🌿🍀☘️🍀🌿☘️🌿🍀☘️🍀🌿

🔸အိန္ဒိယနိုင်ငံ၏ ပဲတင်သွင်းမှုဆိုင်ရာ မူဝါဒအပြောင်းအလဲများရှိခဲ့သော်လည်း ပို့ကုန်အုပ်စုဖြစ်သည့် မတ်ပဲ နှင့် ပဲစင်းငုံ နှစ်မျိုးမှာ ယခုရက်သတ္တပတ်အတွင်း ဈေးပြန်လည်ကောင်းမွန်လာပြီး မြေပဲ ၊နှမ်းနှင့် ပဲမာလိုင်းများမှာလည်း အမြင့်စျေးဖြင့် အဝယ်သွက်နေေကြောင်း ပဲ ၊နှမ်းကုန်သည်များထံက သိရသည်။

🔸မတ်ပဲနှင့် ပဲစင်းငုံစျေးကွက်မှာ ယခုသီတင်းပတ်တွင် ဈေးပြန်လည်မြင့်တက်လာပြီး ပြည်တွင်းသုံး ပဲမာလိုင်းများမှာမူ စျေးမြင့်တက်မှုမရှိသော်လည်း အရောင်းအဝယ် သွက်နေသည်ဟု မန္တလေးတိုင်း ဒေသကြီး၊ ကုန်သည်များနှင့် စက်မှုလက်မှုလုပ်ငန်းရှင်များ အသင်း ဒုတိယဥက္ကဋ္ဌ ဦးကျော်သွင် (ရွှေစင်သိန်းပွဲရုံ)က ပြောသည်။

🔸“မတ်ပဲစျေးပြန်မြင့်တက်လာတယ်။ ပဲစင်းငုံစျေးလည်းပြန်ကောင်းလာတယ်။ ပဲမာလိုင်းတွေကတော့ မထူးဘူး။ အမြင့်စျေးနဲ့ ငြိမ်နေတယ်။ စျေးကျဆင်းနေတဲ့ပို့ကုန်ပဲတွေ စျေးအမြင့်နဲ့ ငြိမ်နေတယ်။ ဝယ်လိုအားလည်းကောင်းနေတယ်။ နှမ်းနက်ကတော့ ငြိမ်နေတယ်။ မြေပဲစျေးလည်း စျေးနှုန်းအပြောင်းအလဲမရှိ ဆက်ငြိမ်နေပြီး အရောင်းအဝယ်သွက်နေတယ်။ ပြည်တွင်းသုံး ကုလာပဲစျေးတွေ အပြောင်းအလဲနည်းပြီ အရောင်းအဝယ်ကတော့ ခပ်သွပ်သွပ်ဖြစ်နေပါတယ်။ တရုတ်နိုင်ငံဘက်ကလည်း ကုန်သွယ်မှုပြန်ကောင်းလာပါပြီ” ဟု ၎င်းက ပြောသည်။

🔸ပဲစင်းငုံ၊ မတ်ပဲ ၊ ပဲတီစိမ်း🔸

မတ်ပဲ နှင့် ပဲစင်းငုံမှာ စျေးပြန်ကောင်းလာပြီး ပဲတီစိမ်းအရောင်းအဝယ်မှာမူ ရန်ကုန်စျေးကွက်တွင်သာ ဖြစ်နေသည်။ ဖေဖော်ဝါရီ (၂၃) ရက်က မတ်ပဲ သုံးတင်းဝင်တစ်အိတ် အရည်အသွေးအလိုက် ကျပ် ၁၂၃,၀၀၀၊ ပဲစင်းငုံ ပိဿာ ၆၀ ဝင်တစ်အိတ် ကျပ် ၁၂၇,၀၀၀ အမြင့်ဈေးဖြင့် တည်ငြိမ်နေသည်။

🔸မြေပဲ ၊နှမ်းနက်🔸

ပြည်တွင်း စားအုန်းဆီဈေး တဖြေးဖြေးမြင့်တက်လာခြင်းနှင့်အတူ မြေပဲဆံစျေးကွက်မှာ ဖေဖော်ဝါရီ လဆန်းပိုင်းရက်များကတည်းက စျေးမြင့်တက်လာရာ ဖေဖော်ဝါရီလ(၂၃) ရက် အထိ စျေးကောင်းကာ အဝယ်အသွက်ဆုံးဖြစ်နေသည်။ မြေပဲဆံအမျိုးအစားအလိုက် တစ်ပိဿာ (၅၀-၇၅) ကျပ် စျေးမြင့်တက်လာသည်။ 

နှမ်းနက်မှာမူ သုံးတင်းတစ်အိတ်ကျပ် ၂၁၀,၀၀၀ ဖြင့် ယခင်အတိုင်း စျေးကျဆင်းမှုမရှိပဲ အဝယ်လည်း ပြန်လည်ကောင်းနေကြောင်း သိရသည်။ ဖေဖော်ဝါရီ (၂၃) ရက်တွင် နှမ်းနက် (အလတ်စ) သုံးတင်းဝင်တစ်အိတ် ကျပ် (၁၈၀,၀၀၀-၁၉၅,၀၀၀-၂၁၀,၀၀၀) စျေးရှိနေသည်။ နှမ်းဖြူသစ်ရိုးရိုးမှာ တစ်အိတ်လျှင် ကျပ် ၁၇၀,၀၀၀ ၊ နှမ်းညိုသစ်မှာ ကျပ် ၁၃၇,၀၀၀ အသီးသီး ပေါက်ဈေးရှိသည်။ မြေပဲလုံးဆံမှာမူ တစ်ပိဿာကျပ် ၃,၃၇၅ ၊ အနီလုံးဆံ တစ်ပိဿာ ကျပ် ၂,၉၅၀ ၊ ပြန့်လုံးဆံ၊ပြန့်ဆီဆံ တစ်ပိဿာကျပ် ၃,၁၅၀ စျေးထိ ဖြစ်လာသည်။

🔸အသစ်ဝင်ရောက်လာသည့် စွန်တာပြာ တစ်အိတ် ကျပ် ၁၁၆,၀၀၀ ၊ ပဲဇီးကွက် တစ်အိတ်ကျပ် ၁၂၃,၀၀၀၊ နိုင်လွန်ပဲ-ပုဂံပဲ တစ်အိတ် ကျပ် ၁၄၅,၀၀၀၊ ဘိုကိတ်ပဲတစ်အိတ် ကျပ် ၁၄၃,၀၀၀၊ ပဲထောပတ် ရှယ်သစ် တစ်အိတ် ကျပ် ၁၄၀,၀၀၀၊ မြေထောက်ပဲတစ်အိတ်ကျပ် ၁၄၃,၀၀၀၊ ကျွန်းစားတော်ပဲ တစ်အိတ်ကျပ် ၂၀၀,၀၀၀၊ ပြည်တွင်းသုံး ကုလားပဲဗွီးတူးတစ်အိတ် (၅၇.၂၅ ပိဿာ) ကျပ် ၁၁၄,၀၀၀ ပေါက်စျေးရှိရာ ယခင်သီတင်းပတ်ထက် ပဲမာလိုင်းများ အမြင့်စျေးနှင့်စျေးငြိမ်လျက်ရှိသည်။ 

🔸သီးနှံဈေးကွက်သတင်းများကို တောင်သူဦးကြီးများသိရှိနိုင်ပါရန် တင်ပြအပ်ပါသည်။ 

Sources : ရွှေမန်း (The Farmer Myanmar)