🌳🌳🌳🌳🌳🌳🌳🌳🌳🌳

⏩လက်ရှိ ကမ္ဘာ့ရာဘာစျေးမှာ အကျဘက်သို့ရောက်ရှိနေပြီး ယခုနှစ်တွင် ရာဘာတန်ချိန် သုံးသိန်းခွဲအထိ တင်ပို့ရန်လျာထားကြောင်းသိရသည်။ 

⏩ဒေါ်လာငွေကြေးတည်ငြိမ်ပြီး တင်ပို့မှုအပိုင်းတွင် မူဝါဒများမပြောင်းလဲပါက ယခုနှစ်တွင် တန်ချိန် သုံးသိန်းခွဲအထိ တင်ပို့ရန်လျာထားခြင်းဖြစ်ကြောင်း မြန်မာနိုင်ငံရာဘာစိုက်ပျိုး ထုတ်လုပ်တင်ပို့ ရောင်းချသူများအသင်းမှ သိရသည်။ ယခင် ကမ္ဘာ့ရာဘာပေါက်စျေးမှာ ဒေါ်လာ၂,၀၀၀ ဝန်းကျင်ထိရှိခဲ့ပြီး လက်ရှိတွင် ဒေါ်လာ ၁,၅၀၀ ဝန်းကျင်သာရှိတော့ကာ အကျဘက်သို့ ရောက်နေကြောင်းသိရသည်။ 

⏩“ကမ္ဘာရာဘာစျေးက အကျဘက်သို့ သွားနေတယ် ၁,၅၀၀ပဲ ရှိတော့တာ အများကြီးကျသွားတယ်။ ကမ္ဘာနိုင်ငံတွေမှာလဲအရေးအခင်းပြဿနာတွေအများအပြားရှိကြတယ်။ ဒီနှစ် ပြည်ပတင်ပို့တဲ့အခါမှာ မူဝါဒတွေခဏခဏမပြောင်းရင်တော့ တန်ချိန်၃သိန်းခွဲထိ တင်ပို့ဖို့လျာထားတယ် နှစ်စဉ် တန်ချိန်က ၃သိန်းကျော်အထိ တင်ပို့နေတာပေါ့။ အဓိက တရားမဝင်တင်ပို့မှုပေါ်မှာ မူတည်တာပေါ့၊ ငွေကြေးစျေး ဘာညာနဲ့တွက်ချက်ပြီး Oversea က ပို့လို့ကိုက်တယ်ဆိုရင်တော့ ပိုပြီးတင်ပို့နိုင်မှာပေါ့၊ အဲ့ဒီလိုမဟုတ်ပဲ ငွေကြေး ကမှောက်ကမ ဖြစ်နေရင်တော့ တရားမဝင်တင်ပို့မှုဘက်ကိုပြောင်းသွားမှာ” ဟု မြန်မာနိုင်ငံ ရော်ဘာစိုက်ပျိုးထုတ်လုပ်တင်ပို့ရောင်းချသူများအသင်း အတွင်းရေးမှူး ဦးခိုင်မြင့် က ပြောသည်။

⏩လက်ရှိ ပြည်ပတင်ပို့နိုင်ရန်အတွက် ပစ္စည်းစုဆောင်းမှုများ ပြုလုပ်ကြပြီး တင်ပို့ရာတွင်လည်း မူဝါဒ ပိုင်းအပြင် တခြားအခက်ခဲများစွာရှိကြောင်း ရာဘာလုပ်ငန်းရှင်များထံမှ သိရသည်။ လက်ရှိ ရာဘာခြံပြန်ဖွင့်ချိန် ကမ္ဘာ့ရာဘာစျေးပုံမှန်ခန့်တွင် ရှိနေခြင်းဖြစ်ပြီး ပြည်တွင်း၌ရာဘာတစ်ပေါင် လျှင် ၁,၂၀၀ မှ ၁,၂၅၀ ကြား အတွင်းအရောင်းဝယ်ဖြစ်နေကြောင်းသိရသည်။ 

⏩“ဒီတစ်ပတ်အတွင်းမှာတော့ ဒီစျေးကပုံမှန်အနေအထားဖြစ်နေတယ်။ ကမ္ဘာ့ရာဘာစျေးကတော့ အကျဘက်ကို သွားနေတယ်။ တွက်ခြေကိုက်လားဆိုတော့ ဒီကာလမှာ ပြောရတာအရမ်းခက်တယ်၊ ပြည်တွင်း ဒေါ်လာစျေးတွေမြင့်နေတာမို့ စျေးကဒီလောက်ရောက်နေတာ။ အဲ့ဒါနဲ့ အတူတူ ထုတ်လုပ်စရိတ်တွေမြင့်သွားတယ်၊ အခုစျေး လက်ရှိအခြေအနေက လုပ်သာကိုင်သာရှိနေသေးတယ်လို့ ပြောလို့ရပါတယ်” ဟု ရော်ဘာလုပ်ငန်းရှင်တစ်ဦး က ပြောသည်။ 

⏩ပြည်တွင်းရာဘာမှာ ပြည်ပတင်ပို့မှုသာအဓိကရှိပြီး ပြည်တွင်းသုံးစွဲမှုနည်းသည့် ပစ္စည်းဖြစ်သောကြောင့် နိုင်ငံတကာစျေးပေါ်မှာပဲ မူတည်ကြောင်းသိရသည်။ ရာဘာ တစ်နိုင်ငံလုံးစိုက်ဧကမှာ တစ်သန်း ခြောက်သိန်း နှင့် လေးသောင်းကျော် အထိရှိပြီး စိုက်ပြီးသားဧကထဲမှ ထုတ်လုပ်မှုတိုးတက်လာခြင်းကြောင့် အထွက်နှုန်းမှာ တစ်နှစ်ထက်တစ်နှစ် မြင့်တက်လာကြောင်းသိရသည်။ 

⏩လက်ရှိတွင် မြန်မာ့ရာဘာစုစုပေါင်း၏ ၇၅ ရာခိုင်နှုန်းခန့်အား တရုတ်နိုင်ငံသို့ အဓိကတင်ပို့လျက်ရှိကာ မလေးရှား၊ အင်ဒိုနီးရှား၊ စင်ကာပူ၊ ကိုရီးယား၊ အိန္ဒိယ နှင့် ဂျပန်နိုင်ငံများသို့လည်း တင်ပို့မှုများရှိကြောင်း၊ အများဆုံးအနေဖြင့် ပင်လယ်ရေကြောင်းမှ တင်ပို့လျက်ရှိကြောင်း သိရသည်။ ပြည်ပနိုင်ငံများသို့ နှစ်စဉ် ရာဘာတန်ချိန် သုံးသိန်းခွဲကျော် တင်ပို့လျက်ရှိကြောင်းလည်းသိရသည်။ ရာဘာကို မြန်မာနိုင်ငံတောင် ပိုင်းဒေသများဖြစ်သည့် မွန်ပြည်နယ်နှင့် တနင်္သာရီတိုင်းဒေသတို့တွင် အများဆုံးစိုက်ပျိုးကြသည်။

⏩သီးနှံဈေးကွက်သတင်းများကို တောင်သူဦးကြီးများသိရှိနိုင်ပါရန် တင်ပြအပ်ပါသည်။ 

Sources : ဖိုးချဲ(AMIA)