▪️ယခုနှစ်တွင် မိုးစပါးကိုနိုင်ငံတစ်ဝန်း ဧကပေါင်း(၁၅)သန်းစိုက်ပျိုးရန်လျာထားပြီးဩဂုတ်လ တတိယပတ်အထိ ဧက(၁၁)သန်းကျော်စိုက်ပျိုးထားပြီးဖြစ်ကြောင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနမှ သိရသည်။“စိုက်ပျိုးပြီးစီးတာ ရာခိုင်နှုန်းအားဖြင့် ၇၃.၃၉ ရာခိုင်နှုန်းလောက်ရှိပါတယ်။ မိုးစပါးစိုက်ပျိုးရာသီက မကုန်သေးတော့လျာထားချက်ပြည့်စိုက်ပျိုးနိုင်မှုအခြေအနေကပြောလို့မရသေးပါဘူး” ဟု စိုက်ပျိုးရေး ဌာနဦးဆောင်ညွှန်ကြားရေးမှုး ဦးကိုကိုကြီးကပြောသည်။

 ▪️ထို့ပြင်ဆည်မြောင်းနှင့်ရေအသုံးချမှုစီမံခန့်ခွဲရေးဦးစီးဌာနကတည်ဆောက်ထိန်းသိမ်းထားသည့်ရေလှောင်တမံပေါင်း(၂၃၅)ခုအနက်ယခုနှစ်မိုးရာသီတွင် ယခင် ၂၀၁၉ခုနှစ် မိုးရာသီကာလထက်ရေဝင်နည်းသည့် ရေလှောင်တမံပေါင်း(၁၁၅)ခုအထိရှိနေကြောင်း၊ သို့သော်ယခုနှစ်မိုးစပါးစိုက်ရာသီတွင်မိုးစပါးများ အတွက်ကြီးမားသည့်ထိခိုက်မှုများမရှိနိုင်ကြောင်းသိရသည်။ယခုနှစ်မိုးစပါးစိုက်ရာသီတွင်နိုင်ငံတစ်ဝန်းတွင် ဆည်ရေသောက်ဧရိယာများအတွင်း မိုးစပါးစိုက်ဧက(၁၃)သိန်းစိုက်ပျိုးသွားရန်လျာထားပြီး လက်ရှိအချိန်အထိမိုးစပါးဧက(၂)သိန်းခန့်စိုက်ပျိုးပြီးဖြစ်ကြောင်းသိရသည်။

 ▪️“၂၀၁၉ ခုနှစ်မိုးရာသီတုန်းကတော့မိုးစပါးဧက ၁,၃၉၀,၀၀၀ စိုက်ပျိုးဖို့လျာထားခဲ့ပြီး အဲဒီနှစ်ကလည်း မိုးရွာသွန်းမှုနည်းပြီး ဆည်ရေဝင်ရောက်မှုနည်းတဲ့အတွက် မိုးစပါးစိုက်ဧက ၁,၁၆၀,၀၀၀ ပဲအောင်မြင်စွာ စိုက်ပျိုးနိုင်ခဲ့ပါတယ်။ အခုဒီနှစ်မှာလည်းလျာထားချက်ကမနှစ်ကထက်နည်းပါတယ်။ ဧကနှစ်သိန်း လောက်ပဲစိုက်ပျိုးပြီးတာဖြစ်လို့ ကျန်တာတွေကိုလည်း မိုးကိုမျှော်ပြီးတော့စိုက်ပျိုးရမှာဖြစ်ပါတယ်။ လျာထားတဲ့စိုက်ဧက(၁၃)သိန်းမှာ မနှစ်ကလိုအနည်းဆုံး(၁၁)သိန်းလောက်တော့စိုက်ပျိုးနိုင်မယ် လို့တော့မျှော်လင့်ထားပါတယ်” ဟုဆည်မြောင်းနှင့်ရေအသုံးချမှုစီမံခန့်ခွဲရေးဦးစီးဌာန ဒုတိယညွှန်ကြား ရေးမှူး ဦးမြင့်စိုးကပြောသည်။

 ▪️လက်ရှိဆည်ရေလက်ကျန်များအရမိုးရာသီလက်ကျန်ကာလနှင့် တွက်ဆ၍ မိုးစပါးစိုက်ဧက (၁၃)သိန်း သို့မဟုတ် အနည်းဆုံးစိုက်ဧက (၁၂)သိန်းခန့်ကိုအောင်ရေအထိပေးဝေစိုက်ပျိုးနိုင်မည်ဖြစ်ကြောင်း၊ ယခုနှစ်ဆည်ရေသောက်မိုးစပါးစိုက်ဧကများတွင်စစ်ကိုင်းတိုင်းဒေသကြီးက စိုက်ဧကလေးသိန်းကျော် ဖြင့် အများဆုံးစိုက်ပျိုးရန်လျာထားခြင်းဖြစ်ပြီး ကရင်ပြည်နယ်ကစိုက်ဧကနှစ်ထောင်ကျော်ဖြင့် အနည်း ဆုံးလျာထားခြင်းဖြစ်ကြောင်းသိရသည်။

 ▪️မိုးစပါးစိုက်ဧကအများဆုံးစိုက်ပျိုးနေသည့် ဧရာဝတီတိုင်းဒေသကြီးတွင်ဧက (၃၁)သိန်းကျော်အထိ စိုက်ပျိုးပြီးဖြစ်ကာ လျာထားချက်မှာ ဧက (၃၅) သိန်းဖြစ်ကြောင်း အနည်းဆုံးလျာထားသည့် ကယား ပြည်နယ်တွင်မိုးစပါးစိုက်ဧက ငါးသောင်းကျော် စိုက်ပျိုးပြီးဖြစ်ကြောင်း သိရသည်။ 

မြင့်ဇော်ထွန်း

မြန်မာတောင်သူကြီးများဂျာနယ်

၂၀၂၀ ပြည့်နှစ် ဩဂုတ်လ (၂၄-၃၀)ရက်။