🌱🌱🌱🌱🌱🌱🌱🌱🌱🌱

➡️ နယ်စုံမှအသစ်ဝင်နှမ်းနက်များ ဈေးကွက်အတွင်းဈေးအနည်းငယ်ကျဆင်းမှုရှိလာသော်လည်း ပို့ကုန်သမားများ ဝယ်လိုအားကောင်းနေကြောင်း ကုန်သည်များထံမှသိရသည်။

➡️ ဒီဇင်ဘာလဆန်းပိုင်းတွင် နှမ်းနက်ပေါက်ဈေးမှာ ယခင်အမြင့်ဆုံးဈေးထက် သုံးတင်းဝင်တစ်အိတ်လျှင် ငွေကျပ် ၁၀၀,၀၀၀ ခန့် ဈေးကွာခြားမှုရှိနေသောကြောင့် ဈေးပြန်လည်မြင့်တက်နိုင်သဖြင့် မျှော်မှန်းကာ ဝယ်လိုအားကောင်းနေခြင်းဖြစ်သည်။

➡️ ဒီဇင်ဘာလဆန်းပိုင်းမှာ ပဲကုန်သည်များ ငွေပေးချေမှုအခက်အခဲရှိသောကြောင့် ပဲ၊နှမ်း ဈေးကွက်မှာ အရောင်းအဝယ် အနည်းငယ်အေးလာကြောင်း၊ နှမ်းနက်တစ်မျိုးသာဈေးကျဆင်းမှုကြောင့် ပို့ကုန်သမား လှောင်လက်သမားတွေငွေနိုင်သလောက် အရောင်းအဝယ်ရှိနေကြောင်း၊ ကုလားပဲအုပ်စုမှာ ကုန်ချောပဲခြမ်း အရောင်းအဝယ်အေးသဖြင့် လက်ကျန်ရှိသော်လည်း ဈေးမြင့်တက်လာခြင်းမရှိကြောင်း၊ ဆီစက်ပိုင်များ ဆီအရောင်းအေးနေသော်လည်း မြေပဲဆံမှာ ဆက်လက်ဝယ်လိုအားကောင်းနေဆဲဖြစ်ကြောင်း ပဲကုန်သည်ဦးကျော်သွင်(ရွှေစင်သိန်းပွဲရုံ) ပိုင်ရှင်က ပြောသည်။

➡️ "ဒီဇင်ဘာလဆန်းပိုင်းမှာ ကုန်သည်တွေငွေပေးချေမှုအခက်အခဲရှိလို့ ပမာဏများများ အရောင်းအဝယ်အေးသွားပါတယ်။ အကျဈေးဖြစ်နေတဲ့ နှမ်းနက်ကတော့ ဆက်လက်ဝယ်လိုအားကောင်း နေသလို ငွေနိုင်သလောက်အရောင်းအဝယ်ကောင်းနေပါတယ်။ ပဲဖတ်ဈေးကတော့ အနည်းငယ်ဈေးကျသွားသလို မြေပဲဆီဆံကတော့ ဆက်လက်အရောင်းအဝယ်ကောင်းနေပါတယ်" ဟု ၎င်းကပြောသည်။ 

➡️ ဒီဇင်ဘာ(၃)ရက်တွင် ပို့ကုန်ပဲများမှ ပဲစင်းငုံဈေးမြင့်တက်လာရာ ပဲစင်းငုံ ပိဿာ ၆၀ တစ်အိတ်လျှင် ငွေကျပ် ၂၃၉,၀၀၀၊ မတ်ပဲပိဿာ ၆၀ တစ်အိတ်လျှင် ငွေကျပ် ၂၅၇,၀၀၀၊ ပဲတီစိမ်း(အညာ)သုံးတင်းဝင် တစ်အိတ်လျှင် ငွေကျပ် ၃၃၅,၀၀၀ အထိ ပေါက်ဈေးရှိနေသည်။

➡️ ပြည်တွင်းသုံး ကုလားပဲအုပ်စုမှာ V2 ကုလားပဲ သုံးတင်းဝင်တစ်အိတ်လျှင် ငွေကျပ် ၂၄၀,၀၀၀၊ V7သုံးတင်းဝင်တစ်အိတ်လျှင် ငွေကျပ် ၂၂၅,၀၀၀၊ ထိုင်ဝမ်ကုလားပဲ သုံးတင်းဝင်တစ်အိတ်လျှင် ငွေကျပ် ၂၂၅,၀၀၀၊ 929 ကုလားပဲသုံးတင်းဝင်တစ်အိတ်လျှင် ငွေကျပ် ၂၃၇,၀၀၀ ပေါက်ဈေးရှိနေသည်။

➡️ ပြည်တွင်းသုံး ပဲမာလိုင်းများမှာ ဒီဇင်ဘာ(၃)ရက်တွင် ပဲကြီးတစ်အိတ်လျှင် ငွေကျပ် ၆၈၀,၀၀၀၊ ကျွန်းစားတော်ပဲတစ်အိတ်လျှင် ငွေကျပ် ၉၀၀,၀၀၀၊ ပဲနီပြာ(ကျွန်း) တစ်အိတ်လျှင် ငွေကျပ် ၅၀၀,၀၀၀၊ ပဲထောပတ်(သစ်)တစ်အိတ်လျှင် ငွေကျပ် ၂၇၅,၀၀၀၊ မြေထောက်ပဲ တစ်အိတ်လျှင် ငွေကျပ် ၂၇၀,၀၀၀၊ စားတော်ပဲ(ကနေဒါ)တစ်အိတ်လျှင် ငွေကျပ် ၄၄၀,၀၀၀ ပေါက်ဈေးရှိနေသည်။

➡️ နှမ်းမျိုးစုံဈေးကွက်မှာ ဒီဇင်ဘာ(၃)ရက်တွင် နှမ်းနက်သုံးတင်းဝင် တစ်အိတ်လျှင် ငွေကျပ် ၇၃၀,၀၀၀၊ နှမ်းဖြူ(ဂျပန်)သုံးတင်းဝင်တစ်အိတ်လျှင် ငွေကျပ် ၂၉၀,၀၀၀၊ နှမ်းဖြူ(ဗမာ)သုံးတင်းဝင် တစ် အိတ်လျှင် ငွေကျပ် ၂၇၅,၀၀၀၊ နှမ်းညိုသုံးတင်းဝင်တစ်အိတ်လျှင် ငွေကျပ် ၂၇၀,၀၀၀ ပေါက်ဈေး ရှိနေပြီး မြေပဲအနီလုံးဆံတစ်ပိဿာလျှင် ငွေကျပ် ၈,၇၀၀ - ၈,၈၀၀၊ မြေပဲဆီတစ်ပိဿာလျှင် ငွေကျပ် ၁၃,၀၀၀၊ ပဲဖတ်တစ်ပိဿာလျှင် ငွေကျပ် ၆,၇၀၀ အသီးသီးပေါက်ဈေးရှိနေကြောင်း သိရသည်။

➡️ သီးနှံ၊ ဈေးကွက်သတင်းများကို တောင်သူဦးကြီးများသိရှိနိုင်ပါရန် တင်ပြအပ်ပါသည်။ 

Sources : ရွှေမန်း (မကွေးဂျာနယ်)