🍃🍂🍃🍂🍃🍂🍃🍂🍃🍂🍃

➡မန္တလေးတိုင်းဒေသကြီးအတွင်း ရာသီဥတုကောင်းမွန်မှုကြောင့် မကြာမီထွက်ရှိတော့မည့် နဂါးမောက် သီးများမှာ ယခင်နှစ်ကထက် အထွက်နှုန်းပိုကောင်းနိုင်ကြောင်း နဂါးမောက်သီးစိုက်ပျိုးသူများက ပြောသည်။

➡ယမန်နှစ်က လက်ရှိကာလတွင် အမြင့်ဆုံးအပူချိန် ၄၂ မှ ၄၅ ဒီဂရီစင်တီဂရိတ်အထိ ရှိခဲ့သော်လည်း ယခုနှစ်တွင် လက်ရှိအချိန်အထိ အမြင့်ဆုံးအပူချိန် ၄၀ ဒီဂရီစင်တီဂရိတ်အထိသာ ရှိခြင်းကြောင့် အပူချိန်လျော့ကျကာ နဂါးမောက်သီးများ ပိုမိုထွက်ရှိနိုင်သည်ဟု ခန့်မှန်းခြင်းဖြစ်ကြောင်း နဂါးမောက်စိုက်ပျိးသူ ဦးမျိုးဇော်က ပြောသည်။

➡“မနှစ်က အပူချိန်ပိုခဲ့တဲ့အတွက် အသီးက ၄၀ ရာခိုင်နှုန်းလောက်ပဲ ထွက်တယ်။ ဒီနှစ်မှာတော့ ၇၀ ရာခိုင်နှုန်းလောက်အထိ ထွက်နိုင်မယ်။ အသီးအရည်အသွေးကလည်း အပင်ပေါ်မှာ သီးနေတဲ့ အနေအထားအရ အရည်အသွေးကောင်းတယ်၊ ဈေးကွက်ကောင်းရင် ဒီနှစ်ဈေးကောင်း ရနိုင်မယ့် နှစ် ဖြစ်နိုင်တယ်”ဟု ဦးမျိုးဇော် က ပြောသည်။

➡၂၀၂၀ ပြည့်နှစ်တွင် အသီးတစ်လုံးတွင် ငွေကျပ် ၇၀၀ သာရရှိခဲ့သဖြင့် ယင်းဈေးနှုန်းထက် ပိုမိုရရှိနိုင်မည့်အခြေအနေတွင်ရှိကြောင်း၊ တစ်လုံးလျှင် ကျပ် ၁,၀၀၀ ဝန်းကျင် ရရှိနိုင်မည့်အခြေအနေတွင် ရှိကြောင်း နဂါးမောက်စိုက်ပျိုးသူများထံက သိရသည်။

➡နဂါးမောက်အပင်ကို တစ်ဧကလျှင် အပင်ရေ ၁,၆၀၀ အထိ စိုက်ပျိုးနိုင်ပြီး ထုတ်လုပ်မှုကုန်ကျစရိတ်အဖြစ် ကျပ်သိန်း ၃၀ ဝန်းကျင်ခန့်ရှိကြောင်း၊ နှစ်ရှည်သီးနှံအပင်ဖြစ်ပြီး ဈေးကွက်ကောင်းသဖြင့် စိုက်ပျိုးသင့်သောအပင်အမျိုးအစားဖြစ်ကြောင်း၊ အသီးလှိုင်လှိုင်ထွက်ရှိချိန်မှာ ဧပြီလကုန်မှ နိုဝင်ဘာလကုန်အထိဖြစ်ကြောင်း သိရပါသည်။

မျိုးသန့် (မြန်မာတောင်သူကြီးများဂျာနယ်)