🧄🧄🧄🧄🧄🧄🧄🧄🧄🧄

☑️ ကြက်သွန်ဖြူအသစ်များ ဝင်ရောက်နေသော်လည်း ကြက်သွန်ဖြူစျေးများ ပြန်လည်မြင့်တက်လာ ကြောင်း ကုန်သည်များနှင့် စားသုံးသူများထံမှသိရသည်။ ယခုနှစ် ကြက်သွန်ဖြူပေါ်ချိန် တရုတ်နိုင်ငံမှ တရားမဝင်တင်သွင်းနေသည့် ကြက်သွန်ဖြူများ အဝင်နည်းလာသည့်အတွက် စျေးကောင်းရနေခြင်းဖြစ်ကြောင်း သုံးသပ်ကြသည်။ 

☑️ “လက်ရှိ ကြက်သွန်ဖြူကတော့ ဈေးတော်တော်လေးကောင်းတယ်လို့ ပြောလို့ရတယ်။ အခုနှစ်ကတော့ နယ်စပ်မှ တရားမဝင်ကြက်သွန်တွေ သိပ်မဝင်ဘူး။ ဒါကြောင့် ဈေးကောင်းရနေတာ။ စျေးတွေကတော့ အမြဲတမ်းပြောင်းနေတော့ စျေးကိုပုံမှန်တင်ရောင်းလို့ မရဘူးဖြစ်တယ်” ဟု ရှမ်းပြည်နယ် အောင်ပန်းမှ ကြက်သွန်ပွဲရုံတစ်ခုမှ လုပ်ငန်းရှင်တစ်ဦးက ပြောသည်။ 

☑️ ဖေဖော်ဝါရီ(၁၄)ရက်နေ့က ဘုရင့်နောင်ကုန်စည်ဒိုင်တွင် ကြက်သွန်ဖြူကြူကုတ်ရှယ် တစ်ပိဿာလျှင် ၉,၀၀၀ မှ ၉,၂၀၀ အထိသာရှိခဲ့ပြီး လက်ရှိတွင် ၉,၂၀၀ မှ ၉,၄၀၀ အထိ ပြန်မြင့်တက်လာကြောင်း သိရသည်။ ထို့အပြင် အောင်ပန်း ထူး -၂ တစ်ပိဿာလျှင် ၁၅,၈၀၀ မှ ၁၆,၅၀၀ သို့ လည်းကောင်း၊ အောင်ပန်း ထူး-၃ တစ်ပိဿာလျှင် ၁၆,၂၀၀ မှ ၁၇,၀၀၀ သို့ လည်းကောင်း၊ အောင်ပန်း ထူး- ၅ တစ်ပိဿာလျှင် ၁၇,၀၀၀ မှ ၁၇,၈၀၀ အထိလည်ကောင်း အသီးသီးပြန်လည်မြင့်တက်လာကြောင်း သိရသည်။ 

☑️ လမ်းပန်ဆက်သွယ်ရေးအခက်အခဲများကြောင့်အဝင်နည်းလာ၍ ရှမ်းကြက်သွန်ဖြူများ မြင့်တက်နေခြင်း ဖြစ်ကြောင်းလည်း ရန်ကုန်မြို့ပွဲရုံ တစ်ချို့ကပြောပါသည်။ ပြီးခဲ့သည့်နှစ် ဖေဖော်ဝါရီလ ကြက်သွန်ဖြူ တစ်ပိဿာလျှင် အများဆုံးစျေး ၅,၀၀၀ ဝန်းကျင်သာရှိခဲ့တာကြောင့် ၃ဆအထိ ခုန်တက်သွားခြင်း ဖြစ်သည်။ 

☑️ “လွန်ခဲ့တဲ့ (၅)ရက်လောက်က ကြက်သွန်ဖြူဈေးပြန်ကျသွားတယ်၊ တစ်ပိဿာကို ၁၂,၀၀၀ ပဲ ဝယ်ရတယ် ။ အခု တစ်ပိဿာကို ၁၅,၀၀၀ ပြန်ဖြစ်နေပြီး စျေးတွေကတစ်နေ့နဲ့တစ်နေ့မတူဘူး အမြဲ ပြောင်းနေတယ်” ဟု ရန်ကုန် ဒဂုံမြို့သစ်မှ စားသုံးသူတစ်ဦးက ပြောသည်။ 

☑️ ပြည်တွင်းစိုက်တောင်သူများအနေဖြင့်လည်း ဈေးကောင်းရရှိနေကြောင်း အောင်ပန်းကုန်စည်ဈေးကွက်မှ သိရသည်။ လက်ရှိ ရှမ်းပြည်နယ်ဘက်တွင် အထူး - ၂ တစ်ပိဿာလျှင် ၁၂,၀၀၀ ကျပ်ဖြင့် ရောင်းချနေပြီး အထူး - ၅ တစ်ပိဿာလျှင် ၁၅,၀၀၀ ကျပ်ဖြင့် ရောင်းချနေကြောင်းသိရပြီး ဒေသတစ်ခုနှင့်တစ်ခု စျေးကွာနိုင်ကာအချိန်မရွေးပြောင်းလဲနေကြောင်းသိရသည်။ 

☑️ ကြက်သွန်ဖြူကို အောက်တိုဘာ၊ နိုဝင်ဘာလတွေမှာ စတင်စိုက်ပျိုးကြပြီး ဖေဖော်ဝါရီလ နှင့် မတ်လများ ကြက်သွန်အသစ်များပေါ်ကြောင်းသိရသည်။ 

☑️ သီးနှံ၊ ဈေးကွက်သတင်းများကို တောင်သူဦးကြီးများသိရှိနိုင်ပါရန် တင်ပြအပ်ပါသည်။ 

Sources : ဖိုးချဲ(AMIA)