြီးခဲ့သည့် အောက်တိုဘာလက စပါးတင်း ၁၀၀ လျှင် ပျမ်းမျှငွေကျပ် ၉၀၀,၀၀၀ - ၁,၁၀၀,၀၀၀ ဝန်းကျင်ပေါက်ဈေးရှိခဲ့ရာက လက်ရှိတွင် ငွေကျပ် ၁,၂၀၀,၀၀၀ မှ ၁,၅၀၀,၀၀၀ ဝန်းကျင်ထိ ရှိလာသည်ဟုဆိုသည်။

↗️ “လှောင်လက်တွေ အဝယ်များလာတယ်။ အရောင်းအဝယ်သဘောအရ ဝယ်လိုအားများရင် ဈေးမြင့်လာတာပဲ။ တချို့တောင်သူတွေဆိုရင် ထွက်တဲ့စပါးရဲ့တစ်ဝက်နီပါးလောက်ရောင်းပြီးကုန်ပြီ။ သူတို့လက်ထဲ ကြာကြာမထားနိုင်ကြဘူး။ စပါးဈေးတက်မှ တောင်သူတွေ ကုန်ကျတဲ့စိုက်ပျိုးစရိတ်ကို ကာမိပါမယ်”ဟု စပါးကုန်သည်တစ်ဦးက ပြောသည်။

↗️ နိုဝင်ဘာ ပထမအပတ်တွင် စပါးတင်း ၁၀၀ ပေါက်ဈေးများမှာ မနောသုခ ၁,၂၅၀,၀၀၀ကျပ် ဝန်းကျင်၊ ဆင်းသုခ(၁,၃၀၀,၀၀၀)ကျပ် ဝန်းကျင်၊ ပေါ်ဆန်း(၁,၄၅၀,၀၀၀)ကျပ်ဝန်းကျင်၊ တောင်ပျံ(၁,၅၀၀,၀၀၀) ကျပ်ဖြစ်ပြီး အခြားသောစပါးများမှာလည်း ယခင်လထက် ဈေးနှုန်းမြင့်လာရာ ဒေသတစ်ခုနှင့်တစ်ခု ပေါက်ဈေးအနည်းငယ်ကွာဟကြောင်း သိရသည်။

↗️ “စပါးကအစိုနှင့်အခြောက်ရှိပြီး အခြောက်ကဈေးပိုတယ်။ စက်ထဲအရောက်ဈေးနဲ့ တောင်သူနေရာမှာ ဝယ်တဲ့ဈေးလည်း မတူဘူးပေါ့။ စပါးအဝယ်များလေ ဈေးတက်လေပဲ။ ဈေးကျမယ်ထင်လို့ မဝယ်ဘဲ အခြေအနေစောင့်ကြည့်နေသူတွေလည်းရှိတယ်။ တောင်သူတွေဆီ စပါးမရှိတော့ချိန် ဈေးတက်တတ်လို့ ခုချိန်ဝယ်နေကြတယ်” ဟု တောင်သူတစ်ဦးက ပြောသည်။

↗️ လှောင်လက်များနှင့် ဆန်စက်များက ဝယ်ယူမှုများပြားလျက်ရှိသော်လည်း အချို့တောင်သူများက အနည်းငယ်သာရောင်းချပြီး စပါးဈေးထပ်မံတက်လာမည့်အခြေအနေ စောင့်နေသူများလည်းရှိကြောင်း၊ ပြီးခဲ့သည့်စပါးစိုက်ချိန်က သွင်းအားစုဈေးနှုန်းများ ၃ ဆကျော် မြင့်တက်ခဲ့၍ စိုက်စရိတ်ကြီးမြင့်လာခြင်း နှင့် စပါးအထွက်နှုန်းလျော့ကျနိုင်သည်ဟု ခန့်မှန်းမှုများကြောင့် စပါးဈေးမြင့်လာကြောင်း ကုန်သည်အချို့က သုံးသပ်ကြသည်။

↗️ သီးနှံဈေးကွက်သတင်းများကို တောင်သူဦးကြီးများသိရှိနိုင်ပါရန် တင်ပြအပ်ပါသည်။ 

Sources : ရွှေမန်း