Wisarra

“တရုတ်ဘက်မှ လော့ဒေါင်းဖြေလိုက်သည့်အတွက် ဖရဲတင်ပို့မှု ယခင်ထက်ပိုများလာ”

🍉🍉🍉🍉🍉🍉🍉🍉🍉🍉

⏩တရုတ်နိုင်ငံမှ ကိုဗစ်ရောဂါကူးစက်မှုများရှိသည့်အတွက် လော့ဒေါင်းများမကြာခဏ ချထားလေ့ရှိပြီး လက်ရှိချမှတ်ထားသည့်လော့ဒေါင်များကို ဖြေလျော့လိုက်ခြင်းကြောင့် တရုတ်ဘက်သို့ဖရဲတင်ပို့သည့်ယာဉ်များ ဝင်ရောက်မှုများနေကြောင်းသိရသည်။

⏩တရုတ်နိုင်ငံအနေဖြင့် ၂၀၁၉ ခုနှစ် ဒီဇင်ဘာ(၈)ရက်နေ့မှစတင်ကာ တင်ပို့ရမည့်နေရာများကိုကန့်သတ်၍ လောဒေါင်းသတ်မှတ်ထားခဲ့ခြင်းဖြစ်ပြီး ယခု ၂၀၂၂ ခုနှစ် ဒီဇင်ဘာ(၇)ရက်နေ့မှ စတင်ကာ ကိုဗစ် လော့ဒေါင်းကို အပြီးပယ်ဖျက်လိုက်ခြင်းဖြစ်ကြောင်းသိရသည်။

⏩“လော့ဒေါင်းမဖြေကတည်းက ကုန်သွယ်ရေးကမပြတ်ဘူး။ မြို့နယ် နယ်မြေတွေမှာ လော့ဒေါင်းတွေ နဲ့ဆိုတော့ ပွဲစားတွေနဲ့ကုန်သည်တွေက လိုသလောက်မဝယ်နိုင်ဘူးတင်ပို့လို့မရဘူး။ အခုက လော့ဒေါင်းဖြည်လိုက်ပြီး ကူးသန်းသွားလာရေးလဲဖွင့်လိုက်ပြီဆိုတော့ ဝယ်လက်တွေများလာတယ်။ အခုက အတားအဆီးမရှိ ပို့ချင်တဲ့နေရာပို့လို့ရသွားတယ်” ဟု မူဆယ်(၁၀၅)မိုင် သစ်သီးဝလံကုန်စည်ဒိုင် တာဝန်ခံ ဒေါ်ရီရီခိုင်ကပြောသည်။

⏩လော့ဒေါင်းဖြေလျော့လိုက်သည့်အပြင် ရှန်တိန်စနစ်အားလုံးကိုပါဖျက်လိုက်ကြောင်း သတင်းများ ထွက်ပေါ်နေသော်လည်း လက်ရှိမြေပြင်တွင် အမှန်တကယ် ဖျက်သိမ်ခြင်းမရှိသေးကြောင်း ကုန်သည်များထံမှသိရသည်။ မူဆယ်(၁၀၅) မိုင်သို့ ယခုနှစ် မိုးရာသီဖရဲသီးစျေးကွက်အချိန်က ပျမ်းမျှ ဖရဲသီးကား အစီးရေ နှစ်စီး၊ သုံးစီးခန့်သာ ဝင်ရောက်မှုရှိခဲ့ပြီး လက်ရှိ ဖရဲ၊ သခွါး ကားအစီးရေ(၁၀၀) ပတ်ချာလည် ဝင်ရောက်နေကြောင်းသိရသည်။

⏩လော့ဒေါင်းစဖြေလျော့သည့် ရက်များက ဖရဲသီးများစျေးကောင်းရခဲ့သော်လည်း နောက်ပိုင်း ကားအစီးရေတင်ပို့မှုများလာသည့်အတွက် စျေးကွက်အေးလာကြောင်းလည်း သိရသည်။ လက်ရှိ စျေးကွက်တွင် ပျှမ်းမျှ ဖရဲတစ်တန်လျှင် ယွမ် ၁,၂၀၀ မှ ၂,၀၀၀ ဝန်းကျင်အထိ ပေါက်စျေးရှိကြောင်း သိရသည်။

⏩“တင်ပို့မှုများလာတော့ စျေးကတော့ ပထမရက်ထက်စာရင် နည်းနည်းအေးတယ်။ ပြီးခဲ့နှစ်နဲ့ယှဉ်ရင် စျေးကောင်းရတယ်လို့ပြောမရဘူး။ ၂၀၁၉ ကတည်းက အပြတ်အပြတ်နဲ့သွားနေရတာ စျေးနှုန်း ကနှိုင်ယှဉ်လို့မရသေးဘူး။ အခုပေါက်စျေးက စျေးကောင်းရတယ်လို့ပြောမရဘူး။ ပုံမှန်လောက်ပဲ ရှိသေးတယ်” ဟု ဖရဲကုန်သည်တစ်ဦးက ပြောသည်။ လက်ရှိ မူဆယ်(၁၀၅)မိုင် ကုန်စည်ဒိုင်စျေးကွက်သို့ ရှမ်းပြည်ဖရဲသီးများသာ အများဆုံးဝင်ရောက်မူရှိနေပြီး နောက်ပိုင်းဗမာသီးများ ဆက်လက်ဝင်ရောက် လာကာ စျေးကွက်ကောင်းလာနိုင်မည်ဖြစ်ကြောင်း သိရသည်။

⏩ပြီးခဲ့သည့်နှစ်များက ယခုအချိန်တွင် တရုတ်ဘက်သို့တစ်နေ့လျှင် ဖရဲကားအစီးရေ၃၀၀ခန့်အထိ ဝင်ရောက်နိုင်ခဲ့ပြီး လက်ရှိတွင်ကားအစီးရေ ၁၀၀ ဝန်းကျင်ခန့်သာရှိကြောင်းသိရသည်။ ဖရဲစျေးကွက် မသေချာခဲ့သည့်အတွက် ယခင် ၁၀၀ ရာခိုင်နှုန်း အပြည့်စိုက်သည့်သူများမှာ ၅၀ ရာခိုင်နှုန်းခန့်တောင် မရှိတော့သည့်အတွက် စိုက်ပျိုးနှုန်းကော အထွက်နှုန်းကောလျော့ကျနေကြောင်းသိရသည်။

⏩ထို့ကြောင့် ပြီးခဲ့သည့်နှစ်များထက် အထွက်နှုန်းနည်းသည့်အတွက် တင်ပို့မှုမှာလည်း နည်းနိုင်မည် ဖြစ်ကြောင်း ကုန်သည်များကဆိုသည်။ တချို့ကုန်သည်များမှာ သယ်ယူပို့ဆောင်စရိတ်များ ကြီးမြင့်နေသည့်အတွက် ပြည်တွင်းစျေးကွက်ကိုသာ အားထားရောင်းချနေကြောင်းသိရသည်။ မြန်မာနိုင်ငံမှထွက်ရှိသည့် သစ်သီးများကို တရုတ်နိုင်ငံသို့တင်ပို့ရာတွင် မူဆယ်(၁၀၅)မိုင် ကုန်သွယ်ရေးစခန်းမှ အဓိကအများဆုံး တင်ပို့နေကြောင်းသိရသည်။ မြန်မာနိုင်ငံမှ တရုတ်နိုင်ငံသို့ သီးနှံ (၂၅)မျိုးကို အဓိကထားတင်ပို့နေခြင်းဖြစ်ကြောင်းသိရသည်။

⏩သီးနှံ၊ ဈေးကွက်သတင်းများကို တောင်သူဦးကြီးများသိရှိနိုင်ပါရန် တင်ပြအပ်ပါသည်။

Sources : ဖိုးချဲ(AMIA)