🌾🌾🌾🌾🌾🌾🌾🌾🌾🌾

✔️မန္တလေးတိုင်းဒေသကြီးအတွင်း တောင်သူများလက်ဝယ်၌ စပါးမရှိသလောက်နည်းပါးနေပြီး လှောင်လက်များထံရောက်ရှိနေသော်လည်း ဝယ်လက်များကဈေးပေးဝယ်ယူမှု မရှိသောကြောင့် စပါးဈေးငြိမ်နေကြောင်း စပါးပွဲစားအချို့ထံမှ သိရသည်။

✔️“စပါးက တောင်သူတွေလက်ထဲမရှိသလောက်ဖြစ်နေတယ်။ စပါးကို အစောပိုင်းကဝယ်လှောင်ကြတဲ့ ဆန်စက် နဲ့ လှောင်လက်တွေထဲရောက်ကုန်ပြီ။ ဝယ်သူတွေပေးတဲ့ဈေးကို မရောင်းတော့ပဲ ဈေးပိုတောင်းနေကြတယ်။ အဝယ်က ဈေးမလိုက်တော့ ဈေးငြိမ်နေတဲ့သဘောပါ” ဟု စပါးပွဲစားတစ်ဦးကပြောသည်။

✔️လက်ရှိစပါးပေါက်ဈေးမှာ ရွှေဘိုဘေးကြား တင်းတစ်ရာလျင် ငွေကျပ် ၂၁ သိန်း ဝန်းကျင်ဖြင့် ဈေးဖွင့် ဝယ်ယူနေသော်လည်း စပါးလက်ကျန်ရှိသောတောင်သူများက ငွေကျပ် ၅၀,၀၀၀ ပိုပေးရန် ဈေးတောင်းနေရာ ဝယ်လက်များကလည်း ဈေးပေးဝယ်ယူမှုမရှိသောကြောင့် ဈေးငြိမ်နေကြောင်း သိရသည်။

✔️“လက်ရှိစပါးတွေ မရှိတော့ပေမယ့် နောက်ထပ်စပါးအသစ်တွေ လာတော့မှာဖြစ်လို့ ဈေးငြိမ်သွားတာလည်း ဖြစ်နိုင်တယ်။ စပါးလှောင်ချိန်မှာ ဝယ်ထိန်းထားသူတွေလက်ထဲ အတော်များများရောက်ချိန်မှာ စပါးက တောင်သူလက်ထဲမရှိဖြစ်သွားတယ်။ အဲဒီမှာ ဈေးကစားလာကြတယ်” ဟု ဆန်ပွဲစားတစ်ဦးက ပြောသည်။

✔️စပါးအမျိုးအစားအလိုက် တင်းတစ်ရာ ဈေးနှုန်းများမှာ ငွေကျပ် ၁,၈၀၀,၀၀၀ မှ ၂,၄၀၀,၀၀၀ ဝန်းကျင်ရှိပြီး ပေါ်ဆန်းဘေးကြားဆန်(အဟောင်း) မှာ တစ်တင်းလျင် ငွေကျပ် ၁၁၀,၀၀၀ ၊ အသစ်မှာ ငွေကျပ် ၉၀.၀၀၀ ဝန်းကျင်ရှိကြောင်း၊ ဇန်နဝါရီလမှစ၍ ဆန်အမျိုးအစားအလိုက် ဆန်တစ်ပိုင်းလျှင် ငွေကျပ် ၅,၀၀၀ မှ ၂၀,၀၀၀ ဝန်းကျင် ဈေးတက်ခဲ့ကြောင်း ဆန်ဈေးကွက်မှ သိရသည်။

✔️စပါးသီးနှံ၊ ဈေးကွက်သတင်းများကို တောင်သူဦးကြီးများသိရှိနိုင်ပါရန် တင်ပြအပ်ပါသည်။ 

Sources : ရွှေမန်း