🍂🌶🍂🌶🍂🌶🍂🌶🍂🌶🍂

 (Bacterial Wilt Of Chilli)

 ရောဂါဖြစ်စေသက်ရှိ - Pseudomonas solanacearum.

 ရောဂါကျရောက်သည့်အချိန် - မိုးရာသီ

ရောဂါ လက္ခဏာ

---------------

 စိုက်ခင်းတွင်နေရာကွက်ကြား ကျရောက်ခြင်း(သို့မဟုတ်)အစုလိုက်ကျရောက်ခြင်းဖြစ်သည်။ အပင်ကြီးများတွင် အောက်အရွက်များမှလည်းကောင်း၊ အပင်ငယ်များတွင် အပေါ်အရွက်မှလည်းကောင်း စတင်ညှိုးပါသည်။ ရက်အနည်းငယ်ကြာသော် ရုတ်တရက်အပင်တပင်လုံး ညှိုးနွမ်းသွားပါသည်။ အရွက်ဝါခြင်းကို မတွေ့ရှိရပါ။ ပင်စည်၏အောက်ပိုင်း အစာရေကြောစည်း နှင့် အမြစ်တို့သည် အရောင်ပြောင်းလဲနေသည်ကို တွေ့ရှိရပါသည်။ ပင်စည်၏အောက်ပိုင်းကို ကန့်လန့်ဖြတ်၍ ရေထဲတွင် နှစ်ကြည့်ပါက နွားနို့နှစ်ရောင် ဘက်တီးရီးယားစိမ့်ထုတ်ရည် ထွက်ရှိလာသည်ကို သာမန်မျက်စိဖြင့် မြင်နိုင်ပါသည်။

ရောဂါသံသရာ

------------

 အပူပိုင်း၊ သမနွေးပိုင်း ရာသီဥတုရှိသောဒေသများတွင် မိုးများသောအချိန်၌ ငရုတ်ဘက်တီးရီးယား ရောဂါသည် အဓိက ကျရောက်လေ့ရှိသည်။ ရောဂါဖြစ်စေသော ဘက်တီးရီးယားသည် အခြားလက်ခံ သီနှံပင်များစွာတွင် ကျရောက်နိုင်ပြီး မြေထဲတွင်နှစ်ပေါင်းများစွာ ရှင်သန်နိုင်သည်။ စိုက်ခင်းထဲတွင် မြေအစိုဓာတ်များခြင်း၊ ရေဝပ်ခြင်းများရှိပါက ရောဂါလျှင်မြန်စွာဖြစ်ပေါ်စေပါသည်။

ကာကွယ်နှိမ်နင်းနည်း

-------------------

▪️ လေဝင်လေထွက်ကောင်းရန် အခြားလက္ခံသီးနှံပင်များနှင့် ပေါင်းမြက်များကို ရှင်းလင်းပါ။

▪️ မြေကိုနွေထယ်ရေးခံ၍ စိုက်ပါ။

▪️ ငရုတ်မျိုးရင်းဝင်မဟုတ်သော သီးနှံများဖြင့်သာ အလှည့်ကျ စိုက်ပျိုးပါ။

▪️ စိုက်ခင်းများ၊ ပျိုးထုပ်များတွင် ရေများခြင်း၊ ရေဝပ်ခြင်းမရှိစေရန် အထူးဂရုပြုပါ။

▪️ ဘာလီဆိုဒ် နှင့် ကျူပရိုမက်စ် (သို့မဟုတ်) ကာစင် နှင့် ကျူပရိုမက်စ် ဆေး(၂)မျိုးကို ရောစပ်၍ အရွက်နှင့် အပင်ခြေမြေကြီးအထိရောက်အောင် ကြိုတင်ပက်ဖျန်းပေး၍ ကာကွယ်နိုင်ပါသည်။

 Sources : Saya U Than Win Agri & PP(MAS)